¹ Ohiyu wankorini waka keera kimphelaka wan'nyaka; mii kahompheelatja, akamphuanyale. ² Kihitjiirela kimuaneeniaaka, ''Kinaahala ni kinaahala weetta epooma yoteene, mphironi ni mparapaarani; kinaahala onruela wan'nyaka''. Kihomphela, akimphuanyale. ³ Kihaaphuanya maguaarda ewehawehaka epooma yoteene. Mi kihaakoha tja ayena, ''N'howoona awan'nyaka!''. ⁴ Okathi wavikanalyaaka maguaarda phamphuanyalyaaka wa yoole erooho aka enomphelaaya. Kihonvara ni akin'hiyale orwa, mpaka wankussalyaaka owan'nyaya anumwanaka, okuaarto wen'we wavahiyaaka. Athiyana yaale yuulumaka ni athiyana assikhuaaya: ⁵ Kimpheela wiira nyuuva nlaphele, assaana aathu oo Jerusalem, wa egazela tjeethiyana tjo ntakhuani, wo wiira nyuuva n'hikhale nkuanyulaka ofentana wihu n'no mpaka wamphiyaaya wuumaleloni. Nthiyana yoole ulumaka veekha: ⁶ Enkhumenla esiyani muuthakoni ntoko mwiisi, yoonukhelihiya ni emiira ni elumpani, ni eperfuume tjothumihiya nanakusiyanti! ⁷ Nkawehani, ekhatera ya Salomao; yakhalenliya naanakhotto, naanakhotto sithiini owIsrael. ⁸ Yayaayo athu antjuweleeha ekatana eyo ni athu okhuitiri owana ekhotto. Wakula nthu haana ekatana awe, owithenka wo wiira yaawanane anyatha oohiyu. ⁹ Mwene Salomao hipankela mwaneene ekhatera yo thaapua yo Libano. ¹⁰ Nkori ole waari wopankiya ni parata; mphiteryo ayooyo yapakiye ni ewooru, yowonkomeliya yaari yopurpura. N'hinawaya m'mo yaari yoorerihiya nasaana athu oJerusalem. Nthiyana ole howiirela athiyana oJerusalem: ¹¹ Asaana athu oSiao, nkhume ni n'moone Mwene Salomao, awaraka ekorowa yakhenlalyaawe naanumwanawe waathelawe ekasamento, nihuku neen'ne noreera mwiikumini wawe.