¹ هاذي المرة الثالثة اللي راح نجيكم. "على فم زوز شهود و الا ثلاثة تثبت الشهادة". ² قلت قبل, و قلت كي كنت حاضر معاكم المرة الثانية, و انا اليوم غايب, نكتب للناس اللي غلطوا قبل, و للخرين الكل: اذا كان زدت جيت ثاني راني ما نشفقش. ³ مادام تطلبوا في دليل باللي المسيح هو اللي يتكلم فيّا, المسيح مش ضعيف بالصح قوي فيكم. ⁴ حتى و ان كان تصلب بالضعف تاعو على الصليب, بالصح هو حي بالقوة تاع الله. حتى احنا ضعفاء فيه, بالصح بالقوة تاع الله راح نحياو من جيهتكم. ⁵ جربوا شوفوا ارواحكم, اذا انتم في الايمان؟ جربوا ارواحكم. و الا ما تعرفوش ارواحكم, و بالي يسوع المسيح هو اللي ساكن فيكم, غير اذا كنتوا مرفوضين؟ ⁶ بالصح نتمنى تكونوا عارفين باللي احنا ماناش مرفوضين. ⁷ و ندعي الله باه ما تديروش حاجة مش مليحة, مش على جالنا احنا باه نبانو ناجحين, بالصح باه انتوما تعملوا الصلاح, و احنا نكونوا كي الموفوضين. ⁸ على خاطر ما نقدروش نديروا حاجة ضد الحق, بالصح نخدمو على جال الحق. ⁹ نفرحوا كي نكونوا احنا ضعاف و انتم اقوياء. و هاذا اللي نطلبوا من عند الله: تكونوا كاملين. ¹⁰ نكتب اكم هنا و انا غايب, باه ما نكونش صعيب معاكم و انا حاضر, بالسلطان اللي مد هولي الرب باه تتبناو مش باه تتهدموا. تحية الختام ¹¹ اخر حاجة يا خاوتي كونوا فرحانين. كونوا كاملين. كونوا متشجعين. اهتموا اهتمام واحد. عيشوا بالسلام, و الاله تاع السلام و لمحبة يكون معاكم. ¹² سلموا على بعضاكم ببوسة مقدسة. ¹³ جميع القديسين يسلموا عليكم. ¹⁴ النعمة تاع ربنا يسوع المسيح, و لمحبة تاع الله, و الشركة تاع الروح القدس تكون معاكم الكل. امين.