¹ Polo demais, irmáns, pedímosvos e animámosvos no Señor Xesús, que do mesmo xeito que aprendestes de nós como cómpre andar para agradar a Deus (que de certo, así o facedes) abundedes máis e máis niso. ² Porque xa sabedes das instrucións que vos temos dado no nome do Señor Xesús. ³ Porque a vontade de Deus é a vosa santificación, que vos afastedes da fornicación, ⁴ que cada un de vós coide o seu propio corpo en santidade e honor, ⁵ sen se deixar gobernar pola paixón, coma os xentís que non coñecen a Deus, ⁶ que ninguén peque nen asoballe ao seu irmán neste asunto, porque como xa vos temos anunciado e testemuñado dun xeito solemne: o Señor vinga todas estas cousas. ⁷ Porque non nos chamou Deus a impureza, senón a santidade. ⁸ Polo tanto, o que non quere facer caso nisto, non rexeita a un ser humano, senón a Deus, quen é quen vos da o seu Espírito Santo. ⁹ Pero sobre o amor de irmáns, non precisades que vos escriba, porque vós mesmos sodes ensinados por Deus a vos amar uns aos outros, ¹⁰ cousa que en verdade facedes con todolos irmáns en toda a Macedonia, pero rogámosvos, irmáns, que o fagades máis e máis, ¹¹ e que teñades como albo o vivir sosegados, e ocuparvos nos vosos propios asuntos traballando coas vosas propias mans, conforme vos temos mandado; ¹² a fin de que andedes de xeito honesto cos de fóra, e non precisedes de nada. ¹³ Tampouco queremos, irmáns, que ignoredes sobre os mortos, para que non vos entristezades como aqueles que non teñen esperanza. ¹⁴ Porque se cremos que Xesús morreu e resucitou, do mesmo xeito Deus traerá con Xesús aos que durmiron nel. ¹⁵ Polo tanto dicímosvos isto apoiados na palabra do Señor; que nós, os que vivimos, aqueles que quedemos ata a vinda do Señor, non precederemos aos que durmiron. ¹⁶ Porque o Señor mesmo, con voz de mando, con voz de arcanxo e con trompeta de Deus, baixará do ceo e os mortos en Cristo resucitarán primeiro. ¹⁷ Despois nós, os que quedemos vivos, seremos arrebatados xunto con eles nas nubes para encontrarmos co Señor no aire, e así estaremos sempre co Señor. ¹⁸ Polo tanto, consoládevos uns aos outros con estas palabras.