¹ А наближинелас о Празники е безквасноне маренгоро, ковато наречинел пес Пасха. ² Тай о главна свещеникия тай о книжникия обмислиненас сар те мударен Лес; соскето даранас таро люде. ³ Тогава диняс о Сатана андо Юда, наречиме Искариот, ковато сине таро число е дешудонге; ⁴ тай ов гело тай хоратингяс е главноне свещеникиенца тай е началникиенца е стражакере сар те предел Лес ленге. ⁵ Тай он лошанде, тай обещинде те ден лес парес. ⁶ Тай ов съгласисало, тай роделас сгодно случай те предел Лес ленге, ма англал о множество. ⁷ Тай ачло о диес е безквасноне маренгоро, като требеше те жертвинел пес и пасха. ⁸ Тай о Исус бичалгяс е Петрес тай е Йоанес, тай пенгяс: Жан тай приготвинен аменге, за те хас и пасха. ⁹ А он пенде Леске: Кате мангес те приготвинас? ¹⁰ А Ов пенгяс ленге: Аке, като ден андо градос, ка ресел тумен мануш, ковато пиравел стомна паниеса; жан палал лесте андо кер, анде колесте дел, ¹¹ тай пенен е стопаниеске е керескоро: О Учители пенел туке: Кате си е гостиенгири стая, анде колате ка хав и пасха Ме ученикиенца? ¹² Тай ов ка посочинел туменге бари упруни стая, бухларди; оте приготвинен. ¹³ Тай като геле, аракле сарто пенгясас ленге; тай приготвинде и пасха. ¹⁴ Тай като ало о сахати, Ов бешло ки софра, тай о апостола Леса. ¹⁵ Тай пенгяс ленге: Твърде бут мангльом те хав кайка пасха туменца, англал те страдинав; ¹⁶ соскето пенав туменге, кай нанай вече те хав ла, жи кай ой нана изпълнингиол андо Божие тагарипе. ¹⁷ Тай като приемингяс чаша, благодарингяс тай пенгяс: Лен кавка тай разделинен лес машкар туменде; ¹⁸ соскето пенав туменге, кай нанай вече те пияв таро плоди е лозаке, жи кай нана авел о Божие тагарипе. ¹⁹ Тай лилас маро, тай като благодарингяс, паглас лес, диняс лен, тай пенгяс: Кавка си Моро телос, ковато туменге дел пес; кавка керен за Мере възпомениеске. ²⁰ Чука лилас и чаша палал и вечеря, тай пенгяс: Кайка чаша си о нево завети анде Мере ратесте, ковато за туменге проливинел пес. ²¹ Но аке, о вас калкескоро, ковато предел Ман, си Манца ки софра. ²² Соскето о Човешко Чаво наистина жал, според сарто уло определиме; но горко калке манушеске, чрез колесте предел пес! ²³ Тай он почнинде те пучен пес машкар песте кова ли лендар ка овел кавка, ковато ка керел давка. ²⁴ Ачили още препирня машкар ленде кова лендар считинел пес за по-баро. ²⁵ А Ов пенгяс ленге: О тагара е народоскере господарувинен упрал ленде тай калка, колато владеинен лен, наречинен пес благодетеля. ²⁶ Но туме ма чука; а о по-баро машкар туменде нека ачол сар о по-цикно, тай ковато началствувинел - сар колкесте, ковато слугувинел. ²⁷ Соскето кова си по-баро: ковка, ковато бешел ки софра ли, или ковка, ковато слугувинел? Нанай ли ковка, ковато бешел ки софра? Но Ме синьом машкар туменде, сар колкесте, ковато слугувинел. ²⁸ А туме синиен колка, колато устоингиен Манца анде Мере изпитаниенде. ²⁹ Далкеске, сарто Моро Отеци завещингяс тагарипе Манге, Меда завещинав туменге ³⁰ те хан тай те пиен Ме софрате анде Мере тагарипнасте; тай ка бешен престоленде те съдинен о дешудуи Израилева племена. ³¹ Тай пенгяс о Дел : Симоне, Симоне, аке, о Сатана изискинел тумен саворен, за те пресеинел тумен сар житос; ³² но Ме молисалом туке, тена отслабнинел тери вяра; тай ту, като иринес тут, утвърдине те прален. ³³ О Петър пенгяс Леске: Господи, готово синьом те жав Туса анди тъмницада, мерибнастеда. ³⁴ А Ов пенгяс: Пенав туке, Петре, о петели нанай те загилабел авдиес, жи кай нана отречисалан трин дром, кай пенджарес Ман. ³⁵ Тай пенгяс ленге: Като бичалгиом тумен би кесиякоро, би торбакоро тай би потиниенгоро, ачилен ли лишиме варесостар? А он пенде: Нисостар. ³⁶ Тай пенгяс ленге: Но акана, кас иси кесия, нека те лел ла, също