¹ Соскето коркоре туме жанен, пралален, кай амаро идване паш туменде нана уло напразно; ² но като улам по-нангле пострадала тай поругана андо Филипи, сарто жанен, одързостисалам анде амаре Девлесте те проповединас туменге о Божие благовестие машкар баре борбате. ³ Соскето анде амаре увещаниесте нана сине самоизмама, нито нечиста подбудес, нито лукавство; ⁴ но сарто улам одобриме таро Дел те поверинел аменге о делос е благовестиескоро, чука хоратинас, ма за те угодинас е манушенге, а е Девлеске, Ковато изпитвинел амаре сърца. ⁵ Соскето, сарто жанен, нисар на употребингям ласкателна хоратес или гаравдо сребролюбие ( о Дел си свидетели); ⁶ нито родингям слава таро мануша, било тумендар, било аверендар ( ако те ащинеда те притежинас власт сар Христова апостола), ⁷ но улам блага машкар туменде сар кърмачка, като грижинел пес пе чавенге. ⁸ Чука, като сине амен горещо любов карик туменде, уло аменге драго те предас туменге ма само о Божие благовестие, но амаре души, соскето ачиленас аменге мила. ⁹ Соскето туме, пралален, помнинен амаро трудос тай усилие, сар, керас бути о диес тай ират, за тена овас тежест ни иекеске тумендар, проповедингям туменге о Божие благовестие. ¹⁰ Туме синиен свидетеля, тай о Дел също, сар свято, праведно тай безукорно икергям амен машкар туменде, о вярваща, ¹¹ като жанен сар увещинасас тай утешинасас всеконе иекес тумендар, сарто о дад - пе чадовиен, ¹² тай заръчвинасас туменге те живинен достойно е Девлеске, Ковато призовинел тумен анде Пере тагарипнасте тай славате. ¹³ Далкеске амеда непрестано благодаринас е Девлеске, соскето, като приемингиен чрез аменде о словос е Божие посланиеске, приемингиен лес ма сар манушескоро словос, а сар Божие словос, савото си наистина, ковато действинел машкар туменде, о вярваща. ¹⁴ Соскето туме, пралален, ачилен подражателя е Божие андо Христа Исуса кангериенге, колато си анди Юдея, понеже тумеда претърпингиен о също тумаре сънародникиендар, сарто онда таро юдея; ¹⁵ колато тай о Дел о Исус, тай о пророкия мударде, тай амен гонинде, е Девлеске на угодинен тай саворе манушенге си противна, ¹⁶ като забранинен аменге те хоратинас е езичникиенге, за те спасинен пес. Чука он винаги допълнинен и мярка пе безехенгири; но о безгранично гневи ресло лен. ¹⁷ А аме, пралален, като осиротингям тумендар за хари време (кити за телесноне присъствиеске, а ма сърцеске), постараисалам още по бут, баре желаниеса, дано дикас тумаро муи. ¹⁸ Соскето манглен те авас паш туменде (поне ме, о Павел) иек-дуи дрома, но о Сатана попречингяс аменге. ¹⁹ Понеже коя си амари надежда или лошали, или венеци колеса хвалинас амен? На синиен ли туме англал амаре Девлесте о Исус паш Лескере пришествиесте? ²⁰ Соскето туме синиен амари слава тай лошали.