¹ Палал далкесте о Исус диняс андо Ерихон тай накелас презал о градос. ² Тай аке, иек мануш, ко алав Закхей, ковато сине началники е бирникиенге тай барвало, ³ мангелас те дикел кова си о Исус, но нанащине ашал о народос, соскето сине харно. ⁴ Тай запрастанило нангле, тай качисало иеке черницате, за те дикел Лес; понеже ка накелас презал колке дроместар. ⁵ О Исус, като ало калке танесте, диклас нупре тай пенгяс леске: Закхее, ухли сиго, соскето авдиес требе те престоинав те кересте. ⁶ Тай ов сигяргяс те ухлел, тай приемингяс Лес лошаласа. ⁷ Тай като дикле давка, саворе роптаиненас, тай пенен: Паш грешноне манушесте диняс те бешел. ⁸ А о Закхеи ухтинило тай пенгяс е Девлеске: Господи, аке от акана дав екваш ме имотиестар е сиромасиенге; тай ако десар ограбингьом декас, иринав леске четирикратно. ⁹ Тай о Исус пенгяс леске: Авдиес ачило спасение калке кересте; соскето кавкада си Авраамово чаво ¹⁰ Понеже о Човешко Чаво ало те родел тай те спасинел о погинало. ¹¹ Тай като шуненас давка, Ов прибавингяс иек притча, соскето сине паше жи ко Ерусалим, тай он мислиненас песке, кай о Божие тагарипе веднага ка явинел пес. ¹² Далкеске пенгяс: Десаво благородники гело далечноне ригате те получинел за песке царско власт тай те иринел пес. ¹³ Тай викингяс дешен пе слугендар, тай диняс лен деш мнасес; тай пенгяс ленге: Търгувинен далкеса, жи кай авав. ¹⁴ Но лескере граждания мразиненас лес тай бичалде палал лесте посланикя те пенен: Нана мангас кавка те царувинел упрал аменде. ¹⁵ А като получингяс и царско власт тай ирисало, заповедингяс те викинен колке слуген, коленге динясас о парес, за те ахалол со припечелинде чрез о търгуване. ¹⁶ Ало о първо тай пенгяс: Господарю, тери мнаса спечелингяс деш мнасес. ¹⁷ Тай пенгяс леске: Шукар, лачеа слуго! Понеже ко бут хари покажингян тут верно, нека овел тут власт упрал деше градовиенде. ¹⁸ Ало о второ тай пенгяс: Господарю, тери мнаса принесингяс панч мнасес. ¹⁹ А пенгяс лескеда: Ов туда упрал пандже градовиенде. ²⁰ Ало авер тай пенгяс: Господарю, аке тери мнаса, която пазинавас скътано анди кърпа; ²¹ соскето даравас тутар, понеже синян срого мануш; ваздес давка, ковато нана положингян, тай жънинес, ковато нана посеингян. ²² О господари пенгяс леске: Ка съдинав тут те собственоне думенца, зло слугас. Жанесас, кай синиом строго мануш, ваздав давка, ковато нана положингьом, тай жънинав, ковато нана сеингиом; ²³ тогава соске нана вложингян ме парес анди банка, тай ме, като ававас манге, ка прибиринавас лен е лихваса? ²⁴ Тай пенгяс е присъстващоненге: Лен лестар и мнаса тай ден ла калкесте, колес иси деш мнасес, ²⁵ ( Пенде леске: Господарю, лес вече иси деш мнасес!) ²⁶ Пенав туменге, кай всекаске, кас иси, ка дел пес; а калкестар, колес нанай, лестар ка отнеминел пес давкада, ковато си лес. ²⁷ А колка мере неприятеля, колато нана мангенас те царувинав упрал ленде, анен лен ате тай посечинен лен англал манде. ²⁸ Тай като пенгяс давка, о Исус тръгнингяс нангле, като ухлелас за Ерусалим. ²⁹ Тай като приближисало жи Витфагия тай Витания, жи ко хълми наречиме Елеонски, бичалгяс дуиен таро ученикия тай пенгяс ленге: ³⁰ Жан андо гав, ковато си мамуял туменде, анде колесте като ден, ка аракен иеке оселес, панло, колес, нисаво мануш нана възседингяс;путрен лес тай анен лес. ³¹ Тай ако декой пучел тумен: Соске путрен лес? Пенен чука: Е Девлеске требел. ³² Тай о бичалде геле, тай аракле лес, сарто пенгясас ленге. ³³ Тай като путерде е оселес, лескере стопания пенде: Соске путрен е оселес? ³⁴ А он пенде: Е Девлеске требел. ³⁵ Тай анде лес жи ко Исус; тай като наметнинде пе шехя ко осели, качинде е Исусес. ³⁶ Тай като накелас Ов, о люде бухларенас пе шехя ко дром. ³⁷ Тай като вече наближинелас те превалинел о Елеонско хълми, о цело множествос ученикия починде те лошанен тай велегласно те славинен е Девлес саворе великоне деловиенге, колато диклесас, тай пенде: ³⁸ Благословиме о Тагар, Ковато авел андо Господно алав; мири ко небес тай слава андо висини! ³⁹ А десаве таро фарисея машкар о народос пенде Леске: Учителю, смъмрине Те ученикиен. ⁴⁰ Тай Ов в отговор пенгяс: Пенав туменге, кай ако калка траниен, ов о бара ка пищинен. ⁴¹ Тай като приближисало тай диклас о градос, туно леске, тай пенгяс: ⁴² Те жанесас ту, ва! Ту, поне анде калке тере диесесте, давка, ковато служинел те мириеске; но понастоящем си гаравдо те якендар. ⁴³ Соскето ка авен упрал туте диеса, като тере неприятела ка вазден могила около туте, ка обсадинен тут, ка стеснинен тут отвред, ⁴⁴ тай ка разоринен тут, тай ка избинен те жителен анде туте, тай нанай те мукен анде туте бар баресте; соскето ту на пенджаргян о времес, като улан посетиме. ⁴⁵ Тай като диняс андо храми, почнингяс те гонинел колкен, колато бикненас; тай пенелас ленге: ⁴⁶ Пишиме си: " Тай мо кер ка овел молитвено кер", а туме кергиен лес " разбойническо вертепи". ⁴⁷ Тай поучинелас секо диес андо храми. А о главна свещеникия, о книжникия тай о народна първенци стараиненас пес те погубинен Лес; ⁴⁸ но нана аракенас со те керен, понеже саворе люде вслушвиненас пес те шунен Лес.