торбада; тай кас нанай кесия, нека бикнел пе шехя тай те кинел песке чури; ³⁷ соскето пенав туменге, кай требе те изпълнинел пес упрал Манде давка писание: " Тай карик о беззаконикия уло причислиме", соскето о пишиме за Манге наближинел карик пере изпълнимнасте. ³⁸ Тай он пенде: Господи, аке ате иси дуи чуря. А Ов пенгяс ленге: Достатъчна си. ³⁹ Тай иклило те жал Пе обичаиесте ко Елеонско хълми; палал Лесте геле о ученикияда. ⁴⁰ Тай като араклило ко тан, пенгяс ленге: Молинен тумен тена перен адно изкушение. ⁴¹ Тай Ов отделисало лендар, кити иек чивдо бар, тай като коленичингяс, молинелас пес, тай пенел: ⁴² Отче, ако мангес, отнак Ман калке чашаса; обаче ма Мери воля, но Тери те овел. ⁴³ Тай явисало Леске ангели таро небес, тай подкрепинелас Лес. ⁴⁴ Тай като изпитвинелас мъка, молинелас пес по-усърдно; тай Лескоро поти ачило сар баре капкес рат, колао капиненас ки пув*. ⁴⁵ Тай като ухтинило тари молитва, ало ко ученикия тай араклас лен засуте тари скръб; тай пенгяс ленге: ⁴⁶ Соске совен? Ухкиен тай молинен тумен, за тена перен андо изкушение. ⁴⁷ Жи кай още хоратинелас, аке иек множество; тай кавка, ковато наречинелас пес Юда, иек таро дешудуи, пирелас англал ленде; тай приближисало жи ко Исус, за те чумидел Лес. ⁴⁸ А о Исус пенгяс леске: Юдо, целувкаса ли предес е Човешконе Чавес? ⁴⁹ Тай калка, колато сине около о Исус, като дикле со ка ачолас, пенде: Господи, те чалавас ли чуряса? ⁵⁰ Тай иек лендар чалагяс е първосвещеникиескере слугас тай чингяс лескоро десно кан. ⁵¹ А о Исус захоратингяс, тай пенгяс: Стига дики; тай допирисало жи ко кан леске, тай изцелингяс лес. ⁵² Тай о Исус пенгяс калкенге кате але против Лесте о главна свещеникия, началникия е храмиескере стражаке тай старейшинес: Сар мамуял разбойникиесте ли иклилен мечовиенца тай сопиенца? ⁵³ Като улом секо диес туменца андо храми, нана прострингиен васта против Манде. Но акана си тумаро сахати тай о властване е тъмнинаке. ⁵⁴ Тай като долде Лес, ингалде Лес, тай денгярде Лес андо кер е първосвещеникиеске. А о Петър следвинелас дурал. ⁵⁵ Тай като тарде яг машкар ко дворос тай бешлесас около лате, ов о Петрес да бешло машкар ленде. ⁵⁶ Тай иек слугиния, като диклас лес бешло жи ко пламъки, задиклас пес анде лесте тай пенгяс: Кавкада сине Леса. ⁵⁷ А ов отречисало, тай пенгяс: Жено, нана пенджарав Лес. ⁵⁸ След хари авер диклас лес тай пенгяс: Туда синян лендар. Но о Петър пенгяс: Човече, нана синиом. ⁵⁹ Тай като накло пес около иек сахати, авер декой настоятелно пенелас: Наистина кавкада сине Леса, соскето си галилеяни. ⁶⁰ А о Петър пенгяс: Човече, нажанав со пенес. Тай ко сахати, жи кай още хоратинелас, иек петели загилябингяс. ⁶¹ Тай о Де ирисало, тай диклас е Петрес. Тай о Петрес диняс пес годи о думес е Девлескере, сар пенгясас леске: Англал те загилябел о петели авдиес, ту трин дром ка отречинес тут Мандар. ⁶² Тай иклило аври, тай руно горко. ⁶³ Тай о мруша, колато икеренас е Исусес, ругаиненас Лес тай маренас Лес, ⁶⁴ тай като закривиненас Лес ( чалавенас Лес ко муи, тай ) пученас Лес, тай пенен: Ахалов, кой чалагяс Тут. ⁶⁵ Тай бут авер хулес хоратинде против Лесте. ⁶⁶ Тай като дислило, кидисале о народна старейшинес, о главна свещеникия тай о книжникия тай ингалде Лес пе синедрионесте, тай пенде Леске: ⁶⁷ Ако синян Ту о Помазаники, пен аменге. А Ов пенгяс: Ако пенав туменге, нанай те верувинен; ⁶⁸ тай ако задав туменге въпроси, нанай те отговоринен. ⁶⁹ Но от акана наоте о Човешко Чаво ка бешел отдясно е Девлескере славате. ⁷⁰ Тай он саворе пенде: Тогава Божие Чаво ли синян Ту? А Ов пенгяс ленге: Туме право пенен, соскето синиом. ⁷¹ А он пенде: Сави нужда си амен вече таро свидетелство? Соскето коркоре аме шунгям Лескере мостар.