¹ Jesu wakazwa munganda yaleza okuyo bwenda munzila. Basikwiya bakwe bakasika kulinguwe akuzomutondezya mayake anganda eyo. ² Pele wakataba okwamba kuti kalimbabo, ´´ Nkokuti tamuzibwene zyonse ezi zintu ? masimpe ndamwa mbila takuyo syali bbwe lyomwi atala aalyezinyina elyo litayoko olo yomwi ansi,'' ³ Nakakala achilundu cha Oliva, basikwiya bakamusila muku sisilizya okwamba kuti, '' Twambile, ino ezi zintu ziyochitika lili? Ninzi chiyoba chitondezyo chakuboola kwako amamanino echiindi?'' ⁴ Jesu wakataba okwamba kuti kulimbabo. '' Amuchenjele kuti naba omwi watamweene. ⁵ Nkaambo banji bayoboola muzina lyangu. Bayoamba mukati, ngondime kilisitu, 'okweena banji. ⁶ Muyomvwa nkondo empuwo zyenkondo zinji. Amulange kuti mutakatazigwi, akaambo kezi zintu zyeelede kuchitika; Pele mamanino taanosika. ⁷ Ichisi chiyobukilana a Chisi nyina, obwami kubwami nyina. Kuzooba nzala emi zuzumo yenyika mumasena aidene indene. ⁸ Pele zyonse ezi zintu ngama talikilo okuzyalwa kwe zichisa ⁹ Mponya awo bazomunjizya mumapenzi okumujaya. Muzosulwa kumishobo yonse akaambo kezina lyangu. ¹⁰ Awo muchindi echi banji bayosiya lushomo wabo okwa-abana umwi aumwi okusulana umwi aumwi. ¹¹ Bunji bwabasinsimi babeji bayozwida anembo kweena banji. ¹² Akaambo kakuvula kwabubi, luyando lwabantu banji luyomana. ¹³ Pele oyo uyo kakatila mane kumamanino uyofutulwa. ¹⁴ Makani mabotu abwami ayokambaukwa munyika yonse mukati bukabe bakamboni kumishobo yonse. Mponyina awo mamanino ayosika. ¹⁵ Nkakako, muyobona chisesemyo chibisya, chakambwa o Daniyeli musisimi, kachiimvwi abusena busalala´´(amu leke sikubala amvwisisye ), ¹⁶ '' Amuleke abo bali mujudiya bachijile muzilunde, ¹⁷ Amumuleke oyo uli atala e chiluli ataseluki kuti akabweze chili choonse kuzwa munganda yakwe ¹⁸ anguwe amumuleke oyo uli mumunda atapiluki kuti aka bweze wachi yakwe. ¹⁹ Pele mayoo kuli abo bamisi akuli abo basikunyonsya bana muli ayo mazuba! ²⁰ Amukombe kuti kuchija kwenu kutabi kwamu mpeyo nibuba buzuba bwe nsabata ²¹ Nkambo kunoli mapenzi mapati atana kubonwa kuzwa kumatalikilo enyika kusikila sunu, Nee, takuyobi ambi ali namu ape. ²² Nikwali kuti ayo mazuba akafwimpisigwa, takwe muntu wakaliyo futulwa. Pele akambo kaabo bsale muli oyo mazuba ayofwimpisigwa. ²³ Nakuti awo umwi waamba kuli yebo, ' Langa, ngoyu Kilisitu!' na, ' Nguulya Kilisitu! 'utazumini namu. ²⁴ Ba Kilisitu babeji aba sinsimi babeji bayozwida anembo akutondezya zintu zigambya, mukweena banji , kwakonzeka abasale bayochengwa. ²⁵ Amulalange, Ndamwambila ziza kunembo mu ciindi. ²⁶ Nkakako, kuti baamba kulinguwe, 'Amulange, ulimunyika, '' mutakainki kunyika. Neenga, 'Bona, uli mukati ka maanda ; mutakachishomi echo. ²⁷ Nkaambo mbuli lulabo lumunikila kuzwa kujwe okumunikila inzila yonse mane kuma bbililo, oko kuyooba kuboola ko mwana a muntu. ²⁸ kufumbwa oko kuli mutunta womunyama ufwide nkuubede, oko basikube nkubayoobungana. ²⁹ '' Pele mpoonya mpoonya, akumana mapenzi amazuba ayo izuba liyo sizigwa, mweezi tuyoopi mumuni wawo, inyenyeezi ziyoowa kuzwa kujulu, ape inguzu zyo kujulu ziyoozungana ³⁰ Awo chitondezyo cho mwana o muntu chiyolibonya mu julu, ape mishobo yoonse yomunyika iyolila, Bayo bona mwana o muntu kaboola mumakumbi ejulu anguzu obulemi bupati. ³¹ Uyo tuma bangelo bakwe abulemu bumvwika bwampeta , ape bayoobungana antomwi basale bakwe kuzwa kumaguwo one, kuzwa kumagolelo ejulu akuli limwi ³² '' Amwiiye chiiyo kuzwa kumukuyu. Chindi mwabona kuti mitabi ya syuuka okubika maani, muyoziba kuti mainza alaafwifwi. ³³ Mponyina, mwakubona zyoonse ezi zintu, mweelede kuziba kuti uli afwifwi, kumilyango eyo. ³⁴ Masimpe ndamwaambila, eli zyalani taiyoindi mane zintu zyonse ezi zikachitike. ³⁵ Ijulu enyika ziyo inda pele majwi angu tayoindi. ³⁶ Pele kugaminina buzuba obo, a ola takwe naba omwi uzi,aba bangelo bokujulu tababwizi, nikula mwana o muntu, Pele buyo alike taata. ³⁷ Mboonya mbuli mazuba a Nowah mbwaabede, akuboola kwamwana o muntu mbukuyooba. ³⁸ Mbonya muli ayo mazuba kitano za zambagulwe bakali kulya okunwa, kukwata oku kwatisigwa, mane kusikila Nowah nakanjila mu bwaato, ³⁹ ape takwe nchibezi kusikila zambangulwe niyakasika okubabweza- mbuchiyoba akubola kwa mwana o muntu. ⁴⁰ Awo baalumi bobile banoli mumunda- umwi uzootolwa, ape umwi uzosiigwa. ⁴¹ Bobile banakazi banogaya e chigayo - umwi uzotolwa, ape umwi uzosyala. ⁴² Nkakako amulangile, Nkaambo tamuzi buzuba mwami wenu nazosika. ⁴³ Pele amuzibe namu, nikwali kuti mweni nganda walizi chiindi chama siku mubbi naza, naakalindila ape natakalekelela nganda yakwe kuti igolomonwe. ⁴⁴ Nkakako anywibo mulelede kuli bambila, nkaambo mwana o muntu uyosika mu ola ndyomu talibambilide.