¹ Тай диклом, като о Бакро путергияс иек таро ефта печая, тай шунгиом иек таро штар живде същества те пенел гласоса сар гръми: Ела тай дик! ² Тай диклом, так аке парно грас; тай о яздещо лесте сине лес лъки; тай диняс пес леске венеци, тай ов иклило сар победители, за те побединел. ³ Тай като путергяс о второ печати, шунгиом о второ живдо същество те пенел: Ела тай дик! ⁴ Тай иклило авер грас, огнено лоло; тай е яздещонеске лесте диняс пес те отнеминел о мири тари пув, тай о мануша те мударен пес иек аверес; тай диняс пес леске баро мечи. ⁵ Тай като путергяс о трето печати, шунгиом о трето живдо същество те пенел: Ела тай дик! Тай диклом, тай аке кало грас, тай о яздещо лесте сине лес теглилка андо вас леске. ⁶ Тай шунгиом варесо сар гласос машкар о штар живде същества, ковато пенелас: Иек хиникси пшеница за динариеске, тай трин хиниксия ечемики динариескел; а о кащуно масло тай и мол ма повредине. ⁷ Тай като путергяс о четвърто печати, шунгиом о гласос е четвъртоне живде съществоскоро, ковато пенелас: Ела тай дик! ⁸ Тай диклом, тай аке пепелявосиво грас, тай о алав е яздещонескоро алав сине Мериба, тай о Ади пирелас палал лесте; тай диняс пес ленге власт упрал и четвърто част тари пув те мударен мечиеса, бокаса, мориеса, тай е земноне зверовиенца. ⁹ Тай като путергяс о пето печати, диклом телал о олтари о души колкенгере, колато уле заклана е Божие словоске тай за о свидетелство, ковато опазингиом. ¹⁰ Тай он пищиненас високоне гласоса, като пененас: Жи кана Господарю Свято тай Истинно, нанай те съдинес тай те въздес и живеещоненге ки пув за амаре ратеске? ¹¹ Тай секаске лендар диняс пес по иек парно шехи тай пенгяс пес ленге те почивинен песке още хари времес, жи кай допълнингиол о брои ленгере съслужителенгоро тай о прала ленгере, колато ка овенас мударде сар ленде. ¹² Тай диклом, като путергяс о шесто печати, кай ачило баро труси: о кам калило сар вретище тари козина, тай и цело луна ачили сар рат; ¹³ о небесна звезди пеле ки пув, сарто и смокиния разлюлиме силноне балвалатар, метнинел пе незрелоне смокиниен. ¹⁴ о небес цидисало тай нависало сар свитъки; тай саворе планини тай островия ваздисале пе танестар. ¹⁵ Тай о земна тагара, о големци тай о хилядникия, о барвале тай о силна, всеко роби тай свободно гаравде пес андо пещери тай машкар о скалес е планинакере; ¹⁶ тай пенен е планиненге тай е скаленге: Перен упрал аменде тай гаравен амен таро муи е Бешлеске ко престоли тай таро гневи е Бакреске; ¹⁷ соскето ало о велико диес Ленгере* гневиескоро; гай кой ащи устоинел?