¹ Cayo pia jliyapacawa lrinacopi jliaji keerri Nisán dalri iipitana, vente walria oonia Artajerjes talricanaaca naco. Jliaji talricanaati lriniwana nanacjoite njaji jaico tjeda ianaa lrirrá carro, njite njopa lripjeyani noyacá carro lrirrao njite noaca lrirson, mitsa jliada naco inonaaca njoa lipeyajle. ² Mitsa lriaco norso jliaji talricanaati: ''¿Coadao inona calretsa pjia? Cotsa iyamikjeti jliaji pirsolri. Iinonacao pjia picaolre ricjoite.'' Njomi cádanco cayo, nofiowa pekirritsa. ³ Njite noaco lrirso jlaiji talricanaati: ''¡Lriofaotsa caidalriwetsa jliaji talricanaati! Inonaca njoa ima jliaji yacaalre, naicaonam njaji njonirri naipemi oopi napeeconi, njite napeeco tsacja lripananoma jiwao tiyee sho.'' ⁴ Njite jliaji talricanaati iaco norso: ''¿Coca pioma nonaitjaca pirso?'' Niini notatjaca Dio eenolricojlé dalri iinai. ⁵ Noaco lrirso jliaji talricanaati: ''Matsia cadatsa pjimica njite matsia cadatsa picapa nodenjica pirso, njoa pirsodalri, pimeenaca njoa Judá lricojle, lri ricoda jliaji yacaalre nawalri niini njaji njonirri naipemi, notaitá carro tsenacja njorretacani.'' ⁶ Njite jliepaca njoa jliaji talricanaati (njite lricodapitsa rsoaji talricanaati): ''¿Coshoatsa lriwiaca piacawa, njite coancaojliotsa pidia tsenaca piocawa?'' Njite nocaite cádanaco lrirso njonana nodiaca noocawa lriderse tsenacja, catiima lricaolre lrimeenacá carro njoa nirse. ⁷ Njite noaco lrirso jliaji talricanaati: ''Matsia cadatsa pirso, pidana norso paperra nacadaa carroatsa njoyapawa matsiatsa njepaite rico njaji talricanaatinai iofacapewa Ooni Eufrate pemajle noacayawa Judá lricojle. ⁸ Pidana tsacja papje Asaf irso, jliaji iwapacada njaji awacada piyaperri, pjia talricanaati, lricadaa carroatsa norso jaico coanjaiwa lriicaona jliaji yacaalre idaanawa taimí dalri Dio iipana kemajle, njite nonaitjá carro tsacja panti nofalriotsa niini.'' Njite noinai capoatsa jliaji Dio matsiadalri, jliaji talricanaati, lricadaa norso pjiomi njaji notatjalri lriinai. ⁹ Noawa naicjaolre njaji talricanaatinai iofacapewa a pjate Ooni Eufrate ioya, njite noa narso jliaji paperra talricanaati Atarjerjes idananda. Njite jliaji talricanaati lrimeenaca noinai tsolrodaonai caconaaperri njite atsianai iáa capeo caballo naco tsacja. ¹⁰ Njite Sambalat Horonita dalri njite Tobias, Amonita irsodalri njemi cádanaco coanca, corri napeyo njemica, kerroana nanocapoa njaji nakitsindatá carro njaji Iraelnai. ¹¹ Ikeena noacawa Jerosalen icojle, nofaa niinio madalridaa jalredaoca. ¹² Nocafiawa deepi rico njite apepena atsianai icafiawa tsacja noinai. Corrin coca irso nocaite njaji iwaopiakjeti Dio icadaalri nocaolre rico coancaotsa nonaitjaca Jerosalen icjaote. Njite corri norso apana pja caballo icaamitsa jliaji noajirri inaco. ¹³ Nomoto pemajle yacaalre ioya lri ricopeco jliaji pantinoma pacoacaita cawa kemajle, lricjaolre kema jliaji ooni nayarroaja njaji yamapoipoi, matsipeda ipananoma kemajle; niini noaji nocapa noicawa pjiomi yacaalre Jerosalen iwaimi, njite njaji lripananoma oopi namjaita pjiomina. ¹⁴ Njite dalri noawa lricjaolre jliaji oonipeco ipananoma, noapja nocapa lriema cawa pia jliaji ooni iarrona talricanaati iyadape, njite nocapa corri ketsa coan jliyapacawa noapiya niini jliaji caballo noajirri inaco. ¹⁵ Depjite jliadaa deepi noanjii nocapa yacaalre iwaidami pacoaca cafete jiipai, nodia njoewa yacaalre ipananomam lrico pacoacaita cawa jiipai kemjete. ¹⁶ Njaji talricanatinai corrin nanjii kjerreca noajiwaji njite coanpeca njoa ima corrin piacatoa nocaite njemi njaji judionai, njite njaji sacerdotenai tsacja, njaji caconaaperri, njaji iwapacape yacaalre talricanaatinai, njitena njaji apjetsida inaitjalri jliaji idenjikjeti. ¹⁷ Noaco narso: ''Capja icapa coanca maatsi catsa waofacawa, cotsa matsiaca Jerosalen idaana njite namjaita njaji lripananoma tiyee sho. Noinai jia ferretá carro tsenacja lridanawa jliaji Jerosalen, ima necaaca waicao njaji inaiki.'' ¹⁸ Nocaite narso noinaica Dio jiida njite nocadaa tsacja nanjii carro njaji iacoti talricanaati Artajerjes icaiterri norso. Niini naaco norso: ''Picadaa pedena ferretá carron.'' Ikaamitsa namatsietaacawa matsia nanaitja carro jliaji idenjikjeti matsia. ¹⁹ Mitsa Sambalat Horonita dalri njite Tobias, Amonita irsodalri njemi cádanaco coanca icaamitsa necaaca waicao njite namacadawalreta fa, naaco warso: ''¿Cokenaotsa inaitja? ¿Capja yemaca talricanaati ikjoete?'' ²⁰ Njite noaco njoepacana: ''Jliaji Dio eenolricoje dalri icadaotsa waacarro wapeyajle. Ima Lrirsoperrica fa niini lri cjaidataca faa ferreta carro tsenacja Jerosalen. Mitsa jia corritsa cocaca irsolri ajĩ wainai, corrin tsacja jiaca yajĩ ajĩ, corri tsa coca inaitjalri ajĩ Jerosalen lrico.''