Capítulo 5
Lhema enenlhet apquelanactema
1
Nlengammalhquec ania'a lhema apjapac apiesecsec quetlhencap apmecja iama nquen jam, coca acto ncolatsecama nquec ma'a, mamma njan acuetai'o caselha nac ncolatsecama apiesecsec anac apquellelto meliojo nac Engiapom Neten.
2
Malha apquelammacpo aptancoc quetlhencap ma'a, coca nietawec na enmancac ma'a, elentepquesec na m'a enenlhet anac meijamolhma.
3
Molhnema co'o jam apiesecsec, malha coca acnema la ewalhoc apiesecsec anac quetlhencap jam, smac'ac aleltennacsec colhuawe nac asquelleltacja etnancoc apto apquelanai'a apquelanactema.
4
Necsa apcacnecja ta mocjom quetlhencap jam, malha acnema ta njan ncotnec ewalhoc co jam cacpota njan apmopuana Jesus apuesque engancoc.
5
Ellamoc jata enenlhet anac Satanas cacpota ncotuacsec apiocja nac, coca wanlha ta ncowoncasalhcac tep apjangoc apuactamo ta apuesque engancoc Jesus.
6
Mancolatsema ellacpoc ellanjoc caselha ncolatsecama nac quetlhencap, maniamolhma nac malha niecje alena apiepjescama nac, quetsec niecje nengancai'a, coca apiepjacjawec ma'a.
7
Ca ncanec ntasec elentepquesec enenlhet anac meijamolhma jam, apto malha alena la apiepjescama apjapawoc aptewascama nac alena nema aquiaqjapescama, cacpota ncowatac mocjom quetlhencap malha alena nac nengiaqjapescama apjalhnancoc, ca acto nac alena nema aquiaqjapescama nentoianco na mota necsa actacmelaicama lhma pascua. Cristo coca apto malha nepquesec apquetcoc ancoc pascua, apmatnama lhta jengiaqmoiecja ennenco'o.
8
Jai, ntasec antancoc actacmelaicama lhma la pascua aquieplomo panes metca apqueliepjescama, apqueluesai'a nac iocjalhmec anque, jawe ngiapac najan, menmama nquec alena apiepjescama apjapawoc anac, apqueluesai'a coca m'a maniamolhma, ncolatsecama.
9
Ca asnactalhesquescamo nac mo'oc alhta waccajac, asquelleltennasque lhta melpasmecjec apquellelto apquellanactema jam,
10
cacpota njan apquenmasmo caselha apancoc, apquenmenielhma, apqueltacnescasecamoc caselha aquiocja alanemmalhca, lhta squeltac na melpasmecjec enenlhet'awoc anac meliamolhma. Jawe co asquetlheianmo m'a enenlhet'awoc anac meliojo mocjom Engiapom Neten, ncanec mamma lhta ncotnec nelpasenwaiam la m'a.
11
Lhtoca niecje asquetlhenac ma'a melpasmecjec apquellelto Jesucristo apquennemolhema apquellanecamoc anac meliamolhma, apquellanactema, apquenmasmo caselha apancoc, apqueltacnescasecamoc caselha aquiocja alanemmalhca, apqueliemetcasecama po'oc, anmen ato'oc, apquenmenielhma, ca enenlhet'awoc anac ma'a melpasem anquec aptecamoc.
12
Mancoietoc co'o aliecpelcoc enenlhet'awoc anac metnanco nac Jesucristo apquennemolhema, Engiapom Neten jatoca eliecpelcoc ma'a.
13
Coca apuanca'ac quetlhencap eliecpelcoc Jesucristo apquennemolhema lhemec jam apiesecsec anac, ca ncanec ntasec elentepquesec enenlhet meijamolhma nac jam.