¹ Waakhula wooreera onaahulussa orussiya, massi nuulumo nootakhala owaana orussiya. ² Nlimi naatjuweli ottittimiha otjuwelatja, massi malaku anlolo an'mwaressa tjoonhala. ³ Meetho aApwiya anaaweha mooteene, yaawehaka atakhali naatthu oophwanela. ⁴ Nlimi ninvoniha nri weekumi, massi nlimi ninuuluma tjowootha ninaahonona n'nepa. ⁵ Nlolo naatanhifu en'himya athumwanawe, massi yoole nfuntta tjoohiihiya naaphwanela. ⁶ Ntthoko nanassariya, hohaavo n'hakhu mwintji, massi tjinphwanhaawe ntakhali tjonon'waanela ehassara. ⁷ Malaku aatthu ootjuwelatja ankawa otjuwelatja, massi nrima wantthu nlolo khiivo envahaaya. ⁸ Apwiya waakassiri okuttho waatthu oohiloka, massi mavekelo aanassariya phanaatjivela. ⁹ Apwiya waakassiri nttala waatthu oohilika, massi Ayena anaafenta atthu anvara ekhweeli. ¹⁰ Onaahala okhala nttarusso muulupale wantthu n'hala ohiya nttalooyo, ni hintthuna ohimeeriya naahala okhwa. ¹¹ Ekhapure nookwanhuwatja ori wootthukuwatja waApwiya, ventji ventji nimirima tjaassaana aatthu! ¹² Ntthu oohitthuna ohomeeriya noona oveehiya eevaanhihiyaka; yena khan'mwaattaman'na ootjuwelatja. ¹³ Nrima wootteeliya onaahiya ekhove yootteeliya, massi yooweryaa yowanrimani enawooniha oweryaa n'nepa. ¹⁴ Nrima wantthu niiwa npheelatja otjuwelatja, massi malaku aalolo aniilihera nitjoonhala. ¹⁵ Mahuku ooteene aatthu oohuvihiya ankhala ootteeliya, massi nrima wootteeliya onaahakalala woohimala. ¹⁶ Yooreera okhalana vakaani owoovaka Apwiya, ohiya okhalana n'hakhu muulupale niwiitjoona. ¹⁷ Yooreera eyoolya vakaani onari nfento ovirikana olya enama yomope ninttima. ¹⁸ Ntthu ooviruwatja npheelessa ewaniwani, massi yoole npitja orussiya naamaaliha tjaapheela okhumenla. ¹⁹ Nttala wantthu oonhoonhatjiya ori phanka nipuro nootjara mwiiwa, massi nttala waanasariya eparapaara yowaatalyaa. ²⁰ Mwaana ootjuwelatja nawaatjiveliha athumwaane, massi nlolo nawaatanhifu anumwaane. ²¹ Ntirikhi ninantjiveliha ntthu nvara tooreera, massi rina otjuwelatja neetta ntaala wooreera. ²² Tjoolakeka tjinaakhala tjoohilika nipuro nihiri wiiwanana, massi, nootthunelana, tjoolakela tjihaana owakathi. ²³ Ntthu nphwanha otteeliya atjipwaka wooreera; nootepa oreera nuulumo owakathi wooreera! ²⁴ Nttala weekumi onanrweehela ntthu oophwanela ohoolo, massi yena ahuluwe nkhapure. ²⁵ Apwiya ankwanhula ntthoko naatthu owiittottopa, massi ankhikitjera nthala nanankhweli. ²⁶ Apwiya anaakassiri muupuwelelo tjaatthu ookukuryaa, massi moolumo oophwanela ankhala ooreera. ²⁷ Ttapaya n'mwaana enhakunhaku moomutjiniwawe, massi yoole hintthuna okussakussatja naahala okhala. ²⁸ Nrima wanassariya onuupuwela ohinatjipwa, massi malaku aatthu ookukurya anvara tjootakhala. ²⁹ Apwiya ari ottayi naatthu ootakhala, massi aniiwa mavekelo aanassariya. ³⁰ Nthuko won'meethoni onaatteeliha nrima, ni moolumo ooreera ekumi yeerutthu. ³¹ Wamwiiwelela ntthu noovaanhiha enan'na tjinkhalaa, onaahala okhala naatthu ootjuwelatja. ³² Yoole hintthuna ohimeeriya nawiitanhifu mwaneene, massi yoole nviriyana naaphwanha otjuwelatja. ³³ Owoova Apwiya phunphwanhaa otjuwelatja, ni wiiyeviha ori ohoolo wonttittimiho.