¹ Nthiyana ootjuwelatja nteka etthokwaawe, massi nthiyana nlolo nkwanhula nimatataawe. ² Neetta nin'nema nawoova Apwiya, massi hintthuna wiiwenla Nawaatanhifu. ³ Mwaano mwanlolo phuri wiittottopa, massi malaku antthu ootjuwelatja anaahala onssunka. ⁴ Nipuro nihinkhala emope, nikhupi ninkhala nooreera, massi oruweriya woyoolya yintji en'mwa niikuru yomope. ⁵ Namoona okhweeli khan'hala wootha, massi namoona owootha n'mumula wootha. ⁶ Namaveeha npheela otjuwelatja ni khanphwanha, massi otjuwelatja khunonrikarikela ntthu oophwanela. ⁷ On'huluwe ntthu npanka tjootakhala, kontha kontha khun'hala okhalana otjuwelatja. ⁸ Otjuwelatja wantthu oophwanela otjuweleeha nttalaawe, massi ololo wanlolo wootha paassi. ⁹ Alolo khantthuna olepela essontte wanluku mwaha watjoovaratjaya, massi anassariyaru, essontte phuukumyaaya. ¹⁰ Nrima onaatjuwela enonweryaa ni khaavo ntthu ntjuwela otteeliyawaya. ¹¹ Ntthoko naatthu oovavarya ninaahala okwanhuwa, massi heema aanassariya khan'hala wiira etthu. ¹² Ohaavo nttala onkhala phanka wooreera wantthu, massi woomaleloniwaya ononrweeha wookhwani. ¹³ Hata othyee ohaana otjukulatja wanrimani, ni wuumaleloni wootteeliya otjukulatja. ¹⁴ Yoole hinaamini n'hala okhalana enonphwanela, massi ntthu oophwanela n'hala okhalana yawawe. ¹⁵ Ntthu hifunttihiye nawaamini tjooteene, massi ntthu oophwanela nuupuwela meettelwaawe. ¹⁶ Ntthu ootjuwela nawoova ni naahuluwa yootakhala, massinlolo naakhotta, wowiikhuluvela. ¹⁷ Ntthu nrussiya wowaakuvyaatja naapanka yoonhala, ni nuupuwela opanka yootakhala naahala othanhiya. ¹⁸ Atthu oohiphwanela anphwanha ololo, massi atthu oophwanela anwarihiya otjuwelatja. ¹⁹ Atakhali anaahala okokhora ohoolo waatthu oophwanela, ni atthu oovavarya an'hala okokhora n'mamikhorani mwaanassariya. ²⁰ Massikhini naatanhifwiya npaka naamwaattaman'nwaawe, massi thatjiri haana assinpwanaawe entji. ²¹ Yoole nantanhifu mwaattaman'nwaawe naakossa, massi nonkhavihera massikhini naaphwanha n'nema. ²² Vano, anpanka yootakhala khankossa. Massi yaale anuupuwela opanka yooreera anaahala waakhela n'nema ninkhuluvelo. ²³ Wanteko wooteene, onaahala ophwanha yoophwanha, massi, wakhalaka ottokutta paassi, ossikhini onaatepa. ²⁴ Etthuvo yaatthu ootjuwelatja n'hakhwaaya, massi ophwanha wanlolo wootha paassi. ²⁵ Namoona okhweeli nawoopola ekumi tjintji, massi namoona owootha n'mumula wootha. ²⁶ Ntthu oolipa, owoova Apwiya, haana owehenra, ni asaanaawe anaahala okhalana nipuro nookhuluvelyaa. ²⁷ Owoova apwiya ekumi enon'hulussa ntthu wookhwani. ²⁸ Waarya wamwene onphwanhiya waatthuni entji, massi woohikhala atthu nkhulupale naamora. ²⁹ Ntthu oovilela haana otjuwelatja, massi yoole nkhala oorussiya wowaakuvyaatja nphwanha ololo. ³⁰ Nrima wowiimaaliha ekumi yorutthu, massi nttima ninawunttiha makhuva. ³¹ Ntthu nontanhifu massikhini naaruwana amunpale, massi yoole nonkhavihera hirina nawaattittimiha amunpale. ³² Ntthu oovavaryaa n'mora mwaha wotjitthu tjinvaraawe, massi nassariya haana ntthawenlo hata mookhwani. ³³ Otjuwelatja onkhala wanrimani wantthu oophwanela, massi eri wanrimani waalolo enaahala otjuweliya. ³⁴ Opanka yooreera onaakhala niilapo, massi etanpi ehaaya wakhula atthu. ³⁵ N'nema namwene ori ninanteko nvara etthu nootjuwelatja, massi orussiyawawe on'hala okhala wayoole nvara wohaaya.