¹ Eliojo ta quetlhencap, wanlha coca ennenco'o nengellelto jengellasennaicama Cristo cacpota angetlhecmosancoc ania'a aquielhammalhca nac aniem'o Engiapom Neten. ² Enwanca'ac na angeluetasquesec enenlhet'awoc nentaiancolha nengeltacmelcasemmalhco necsa nenmacmecama nenlhewai'a. ³ Apuanca'a niecje quetlhencap jeliecpelcoc co'o asiamolhma, nlho ca la njan moijamolhma, cacpota njan ma'a jengiecpelquemo na angiapom apuanquec niecje njan jeiecpelcoc ma'a, coca apuanquec na mancoietec aplheianma m'a. Co'o njan ewanquec niecje aiecpelcalhcoc ejenquec, coca ewanquec na moietejec alhenammalhco ejenque. ⁴ Niecje njan aclhenaicama nac ewalhoc asiamolhma co'o, ewanquec quelha njan mancoietec aclhenaicama ewalhoc ma'a, coca wanlha Engiapom Neten apuanquec eliecpelcoc acpeiwomo nquec ma'a. ⁵ Ca ncanec mancolatsema etnancoc apqueliecpelquemo po'oc quetlhencap nenwanlha nac, ellaielh coca acuacmo acnem apuectanlha ta apto Apuesque, jata eljatsocsec caselha alposemmalhca apualho'oc cacpota enencanwetac alhnacjojo, ncoluetalhcac jata njan m'a, etlhewancoc jata alianmoma alietacjelha la m'a. ⁶ Quetlhengcap elialheng'a, asqueleltennasquec lhec nentaiancolha co'o cacpota njan Apolos necsa nengaqjaicamo lhta jam, neltacmelcasawe lhta ennenco'o cacpota mongeliequec jenganemacja actalhesammalhca waccajac Engiapom Neten apaioma, ¡elieplauques jata njan quetlhencap nentaiangcolha nac! Molleliepjesamanquec etnancoc apquellammacpo aptaicamoc apquelemjama apmaniaie apanco'oc apancawec, po'oc apquemjama apmanie coca apqueltemescasantac coneng. ⁷ Engiapom Neten coca apiasecja neten lhema apquemjama apmanie la'a apiesecsec ma'a, jawe aptema apanque, apcanquec na apientalhnemo apanquec ma'a, ca ncanec acjemo engiacpoc apanquec ma'a apquemjama apmanie la'a. ⁸ Nquetlhenque mota apualho'oc quetlhencap apquellelto nquescama caselha apanco'oc, mancaimommalhca caselhaja njan, nquetlhenquec na apualho'oc malha apqueliau'acja apqueluescai'e la'a, malha mongelaimelhcac na ennenco'o angelpasmoc ma'a. Ntasec jatelha m'a etnancoc apqueliau'acja apqueluescai'e quetlhencap cacpota antancoc ennenco'o lha malha apqueluescai'e nentemo lhemec la'a. ⁹ Malha niecje Engiapom Neten jengeltemescasquec metca ncoie', jengaqjescacjec na m'a nnelha ncoie' nengellelto nac apostoles, malha nenmammalhca nac nema jengiantemecja aquieto nenmatnamacja apiesecsec anac enenlhet'awoc apquenmajai'a eluetac caselhaja, enenlhet neten najan. ¹⁰ Netlhenalhquec na ennenco'o metca enqatco'oc aniem'o nellasennaicama Cristo, quetlhencap coca apqueltemescasquec Cristo nema apqueliamo. Netlhenalhquec na ennenco'o nengellelto mongeliennactema, quetlhencap coca apqueltemescasquec apqueliennactema Cristo. Manjengellac'oc na enenlhet'awoc aniem'o negellasennaicama Cristo, quetlhencap coca apqueltemescasac Cristo ellajoc enenlhet'awoc. ¹¹ Ampaio secje lhta acuacmo nenwanlha nac jengennapma mec, acnem jangaqjema, metca nellentalhnema, awanjec na jennactewascamo enenlhet'awoc, metca nengaqjaiangcolha njan, ¹² awanjec nelliampai'a aniem'o nenmacmecama. Necsa jengelliamenaicama enenlhet'awoc, nellatemmoma coca actacmanma nempaioma nelleltemo ncoltacmelec apquellaniemjaicama, necsa jengenmenlhenaicama, nengeluascapque coca ennenco'o. ¹³ Necsa nema jengeltacnoncoma, nellatemmoma coca actacmanma nempaioma, malha caselha apawoc anac alhammalhca, acmasquema nac nema anmaicama jengeltemescasac nenwanlha nac ennenco'o. ¹⁴ Moltoc co'o enmancac quetlhencap astalhescaso nac, wanlha asqueltawec alleltennasancoc malha acto nac eietcac ejenco ie asquellamelaiam anac. ¹⁵ Tocja m'a mantec apquellelto apquetlhecmosecamoc apanco'oc quetlhencap jam, coca co'o malha lhema asto apiapma'ac apancawec, alheianwai'a lhta ania'a actacmanma apiesecsec anac jam, ca aptaianco lhta njan apquennemolhema apancawec Cristo. ¹⁶ Ntasec coca jelieplo'oc amai astemacja nac co'o, ¹⁷ ca ncanec ascapascamo lhta Timoteo jam, apto malha eietca ejenque ascamelaiam, etlhenquesquescacjoc apualho'oc asquetlhecmosecamo lhta nentemacja antec Jesucristo apquennemolhema, ca astemacja na mota asquetlhecmoscamoc aplhamacjo apcacjaiancolha la'a Jesucristo apquennemolhema. ¹⁸ Moclhema quelha quetlhencap ncoliepjesama apquellanema mowataniec jam, ¹⁹ coca colhuawec jata awatac jam apquelto la Engiapom Neten, aluetanwetac jata apquellelto nac apquellammacpo, wanlha coca moc apatno'oc ngiapma'ac ma'a, atenwatac jatelha apmopuanca'a ellanancoc actacmanma nlho ca la mma'. ²⁰ Enenlhet apto la jawe ngiapac anquec Engiapom Neten apnemolhema, jawe moc apatong, apquelan'a mota caselha altacmelo napaqtawec enenlhet'awoc. ²¹ ¿Co la apquelleltacja atnec asuactamo ta quetlhencap jam, je, allancoc aquiennactema aspaioma, nlho ca la allamelama?