¹ Icapiena caacoca Samuel nasho njaji iraelitanai. Njite jliawajli pia njaji iraelitanai naaca nainoacawa nacjoete njaji filisteonai. Nawacaacawa nacjoete Ebenezer ricó, njite njaji filisteonai nawacaacawa Afec ricó. ² Njaji filisteonai namatsietaacawa matsia nainoacá carró Iraelitanai icjoete. Nainiita cádanaco nainoacawa, njaji filisteonai jiameeta njaji iraelitanai, wadeepe nainoca cuatro mil iraelitanai nainoacalri niiniwa. ³ Nadia cádanaco naocawa njaji aatsianai nawacaacalri niiniwa, naaco njaji pekipenai caconaaaperri: ''¿Coadao wa Minalri icadaa filisteonai jameetaca fa? Washa iá jita waicjaolre jliaji arca wa Minalri inaitja shopam waapiya iacoti Silo ricjoite, lrinó carroatsa lridaanata fa filisteonai ioya. ⁴ Niini njaji iraelitanai nameenaca padapena atsianai Silo ricojle naacarro njeta jliaji arca tsolrodaonai Italricanaa inaitja shopam naapiya iacoti, jliaji iemacada napecolrico njaji ajelenai querubinai. Njite njaji yaame Elí ienipe Ofni njite Finees tsacja nawapaca jliaji arca na Minalri inaitja shopam naapiya iacoti. ⁵ Lriocacadanaco jliaji arca na Minalri inaitja shopam naapiya iacoti nawacaacacawa ricojle, cjaida njemataca njaji Iraelnai, njite cananica jiipai. ⁶ Filisteonai jimicadanaco njemataca cjaida, naaco: ''¿Coanshopao nawana cjaida njaji hebreonai nawacaacalri niiniwa?'' Njite naoca nanjíi nainaica jliaji arca na Minalri inaitja shopam naapiya iacoti nawacaacalri niinio. ⁷ Njaji filisteonai jorre nafiocao, niini naaco: ''Dio iocacao nawacacacaawao ricó njaji Iraelnai.'' Naaco pja: ''Cjenaaperrica fa'' ¡Corri piatsa coancaojli cayo feyapacao! ⁸ ¡Coajeotsa fa panaya! ¿Cocaotsa idanata fa naoya njaji diu aimadan cjaidaperri? Icapiatsa njaji diu aimadan ideecape pia njaji maatsiperri nanaco naji Egipto lricope jalrapocolri ricó. ⁹ Jia filisteonai, icadaacao atsianai mafiokje perri shotsa, corricada ioma hebreonai ishoperrica jia, cayoji washoperri capishopiana washo. Inoacawa atsianai sho.'' ¹⁰ Filisteonai inoacawa Iraelnai icjoete mitsa corrim Iraelnai itaita nacjoete njaji filisteonai. Njaji atsianai Iraelitanai napito nacoanam naoya naapana ricojle, ima jorre mayancana; naino trenta mil tsolrodao iraelitanai. ¹¹ Nañaito pja Dio iarcan njaji filisteonai, njite naino njaji Elí ienipe Ofni, Finees tsacja. ¹² Pada tsolrodao Benjamín poco inacjoitédalri jliecoa nainoacalri njiteo Silo ricojle njite lriocawa jliadatsa jeecoapi nirse, lrioca naicjaolre lritsayani tserre tserredalrim sho njite macada jipai jliwida nacó. ¹³ Lriocacadanaco nirse jliaji tsolrodao, Elí ofáa pantinomajle lriofáa carroita ricó, lriofáa lriwapa tsoomi inipo ioya ima jlitaca lricaolre lrinaco jliaji Dio iarcan. Lrioca cádanaco jliewa yacaalre ricó jliaji tsolrodao njite lricaite njemi coanca njeyapacao, cjaida nawanaca njaji yacaalre ricope. ¹⁴ Elí jimicadanco nawanaca cjaida njaji inaiki, lriaco: ''¿Cuanshopao nawana cjaida njaji inaiki?'' Njite cjeyatsa jliaji tsolrodao lria Elí icjaolre lricaité carro jlimio coanca. ¹⁵ Elí ishocadana piena noventa ocho jámolri lripekirrica naco; njite matjirra pienatsa, corritsa lritaita lricapaca ¹⁶ Jliaji tsolrodao iaco Elí isho: ''Icatsa njoa idialri iocawa wainoacalri njiteo. Opicatsa, nopitocatsa nonó carro njiteo.'' Njite Elí itatja jimioni, lriaco: ''¿Pjia nirri, coanpjena iacao?'' ¹⁷ Njite jliaji tsolrodao jiepani: ''Njaji Iraelnai, oopi napitoa filisteonai ioya. Oopi njamana matsiape. Njaji pienipe Ofni njite Finees, oopi mayamina njite nañaito pja jliaji Dio iarcani.'' ¹⁸ Elí jimicadanaco opica neñaito jliaji Dio iarcan, icaamitsa jliwacawa jliapodamshewa lriofacarroita ioya pantinoma icodapi. Pocjom lrinorro naco njite mayamican, ima pekirri pienatsan njite jamiña tsacjani ima keepe piacani. Lricaite pia Irael iacona Coarenta jamolri. ¹⁹ Njite shoaji lrirrinom, Finees iinom, rowapa piaketsa shopáa carro roenipe. Shomicadanaco njaji iacoti, nañaitoca jliaji Dio iarcan, njite shomi mayamica roñjawerri, mayami tsacja roinirri, icaamitsa rotodaca rooshipada njite icaamitsa keenipecano, ima caiwiketsa rosho. ²⁰ Roá cádanaco daimi shoaji keenipedarro, njaji inaitjepe iwapacape keenipeno, naaco rosho: ''Mafietaacatsawa, ima atsiaca jliaji iempeti pimotoetalri'' Mitsa corritsa shomica nasho. ²¹ Rocadaa roenipe iipitanao Icabod, ima caishopaca lriipitana: ''¡Oopi Diu imatsiaca iawa Irael ioya'', ima nañaito nadee jliaji Dio iarcan, mayamicapoa roñjawerri njite roinirri tsacja. ²² Njite roaco: ''¡Oopi Dio imatsiaca iawa Irael ioya'', ima nañaito nadee jliaji Dio iarcan.