¹ Андо ковка време о четверовластники Ирод шунгяс о слухи, ковато пиравелас пес е Исусеске; ² тай пенгяс пе слугенге: Давка си о Йоан Кръстител - ов възкръснингяс таро муле тай далкеске калка силес действинен чрез лесте. ³ Соскето о Ирод долгясас Йоан тай вържингяс лес тай панлас лес анди тъмница ашал и Иродиада, и ромни лескере пралескири о Филип; ⁴ понеже о Йоан пенелас леске: Нанай туке позволиме те лес ла. ⁵ Тай мангелас те мударел лес, ама даралас таро народос, соскето мислиненас лес за пророк. ⁶ А като ало о рожден ден на Ирод, и Иродиадиново чаи келгяс англал о кидиме тай угодингяс е Иродиеске. ⁷ Затова ов совеласа обещингяс лаке те дел, ла со да те мангел леске. ⁸ А ой, сикавди пе даятар, пенгяс: Де ман ате на блюдо о шеро на Йоан Кръстител. ⁹ О цари наскърбисало; но ашал е совеленге тай ашал е бешленге леса заповедингяс те дел пес лаке. ¹⁰ Тай бичалгяс те обезглавинен е Йоанес анди тъмница. ¹¹ Тай анде лескоро шеро на блюдо тай дине лес е чаяке, а ой ингалгяс лес пе даяке. ¹² А лескере ученикя, като але, ваздинде о телос тай паронде лес; тай геле тай пенде е Исусеске. ¹³ Тай Исус, като шунгяс давка, цидисало отар е ладияса уединеноне танесте коркоро; а о народос, като ахалило, гело палал Лесте пеша таро градове. ¹⁴ Тай Ов като иклило, дикляс баро множество, смилисало упрал ленде тай изцелингяс ленгере насвален. ¹⁵ А като ратило, о ученикя але паш Лесте тай пенде: О тан си уединено тай о времес напреднингяс: мук е народос те жан ко гава те кинен песке хабе. ¹⁶ А Исус пенгяс ленге: Нанай нужда те жан; ден лен туме те хан. ¹⁷ А он пенде Леске: Иси амен ате само панч маре тай дуи маче . ¹⁸ А Ов пенгяс: Анен лен ате паш Манде. ¹⁹ Тогава, като заповедингяс е народоске те бешен ки чар, лилас о панч маре тай о дуи маче, дикляс карик о небес тай благословингяс; тай като пагляс о маре, диняс лен е ученикиенге, а о ученикя - е народоске ²⁰ Тай саворе хале тай чаларде пес; тай ваздинде окола къшея -дванадесет перда кошя. ²¹ А колка, кате хале, сине панч хилада рома освен ромня тай чаве. ²² Тай ко сахати Исус традингяс е ученикиен те ден анди ладия тай те жан англал Лесте ки отвъдно рик, жи кай мукел е народос. ²³ Тай като муклас е народос, качисало ки планина те молинел Пес коркоресте. Тай като ратило, Ов сине оте коркоро. ²⁴ А и ладия сине вече машкар о езерос, бутиме таро вълни, соскето и балвал сине насрещно. ²⁵ А ки четвърто стража машкаират Ов ало карик ленде, като пирелас упрал о езерос. ²⁶ Тай о ученикя, като дикле Лес кай пирел упрал о езерос, смутисале тай пенде, кай си призраки, тай даратар пищинде. ²⁷ А Исус веднага захоратингяс ленге тай пенгяс: Дерзайнен! Ме синиом; ма даран! ²⁸ Тай О Петър пенгяс леске: Девла, ако синян Ту, пен манге те авав паш Туте упрал о пани. ²⁹ А Ов пенгяс: Ела! Тай Петър ухлило тари ладия тай гело упрал о пани, те жал ко Исус. ³⁰ Ама, като дикляс и балвал силно, даранило тай като потънинелас, пищингяс, тай пенгяс: Девла, избавине ман! ³¹ Тай о Исус веднага протегнингяс по вас, долгяс лес тай пенгяс леске: Маловерецо, соске усъмнисалян? ³² Тай като дине анди ладия, и балвал утихнингяс. ³³ А колка, кате сине анди ладия, поклонисале Леске тай пенде: Наистина, Ту синян Девлескоро Чаво. ³⁴ Тай като накле о езерос, але анди Генисаретско пув. ³⁵ Тай като пенджарде Лес отар о мруша, бичалде ки цело окоя околност тай анде паш Лесте саворе насвален; ³⁶ тай молиненас Лес те допиринен пес жи ки пола Лескере шехиенде; тай кити допиринде пес, изцелинде пес.