Pengenyet Sembazang Sen Paulus ¹ Ho'o 'e, cenganak-cenganak, sembazang ne maha amie, bi'i kelai Tuhan tai ve'gei ngen nyangkit ngen du fempou de kue ba'en de' tenozen ta'eng eham de, ² ngen bi'i mie lepo ta helonen-helonen de' fa'den ngen ja'et jo ento ru mong un fengelen. Jo fe, Tuhan Allah je' temek. ³ Zo he kemoet ngen ngelidong eham te de' ja'et. ⁴ Amie un tempelum dalam Tuhan ta eham jo eno tene kam ti'e ngen fenco ti'e inu de' mie cok. ⁵ Inu baliu 'e Tuhan Allah maha zo hemet cam fala kelesou Tuhan Allah ngen fala falet tavai Kristus. De' Le Ti Dalem Ja'gen ⁶ Cenganak-cenganak, nihi mie cok eham, dalem nga'den Tuhan ilu, Yesus Kristus, bi'i kam ngecue eham ta cenganak-cenganak de' mu'dip kelo ngen ta'un pehesiu ngen katok de' kam ala sen amie'. ⁷ Eham tengen tesen mehumpin cam ngatap amie jo amie ta'un helo-helo tasa mie femong ngen cam de. ⁸ Amie co ta'un omen fengomen du de' cu de' mie ta'un bazen. Feheselihut ta de, amie ngenait ngen feza'gen len len bok netou ngen bok mau bi'i mie ta'un ozen empin maha le fe ta'eng eham. ⁹ Ento 'e ho'en mie ta'un tolet ta de' mehe, jo bi'i mie ozen hata meham avan'e kam baze' e. ¹⁰ Dalou mie ngen eham de' co, amie cok eham mihi: "Bue ru ta'un ko'be' feza'gen, enteng ne omen." ¹¹ Jo, mie ngene'en eno de' ta'eng eham de' mu'dip bang kelo le, ta'un ko'be feza'gen, jo bang talu tavai ngen je' ta'un un afane. ¹² Kelonen de' mehe mie cok ngen mie fahatok dalem nga'den Tuhan Yesus bi'i feza'gen ngen selem ngen omen o'ben ja'gen e do tengen. ¹³ Bue eham, cenganak-cenganak kie', enteng ne tai nelet ozen te'a. ¹⁴ Bue e un ne kelonen de' ta'un baze' inu de' mie kun dalem soret mie di, nerane' ne'o ngen enteng ne feralou ngen du bi'i do tai sa'e. ¹⁵ Jo, enteng ne kue' disie' du ta azou re ta zo, pahatok ne kue ba'en co cenganak le. Dau Hempaza e ¹⁶ Tuhan fenyaie' ngen fene'a le baliu 'e nei fenyaie' sengket le ngen dalem mong femozen. Tuhan ngen eham mong. ¹⁷ Ahie, Paulus, nyoret tenganie' zi men u'jue' kie tengen co teva'da 'e atek len soret cie le, mehe ne kie' nyorat'e. ¹⁸ Kempoang sen Tuhan Allah le, Yesus Kristus, mozang eham mong.