¹ شوفوا واش من محبة اعطاهالنا الآب حتى ولينا نسماو ولاد الله! و على هاذا الشيء العالم ما يستعرفش بينا, على خاطر ما يستعرفش بيه هو. ² يا لحباب, احنا اليوم رانا اولاد الله, و مازال ماهوش باين واش راح نكونوا. بالصح نعلموا باللي كي يظهر هو راح نوليو كيما هو, على خاطر راح نشوفوه كيما راه. ³ و كل اللي عندو هاذا الامل فيه, لازم يطّهر روحو كيما هو طاهر. ⁴ كل من يعمل المعصية يسمى تعدى ثاني. و المعصية هي التعدي. ⁵ و تعرفوا باللي المسيح ظهر باه يرفع علينا ذنوبنا, و هو اللي بلا ذنوب. ⁶ كل من يثبت فيه ما يعملش المعصية. و كل من يعمل المعصية لا شافو و لا عرفو. ⁷ يا اولادي, واحد ما يغلطكم: اللي يدير الخير هو بار, كيما المسيح بار. ⁸ و كل من يعمل المعصية هاذاك راه من ابليس, على خاطر ابليس من لول يعمل المعصية. و على جال هاذا الشيء ظهر ابن الله باه يهَدم فعايل ابليس. ⁹ و كل الي مولود من الله ما يديرش المعصية, على خاطر الزرع تاع الله ثابت فيه, و ما يقدرش يعصي الله على خاطر هو مولود من الله. ¹⁰ وبهاذا الشيء اولاد الله باينين و اولاد ابليس باينين: كل واحد ما يديرش الخير ماهوش من عند الله, و حتى اللي ما يحبش خوه ما هوش من عند الله. حبوا بعضاكم ¹¹ على خاطر هاذا هو لخبر اللي سمعتوه من لول: نحبوا بعضانا. ¹² مش كيما كان قايين من الشرير و ذبح خوه. و علاه ذبحو؟ على خاطر كانت فعايلو شريرة و فعايل خوه كانت صالحة. ¹³ ما تجيكمش حاجة غريبة كان كرَهكم العالم. ¹⁴ على بالنا باللي احنا عدينا من الموت للحياة, على خاطر نحبوا الخاوة. و جميع اللي ما يحبش يبقى في الموت. ¹⁵ و كل من يكره خوه يسمى قتال ارواح, و انتم تعرفوا باللي قتال لرواح ما عندوش حياة دايمة ثابتة فيه. ¹⁶ و هاذا هو الشيء اللي بيه عرفنا لمحبة: كي ضحّى المسيح على جالنا بنفسو, احنا لازم علينا نضَحيوْ بانفسنا على جال الخاوة. ¹⁷ و كان واحد لاباس عليه و يتنعم في الخيرات, و شاف خوه محتاج, و ما حنّش عليه, كيفاه لمحبة تاع الله راح تثبت فيه؟ ¹⁸ يا اولادي, ما تكونش لمحبة تاعنا غير هدرة برك باللسان, خليوْها بالفعال و بالحق! ¹⁹ و بهاذا الشيء نعرفوا باللي احنا من الحق و تتطمان قلوبنا قدام الله. ²⁰ على خاطر كان لامتنا قلوبنا الله اعظم من قلوبنا, ويعلم كلشيء. ²¹ يا لحباب, و كان ما لامتناش قلوبنا, تولى عندنا ثقة من جيهة الله. ²² و مهما طلبنا ننالوا منو, على خاطر نعملوا بالوصايا تاعو, ونعملوا الشيء اللي يرضى عليه. ²³ وهاذي هي الوصية تاعو: نامنوا باسم وليدو يسوع المسيح, و نحبوا بعضانا كيما وصانا. ²⁴ و اللي يخدم بالوصايا تاعو هو يثبت في الله و الله يثبت فيه. و نعرفوا باللي الله ثابت فينا: من الروح تاعو اللي مد هولنا.