¹ Maxuhumu rwi Sabata, kushera ku lyiba lyithanzyi lyi viki, Maria Magadalena indi Maria yuyumwe bakuya kuku mwana imbzi. ² Nimwene, kwarana izi kinyeho yi kuru, mi lyinyiroi lwa Shikati lyata kadzwa ku lyiiro, kuya kurawura lyiwe, lyaku sikama palyo. ³ Karu ku mwanahara ku mwenika, mi ziraro zakye kalyi zuhwe twaaa. ⁴ Baruku mamera baku ywapa bakuba tandi bayeyi babfu. ⁵ Lyinyiroi lyaku hweta ku barwakazi atikya, ''Nisiye ku ywapa, ndiyi zire atikya nati shaka Jeso, yamata bambwa. ⁶ Kukuye kuni, kono matambuka, tandi shamata hweta. Nakuya ni mwene pu Shikati karana nzyire. ⁷ Ni shukye papani ngaho nika zire barutiwa bakye, 'Matambuka ku bafu. Ni mwene, makyiti kuwuso ko Galilea. Nduku shani kamu mwena.' Ni mwene, Ndani ziri.'' ⁸ Barwakazi papa ngaho baku siya imbzi shuku ywapa indi kwi dze, kutiya kuka zira barutiwa bakye, ⁹ Ni mwene, Jeso akuba shangana aku tikya, ''Nakotuka!'' Barwakazi bakuya, pumakondo akye ku murapera. ¹⁰ Mi Jeso aku tikya kuwo, ''Ni siye ku ywapa. Nakwenda nika zire bakuru banga bakwenda ko Galilea. Kopa shabaka ndimwene.'' ¹¹ Papa barwakazi pubaru kwenda, ni mwene, baru ku mamera ba bamwe baka tikya ku mureneñi ka zira ma purisita ba bakuru izuto za panga hara kozo. ¹² Pu ma purisita pubaru ka lyishanganisa ni bakuru ka hweta zitaba nawo, bakupa marwapa ngamenji masole. ¹³ mi baku bazira, Atikya, 'Jeso' barutiwa baya masuku kuya kuyiba shutupu shakye pubaru ku kwama.' ¹⁴ Ati ipiho yopani yati kaya ku muyendisi, mboti mususuwe kukusa zibbiraera kokunwe.'' ¹⁵ Mi masole bakuyisa marwapa mi ba karasi tandi shuba zirwa. Ipiho yopani ya kwenda koko ku dzera kuwuso mu ma Juda. ¹⁶ Kono barutiwa wu lyikumi indi muxiki baka tita ko Galileya, kwi kambamo ku Jeso amata bazira. ¹⁷ Pubaru ku mu mwana, barukumu rapera, kono babamwe kabaru ku tishira. ¹⁸ Jeso akuya kuwo indi ku hweta nawo atikya, ''Koyo iqumu yata pewa kumye mu lyiiro indi mulyuvu. ¹⁹ Akwenda cware nika pange barutiwa mu lyuvu. Ni bakoro beze mu lyina lya Tatye, u Mwana, indi Mupupo wo Muchena. ²⁰ Ni barutye izuto zindata nizira. Ni mwene, ndina nanwe kakanda koko, nanga iku mamenisizi ulyuvu.''