¹ ومن جيهة المواهب الروحية يا خاوتي ما دابيا ما يخفاش عليكم. ² علابالكم بلي قبل كنتوا من الامم تمشيو وراء الاصنام الي ما تهدرش, كيما كنتوا تتبعوا. ³ على هاذيك نخبركم بلي ما كانش واحد و هو يتكلم بالروح تاع الله يقول: " يسوع اناثيما". و ماكانش واحد يقدر يقول: " يسوع رب" غير بالروح القدس. ⁴ كاين انواع تاع المواهب, بالصح الروح واحد. ⁵ و كاين انواع تاع خدمات, بالصح الرب واحد. ⁶ و كاين انواع تاع اعمال, بالصح الله واحد, و هو اللي يعمل الكل في الكل. ⁷ و بالصح لكل واحد يمدلو كيفاه يظهر فيه الروح على جال المنفعة. ⁸ يمد لواحد كلام تاع الحكمة بالروح, و يمد لواحد اخر كلام تاع العلم حساب الروح الواحد. ⁹ و لواحد اخر يمد الايمان بالروح الواحد, و لاخر مواهب تاع الشفاء بالروح الواحد, ¹⁰ و لواحد اخر يمدلو يدير المعجزات. و اخر نبوءة, و واحد اخر يمدلو كيفاه يميز الارواح, و اخر انواع تاع لغات, و واحد يمدلو الترجمة تاع اللغات. ¹¹ بالصح هاذي كلها يعملها الروح الواحد بذاتو, كيما يحب. جسم واحد و اعضاء ياسر ¹² على خاطر كيما الجسم هو واحد بالصح عندو اعضاء ياسر, و الاعضاء تاع الجسم الواحد حتى لو كانت ياسر هي جسم واحد, هكذاك المسيح ثاني. ¹³ على خاطر كلنا بروح واحد تعمدنا كلنا لجسم واحد, يهود و الا يونانيين, عبيد و الا احرار, كلنا شربنا روح واحد. ¹⁴ و حتى الجسم ثاني ماهوش عضو واحد بالصح هو اعضاء ياسر. ¹⁵ و اذا كان الرجل قالت: "على خاطر مانيش يد, مالا انا مانيش من الجسد". مالا هكذا تقدر ما تكونش من الجسد؟ ¹⁶ و اذا الوذن قالت: "على خاطر مانيش عين, ما نيش من الجسد" مالا هكذا تقدر ما تكونش من الجسد؟ ¹⁷ لو كان جاء الجسم كامل عين, وينو السمع؟ و لو كان جاء الكل سمع, وينو الشم؟ ¹⁸ بالصح الله حط الاعضاء في الجسم كل واحد منها كيما حب. ¹⁹ بالصح لو كان تكون كلها عضو واحد, وينو الجسم؟ ²⁰ على هذا كاين اعضاء ياسر بالصح الجسم واحد. ²¹ ما تقدرش العين تقول لليد: "انا ما نحتاجش ليك!". و الا الراس يقول للرجلين: "انا ما نحتاجكمش!". ²² و زيد الاعضاء تاع الجسم اللي تبان هي الضعيفة هي اللي ضرورية. ²³ و الاعضاء تاع الجسم اللي نحسبوها ما عندها حتى قيمة هي اللي نمدولها قيمة اكبر. و الاعضاء اللي ما هيش مليحة فينا عندها جمال احسن. ²⁴ و هاذيك اللي مليحة ما نحتاجوش ليها. بالصح الله خلط الجسم, و الناقص هو اللي اعطاه قيمة خير على الاخرين. ²⁵ باه ما يكونش انقسام في الجسم, بالصح كل الاعضاء يكون عندها اهتمام واحد مع بعضاها. ²⁶ و اذا كان واحد يتألم كل الاعضاء تتألم معاه. و اذا كان عضو واحد يزيد شانو كل الاعضاء تفرح معاه. ²⁷ بالصح انتوما راكم الجسد تاع المسيح و الاعضاء تاعو بالواحد. ²⁸ ربي حط ناس في الكنيسية: في لول, الرسل, ومن بعدهم لنبياء, و من بعدهم المعلمين, و من بعدها تاع المعجزات, و بعدهم تاع مواهب الشفاء, و خدام, و مدبرين, و انواع تاع لغات. ²⁹ يا ترى كلهم رسل؟ يا ترى كلهم انبياء؟ يا ترى كلهم معلمين؟ يا ترى كلهم يعملوا المعجزات؟ ³⁰ يا ترى كلهم عندهم المواهب تاع الشفاء؟ يا ترى كلهم يتكلموا بلغات؟ يا ترى كلهم يترجموا؟ ³¹ بالصح مليح تجتهدوا في المواهب. و نزيد نوريلكم طريق ما خير.