¹ Палал далкесте о ангели сикагяс манге река паниеса е животоскоро, бистро сар кристали, която извиринелас таро престоли е Девлеске тай е Бакреске. ² Тай ко машкар ки улица леске, тай таро дуи рига е рекаке, сине каш е животоскоро, ковато биянелас плоди дешудуи дрома, като делас плоди секо масек; тай о шумес е кащескере уле за изцеление е народоске. ³ Нищо проклето нанай те овел вече; тай о престоли е Девлескоро тай е Бакрескоро ка овел андо градос, тай Лескере слуги ка служинен Леске. ⁴ Он ка дикен Лескоро муи; тай Лескоро алав ка овел ко чеката ленге. ⁵ Ират нанай те овел вече; тай нанй те овел лен нужда светлинатар таро светилос или таре камескири светлина, Соскето о Дел осветинел лен. Тай он ка царувинен жи ко вечна вековя. ⁶ Тай пенгяс манге: Калка думес си верна тай истинна; тай о Дел, Дел е духовиенгоро е пророкиенгере, бичалгяс Пе ангелес те покажинел Лескере слугенге давка, ковато требе сиго те ачол. ⁷ Тай аке, авав сиго. Блажено, ковато пазинел о думес е пророчествоске калке книгакоро. ⁸ Ме о Йоан синиом, ковато шунгиом тай диклом давка. Тай като шунгиом тай диклом, пелом те поклонинаман англал о пире е ангелескере, ковато покажингясас манге давка. ⁹ Но ов пенгяс манге: Ма! Ме синиом съслужители торо тай те праленге о пророкия, тай калкенге, колато пазинен о думес калке книгакере. Поклонине тут е Девлеске. ¹⁰ Още пенгяс манге: Ма запечатине о думес е пророчествоскере калке книгакоро; соскето о времес лескере изпълнимнаскоро си паше. ¹¹ Ковато керел неправда, нека керел за нангледа неправда; тай ковато си нечисто, нека овел за нангледа нечисто; тай о праведно нека керел за нангледа правда, тай о свято нека овел за нангледа свято. ¹² Аке, авав сиго; тай Манца си Мери награда, за те отплатинав секаске според ленгере деловя. ¹³ Ме синиом Алфа тай Омега, о Първо тай о Последно, Началос тай Крайос. ¹⁴ Блажена, колато изтовен пе шехя*, за те овел лен право те хан таро каш е животоске, тай те ден презал о портес андо градос. ¹⁵ А аври си о безнравствена*, чародейция, о блудницес, о убийция, о идолопоклоникия, тай секой, ковато дехел о хохаиба тай хохавел. ¹⁶ Ме, о Исус, бичалгиом Ме ангелес те засвидетелствинел туменге давка е кангериенге. Ме синиом о корени тай о потомъки Давидово, и светло утринно звезда. ¹⁷ Тай о Духос, тай и невяста пенен: Ела! Тай който шунел, нека пенел: Ела! Тай ковато си жадно, нека авел.Ковато мангел, нека лел даром о пани е животоскоро. ¹⁸ Ме заявинав секаске, колато шунен о думес е пророчествоскере анде калке книгате: Ако декой прибавинел варесо карик ленде, о Дел ка прибавинел упрал лесте о язвес, пишиме калке книгате, ¹⁹ тай ако декой отнеминел таро думес калке пророческоне книгакере, о Дел ка отнеминел леске деловя тари книга е животоскири тай таро свято градос, колато си опишиме калке книгате. ²⁰ Ковка, Ковато заявинел давка, пенел: Ва, авав сиго. Амин! Ела, Господи Исусе! ²¹ И благодат е Девлескири о Исуса Христа те овел е светиенца. Амин.