¹ Тай андо иек таро диеса, като поучинелас е люден андо храми тай проповединелас о благовестие, але о главна свещеникия тай о книжникия е старейшиненца тай хоратиненас, тай пенен Леске: ² Пен аменге, саве властяса керес давка? Или кова си Ковка, Ковато диняс Тут каика власт? ³ Тай в отговор пенгяс ленге: Ка задав тумен Меда иек въпроси, тай отговоринен Манге: ⁴ О Йоаново кръщение таро небес ли сине, или таро мануша? ⁵ А он разисквиненас машкар песте, тай пенде: Ако пенас: Таро небес, ка пенел: Соске нана верувингиен лес? ⁶ Но ако пенас: Таро мануша, саворе люде ка мударен амен баренца, соскето си убедена, кай о Йоан сине пророки. ⁷ Тай отговоринде, кай нана жанен катар сине. ⁸ Тогава о Исус пенгяс ленге: Нито Ме пенав туменге саве властяса керав давка. ⁹ Тай почнингяс те пенел е люденге кайка притча: Иек мануш насадингяс лозес, диняс лес под наем земеделциенге тай гело андо странство за дълго време. ¹⁰ Тай андо време е кидибнаске бичалгяс иеке слугас ко земеделция, за те ден лес таро плоди е лозеске; но о земеделция марде лес тай бичалде лес чучо. ¹¹ Тай бичалгяс авере слугас; а он лесда марде, срамно оскърбинде лес тай бичалде лес чучо. ¹² Бичалгяс третонес; он лесда наранинде тай чивте. ¹³ Тогава о стопани е лозескоро пенгяс: Со те керав? Ка бичалав ме възлюбеноне чавес; ащи лес те почетинен. ¹⁴ Но о земеделция, като дикле лес, разисквиненас машкар песте, като пененас: Кавка си о наследники; нека мударас лес, за те ачол о наследство амаро. ¹⁵ Тай чивте лес аври таро лозес, тай мударде лес. Тай чука, со ка керел ленге о стопани е лозескоро? ¹⁶ Ка авел тай ка погубинел калке земеделциен, тай ка дел о лозес аверенге. А като шунде давка, пенде: Дано тена овел! ¹⁷ А Ов диклас лен тай пенгяс: Тогава со значинел кавка, ковато си пишиме: " О бар, ковато отхвърлинде о зидаря, ов ачило шеро е ъгълескоро"? ¹⁸ Секой, ковато перел упрал калке баресте, ка разбинел пес, а упрал касте перел, ка смажинел лес. ¹⁹ Тай ко също сахати о книжникия тай о главна свещеникия мангле те товен васта Лесте, соскето ахалиле, кай пенгяс кайка притча против ленде, но даранас таро люде. ²⁰ Тай като наблюдавиненас Лес, бичалде съгледвачиен, колато преструвиненас пес, кай си праведна, за те уловинен десави Лескири дума, чука че те преден Лес ко началство тай ки власт е управителеске. ²¹ Тай он пучле Лес, тай пенде: Учителю, жанас, кай право хоратинес тай учинес, тай анде Туте нанай лицемерие, но учинес о Божие дром според и истина; ²² право ли си аменге те дас данъки е цезариес, или нака? ²³ А Ов ахалило о лукавство ленгоро тай пенгяс ленге: ²⁴ Покажинен манге иек динарий. Каскоро образи тай надписи иси? Тай в отговор пенде: Цезарево. ²⁵ А Ов пенгяс: Тогава ден о цесарово е Цесариес, а о Божие е Девлес. ²⁶ Тай нанащине уловинен варесо андо думес англал о люде; тай зачудиме Лескере отговориеске, траинде. ²⁷ Тогава приближисале десаве таро садукея, колато твърдинен, кай нанай възкресение, тай пучле Лес, тай пенде: ²⁸ Учителю, о Мойсей пишингяс аменге: " Ако мерел декаске лескоро прал, ковато си прандеме, но си бездетно, лескоро прал те лел е ромня тай те ваздел потомъки пе пралеске". ²⁹ А сине ефта прала; тай о първо лилас ромня тай муло бездетно. ³⁰ Тай о второ, тай о трето лиле ла ; ³¹ чука също о ефта лиле ла тай муле, без те мукен чавен. ³² А после мули и ромни. ³³ Тай чука, ко възкресение каске лендар ачол ромни? Соскето о ефта исине лен ромняке. ³⁴ А о Исус пенгяс ленге: О мануша калке светоскере пранденен; ³⁵ а колка, колато удостоинен пес те ресен ковка светос тай о възкресение таро муле, нито женинен пес, нито омъжвинен пес. ³⁶ А тай нанащи вече мерен, понеже си равна е ангеленца; тай сар участникия андо възкресение, си чада е Девлеске. ³⁷ А кай о муле възкръснинен, давка о Мойсей покажингяс андо тан, кате пишингяс е къпинаке, като наречингяс е Девлес " Дел Авраамоео, Дел Исааково тай Дел Яково". ³⁸ Но Ов нанай Дел е муленгоро, а е живденгоро; соскето за Леске саворе си живде. ³⁹ А десаве таро книжникия в отговор пенде: Учителю, Ту лачес пенгян. ⁴⁰ Соскето на смеиненас вече за нищо те пучен Лес. ⁴¹ Тай пенгяс ленге: Сар пенен, кай о Помазаники си Давидово чаво? ⁴² Соскето коркоро о Давид пенел анди книга ко Псалмес: " Пенгяс о Дел* мере Девлеске: Беш отдясно Манге, ⁴³ жи кай положинав Те враговиен Тере подножиесте". ⁴⁴ Тай чука, о Давид наречинел Лес Господ, тогава сар си лескоро чаво? ⁴⁵ Тай като шуненас саворе люде, Ов пенгяс Пе ученикиенге: ⁴⁶ Пазинен тумен таро книжникия, колато дехен те пирен премениме тай дехен поздравя ко пазаря, о първа столовя андо синагогес тай о първа тана ко угощения; ⁴⁷ колато хан о кера е вдовиценгере тай за показ принесинен дълга молитвес. Он ка получинен по-баро осъждане.