¹ Polo tanto, teñamos temor, non sexa que aínda que permanecendo na promesa de entrar no seu sosego, algún de vós pareza non te-lo acadado. ² Porque a nós anuncióusenos a boa nova, así como tamén a eles; mais a palabra que eles ouviron non lles foi de proveito por non ir acompañada pola fe dos que a ouviron. ³ Pero os que crimos, entramos nese sosego, tal como El dixo: "como xurei na miña ira: non entrarán no meu sosego", aínda que as súas obras estaban rematadas dende a fundación do mundo. ⁴ Porque así dixo nalgures no que respecta ao sétimo día: e Deus descansou no sétimo día de tódalas súas obras; ⁵ e outra vez nesta pasaxe: "non entrarán no meu sosego". ⁶ Polo tanto, xa que aínda falta que algúns entren nel, e aqueles aos que se lles anunciou antes a boa nova e non entraron por mor da súa desobediencia, ⁷ Deus determina de novo un día: "hoxe". Dicindo despois de moito tempo, por medio de David, como se tiña dito denantes: "se ouvides hoxe a súa voz, non endurezades o voso corazón." ⁸ Porque se Xosué lles tivera dado sosego, Deus non tería falado doutro día despois deste. ⁹ Polo tanto, queda un sosego sagrado para o pobo de Deus. ¹⁰ Xa que o que entrou no seu sosego, el mesmo descansou das súas obras, como Deus descansou das súas. ¹¹ Polo tanto, esforcémonos por entrar no sosego, non sexa que ninguén caia no mesmo exemplo de desobediencia. ¹² Porque a palabra de Deus é viva e eficaz, e máis cortante que calquera espada de dobre fío que penetra ata a división da alma e do espírito, das articulacións e da medula, e é poderosa para discernir os pensamentos e as intencións do corazón. ¹³ E diante da súa presenza non hai cousa creada que se lle esconda, senón que tódalas cousas están ao descuberto e espidas ante os ollos daquel a quen temos que dar contas. ¹⁴ Pois tendo un gran Sumo Sacerdote que trascendeu os ceos, Xesús, o Fillo de Deus, manteñámonos na nosa fe. ¹⁵ Porque non temos un Sumo Sacerdote que non poida compadecerse das nosas debilidades, senón un que foi tentado en todo coma nós, mais sen pecado. ¹⁶ Polo tanto, acheguémonos ao trono da graza con confianza para recibirmos misecicordia e acadar graza para a axuda oportuna.