¹ Тай като путергяс о седмо печати, ачило мълчание ко небес около екваш сахати. ² Тай диклом, кай е ефта ангеленге, колато бешен англал о Дел, дине пес ефта тръбес. ³ Тай авер ангели ало, тай зачило ко олтари, икерелас златно кадилница; тай леске диняс пес бут тамяни, за те прибавинел лес карик о молитвес саворе светиенгере упрал о златно олтари, ковато сине англал о престоли. ⁴ Тай о кадилно тув ваздисало англал о Дел таро вас е ангелеске заедно е молитвенца е светиенгере. ⁵ Тай о ангели лилас и кадилница, пергяс ла ягаса таро олтари тай чикяс и яг ки пув; тай ачиле гърмежия тай гласовя, светкавицес тай труси. ⁶ Тай о ефта ангела, колато икеренас о ефта тръбес, приготвисале те затърбинен. ⁷ Като затръбингяс о първо ангели, пели градушка тай яг, ехмиме ратеса,колато уле чивте ки пув; тай иек трето тари пув табили, също иек трето таро каща табиле, табили всеко зелено чар. ⁸ Тай като затръбингяс о второ ангели, варесо сар бари планина, пламниме анди яг, чивгяс пес андо морес; тай иек трето таро морес ачило ратесте, ⁹ тай муле иек трето част таро одушевена същества, колато уле андо морес; тай иек трето таро корабия уле унищожиме. ¹⁰ Тай като затръбингяс о трето ангели, пели таро небес бари звезда, която таблолас сар факели, тай пели упрал и иек трето ления тай упрал о водна извория. ¹¹ А о алав е звездакоро си Пелин; тай иек трето таро паня ачило пелини, тай бут мануша муле таро паня, соскето вгорчисале. ¹² Тай като затръбингяс о четвърто ангели, иек трето таро кам тай иек трето тари луна, тай иек трето таро звезди, уле поразиме, тай те потъмнинел иек трето лендар, тай иек трето таро диес тена светинел, чука иек трето тари ират. ¹³ Тай диклом, тай шунгиом иеке орелес*, ковато урялас машкар о небес тай пенелас високоне гласоса: Горко, горко, горко е пувякере жителенге ашал окола тръбна гласовя таро трин ангела, колато още иси те затръбинен!