¹ Nainoaca Israel icjoete njaji Filisteosnai. Njaji atsianai Israel ricoperri napitoa Filisteosnai ipjeyajle njite mayamina aji awacada Gilboa naco. ² Njite njaji Filisteosnai napinieta tsomipe jliaji Saúl njite njaji lrienipe. Njite Filisteosnai íino jliaji Jonatán, Abinadab, njite Malaquias, njaji lrienipe. ³ Cjaida nainoacaca Saúl icjote, njite nayawitani njaji iyawitacape. Jorre caiwica lrisho jliaji nayawita cawani. ⁴ Njite Saúl iaco lrisho jliaji ideeji cada lridanataaca shopa, "Pjita pimatsetan njite pitoda jolro njoa lrisho. Corri cada, nanoatsa njaji corri perri nayoa idada njite nanaitjaotsa coanctsa naomaca noapiya." Mitsa jliaji ideeji cada lridaanataca shopa corri lrinaitjacan, ima jorre lrifiocao. Caicarro Saúl jipaca lrimatsetan njite jliwaacatsa jiwa lrinaco. ⁵ Lricapa cadanaco myamica Saúl jliaji ideeji cada lridaanataca sopa, cayotsacja jliwaca lrimatsetan naco jlia njite mayamini lriinei. ⁶ Caicarro mayamica Saúl, njaji madalrida lrienipe, njite jliaji ideeji cada lridaanataca shopa; njaji atsianai cayolriji mayamicana pjiomi pacuacatsa jliada nacotsa jalredaocaca. ⁷ Njite njaji atsianai Israel ricoperri aperriji pemajle jipai pacuacaita cawa, njite njaji apeja Jordan ioya caji, nacapa cadanaco napitocao njaji atsianai Israel ricoperri, njite mayamica jliaji Saúl lrienipe iapiya, namakeeca njaji nayacalre napito carroa, njite njaji Filisteos nai nanoeca naofaa narricoda. ⁸ Njite tjeewajlena, njaji Filisteos nai nano cadanacoena njéta pjiomi naoya njaji mayamperrim, naokeeta jliaji Saúl njite njaji madalrida lrienipe mayamperri mitsa aji awacada Gilboa naco. ⁹ Nayoa jliwida njite njéta lrioya njaji lridaanataca shopa, njite nameenaca ideecape iacoti pjiomi njapaite rico njaji Filisteos nai nadee carro jliaji iacoti nasho njaji na idolon ipana njite nayacalre isho. ¹⁰ Nacadaa jliaji lridaanataca shopa aji nadiote Astarot ipana rico, njite napapi jliaji lridakim lriwai naco jliaji yacaalre Bet Sán. ¹¹ Njaji iofaacape Jabes Galaad rico njemi cadanaco coanca nanaitjaca Saúl njaji Filisteos nai, ¹² njenicoa pjiomi njaji atsianai mafiokje perritsa njite naa pada deepio njite njeta jliaji Saúl idakim njite nadakipem njaji lrienipe lriwai nacjoite jliaji Bet Sán. Neekao Jabes ricojle namjaita carro niini na. ¹³ Njite njepa njaji naapipem nadawa carrona apana jaico iapjite lripitana tamarisco aji Jabes rico, njite corri naiñja siete jalredaoca naco.