¹ Пак ли почнинас те препоръчвинас амен? Или иси амен нужда, сарто декой, таро препоръчителна писма жи туменде или тумендар? ² Туме синиен амаро писмо, пишиме анде амаре сърценде, узнавиме тай четиме саворе манушендар; ³ тай явинен тумен, кай синиен Христово писмо, проиклило чрез амаро служение, пишиме ма мастилоса, а е Духоса е живде Девлескоро, ма плоченде барестар, а плочендар тари плът - е сърцеске. ⁴ Саика увереност иси амен спрямо о Дел чрез о Христа. ⁵ Ма кай синям способно коркоре амендар те съдинас варесоске сар амендар; но амари способност си таро Дел, ⁶ Ковато кергяс амен способна сар служителя иеке неве заветиеске, ма е букваке, а е духоске; соскето и буква мударел, а о духос оживотворинел. ⁷ Но ако о служение колкеске, ковато анел мериба, пишиме буквенца, издълбана баресте, ачило салке славаса, кай о израиляния нащине дикен е Мойсейес андо муи ашал о блясъки лескере москоро. ковато впрочем уло преходно, ⁸ сар нанай те овел о служение е Духоскоро по-баре славаса? ⁹ Соскето, ако о служение колкеске, ковато анел осъждане, ачило славаса, о служение колкеске, ковато анел правда, отнакел лес бут повече анди слава. ¹⁰ (Тай наистина ковка, ковато уло прославиме, нашалел пи слава далке отношениесте ашал и слава, която превъзходинел.) ¹¹ Соскето, ако кавка, ковато пренакелас, уло славно, то бут по-славно си о трайно. ¹² Тай чука, като иси амен саика надежда, хоратинас баре откровеностяса, ¹³ тай на синям сар о Мойсей, ковато товелас покривалос пе мосте, за тенащи о израиляния те дикен о изчезване калкеске, ковато пренакелас. ¹⁴ Но ленгере гогя уле корярде; соскето жи авдиес, като четинен о Пурано Завети, о също покривалос ачол, соскето ов снеминел пес само андо Христа. ¹⁵ Тай жи авдиес ко четиба е Мойсейеске покривалос , пашлол ко сърцес ленге. , ¹⁶ Но като о Израил иринел пес карик о Дел, о покривалос ка снеминел пес. ¹⁷ А о Дел си о Духос; тай кате си о Господно Духос, оте си свобода. ¹⁸ А аме саворе, колато непокритоне муиенца отразинас* и Господно слава сар анде анясте, преобразинас амен анде Лескере образиесте тари слава анди слава, сарто таро Духос Господно.