¹ ما يليقش بيّا نفخر. نهدر ضرك على لمنامات اللي عطاهالي الرب و الاعلانات تاعو. ² نعرف واحد الراجل مومن بالمسيح قبل ربعطاش ن سنة. طلع للسماء الثالثة. كان بالبدن؟ ما نعرف, كان من غير بدن؟ ما نعرف. الله هو اللي يعلم. ³ و نعرف هاذا الراجل ـ كان في لبدن و الا خرج من لبدن تاعو؟ ما نعرف. الله هو اللي يعلم ـ ⁴ انو الله طلعو للفردوس, و سمع كلام ما يقدر حتى بشر ينطق بيه, و ما يجوزش لحتى واحد يتكلم بيه. ⁵ من هاذي الجيهة نفخر. بالصح من جيهة نفسي ما نفخر غير بالضعفات تاعي. ⁶ حتى كان حبيت نفخر ما نكونش جاهل, على خاطر نقول في الحق. بالصح ما نحبش نهدر عليه باه واحد ما يظن فيّا حاجة اكثر من الشيء اللي يشوفو و يسمعو مني. ⁷ و حتى باه ما نتنفخش و نتكبر من الجاه تاع الشيء اللي شفتو, صابتني شوكة في البدن تاعي, تقول عليها رسول من عند الشيطان يضربني باه ما نتكبرش. ⁸ و صليت لله ثلاثة مرات باه يرفعها عليّا. ⁹ قالي: "نعمتي تكفيك, في ضعفك تظهر قوتي كاملة فيك". مالا انا نفخر راضي فرحان بالضعف تاعي, حتى تضللني القوة تاع المسيح. ¹⁰ على هاذيك انا نفرح بالضعفات و الاهانات و الضيقات و الاضطهادات و الصعوبات على جال المسيح. على خاطر في الوقت اللي نكون فيه ضعيف انا قاوي. العلامات تاع الرسول ¹¹ وليت كي الجاهل, و انتوما اللي حتمتوا عليّا! كان من المفروض انتوما اللي تشكروني, على خاطر ما ينقصني حتى شيء على الرسل لخرين, رغم اللي ما نسوى شيء. ¹² العلامات تاع الرسول بينتها في وسطكم بالصبر, و بالايات و العجايب و المعجزات. ¹³ وش الحاجة اللي خصتكم على بقية الكنايس, كي ما ثقلتش عليكم؟ سامحوني هنا ظلمتكم! ¹⁴ انا مستعد باه نزيد نجي عندكم هاذي ثالث مرة و ما نثقلش عليكم. على خاطر انا نحوس عليكم انتم ما نحوسش على مالكم. مش لولاد اللي يخبيو لوالديهم, بالصح الوالدين هما اللي يذخروا لولادهم. ¹⁵ اما انا نمد لكم كل اللي عندي و انا راضي فرحان, تجي منها على قد ما تكثر محبتي ليكم تنقص محبتكم انتوما لياّ! ¹⁶ نعم. انا ما ثقلتش عليكم, بالصح هل كنت حيلي معاكم و مكّار! ¹⁷ هل طمعت فيكم وحكمت من عندكم حاجة مع الناس اللي بعثهتم؟ ¹⁸ طلبت من تيطس و بعث معاه هاذاك الاخ. طمع فيكم تيطس؟ ياخي مشينا بروح واحد؟ و طريق واحدة بالذات؟ ¹⁹ و الا حاسبين نلوموا عليكم؟ قدام الله في المسيح نهدروا. بالصح كل شيء يا لحباب باه انتم تتبناو. ²⁰ على خاطر نخاف لا نجيكم و ما نلقاكمش كيما تمنيت, و انتم ما تلقاونيش كيما تمنيتو. نخاف يكون بيناتكم خصام و حسد و سخط و انقسام و مذمة و نميمة و تكبر و تشويش. ²¹ نخاف كي نجي مرة اخرى بيناتكم يذلني الله عندكم, و نبكي على ياسر منكم اللي غلطوا من قبل و ما تابوش على النجاسة و على الزنا و الدعارة اللي داروها.