¹ Pero tocante aos tempos e as ocasións, irmáns, non precisades que vos escriba. ² Porque vós sabedes á perfección que o día do Señor chegará como o ladrón na noite, ³ Cando estean a dicir: Paz e seguridade! entón, como a dor da que está de parto, virá sobre eles de súpeto destrución, e non fuxirán de xeito ningún. ⁴ Pero vosoutros, irmáns, non estades nas tebras para que ese día vos sorprenda como ladrón, ⁵ porque todos sodes fillos da luz e do día; non somos da noite nen das tebras. ⁶ Non adormezamos pois, coma os demais, senón sexamos vixiantes e sobrios. ⁷ Porque os que durmen, pola noite durmen, e os que se emborrachan, emborráchanse pola noite. ⁸ Nós, que somos do día, sexamos sobrios e revistámonos coa coraza da fe e o amor, e co casco da esperanza de salvación. ⁹ Porque Deus non nos destinou para ira, senón para acadar a salvación por medio do noso Señor Xesús Cristo, ¹⁰ quen morreu por nós para que, xa sexa que esteamos espertos ou durmidos, vivamos xunta El. ¹¹ Por iso, animádevos uns aos outros, e aconselládevos uns aos outros como sempre facedes. ¹² Rogámosvos, irmáns, que respetedes aos que traballan entre vós e vos coidan no Señor e vos ensinan; ¹³ que os teñades en alto e amoroso aprecio por mor dos seus traballos. Tende paz os uns cos outros. ¹⁴ Exhortámosvos tamén a que advirtades aos desordenados, que lles deades azos aos desanimados e sexades unha axuda firme para os febles, e que teñades pacencia con todos. ¹⁵ Mirade que ninguén devolva a outro mal por mal, senón procurade sempre o bo os uns para cos outros, e para con todos. ¹⁶ Alegrádevos sempre! ¹⁷ Orade constantemente, dade grazas en todo, ¹⁸ porque esta é a vontade de Deus para vós en Cristo Xesús. ¹⁹ Non apaguedes o Espírito. ²⁰ Non despreciedes as profecías, ²¹ senón examinádeo todo e quedádevos co que é bo. ²² Arredádevos de toda especie de mal. ²³ E o mesmo Deus de paz, santificaravos por completo. E que todo o voso ser: espírito, alma e corpo, sexa gardado irreprensible na vinda de Xesús Cristo, o noso Señor. ²⁴ O que vos chama é fiel, así que El tamén o ha facer . ²⁵ Irmáns, orade por nós. ²⁶ Saudade a tódolos irmáns cun bico santo. ²⁷ Pídovos diante do Señor que esta carta sexa lida a tódolos irmáns. ²⁸ A graza do noso Señor Xesús Cristo, sexa convosco.