¹ Ngako Josefa akakhonanga kutibamba embikwetisebenti takhe lebetime eceleni kwakhe. wakhuluma kakhulu watsi, ''Wonkhe muntfu akangishiye.'' Ngako kute sisebenta lesema eceleni kwakhe Josefa nakatatisa kubomnakabo. ² Wakhala kakhulu, emaGibhithe eva, kanye nendlu yaFaro yeva. ³ Josefa watsi kubomnakabo, ''NginguJosefa. Usaphila yini babe wami?'' Bomnakabo abakhonanga kumphednvula, ngoba bebatfuke kakhulu ebukhoneni bakhe. ⁴ Wase Josefa utsi kubomnakabo, ''Wotani edvune nami, ngiyacela.'' Basondzela kuye. Wakhuluma watsi, '' NginguJosefa umnakenu, lenamtsengisa eGibhithe. ⁵ Ningakhali noma nitikwatele kutsi nangitsengisa lana, ngoba Nkulunkulu wangitfuma embikwenu khona ngitewusindzisa timphilo. ⁶ Ngoba leminyaka lemibili indla ibekhona kulelive, futsi kuseneminyaka lesihlanu lapho kutawubabete ngisho kulima noma kuvuna. ⁷ Nkulunkulu wangitfumela embikwenu kutewusindzisa nine njengensali emhlabeni, futsi kunigcina niphilile ngensindziso lenkhulu. ⁸ Ngako ke akusini lenangitfuma lapha kodvwa nguNkulunkulu, futsi ungente babe kuFaro, umphatsi wato tonkhe tindlu takhe, nembusi walo lonkhe lelive laseGibhithe. ⁹ Phangisami niye kubabe wami nitsi kuye, 'Nguloku lokushiwo yindvodzana yakho Josefa, ''Nkulunkulu ungente umbusi wayo yonkhe iGibhithe. Yehla ute kimi, ungaphutisi. ¹⁰ Utawuhlala eveni laseGosheni, futsi utawuba sedvute nami, wena nebantfwabakho kanye nebatukulu bakho, nemihlambi yakho netimvu takho, kanye nako konkhe lonako. ¹¹ Ngitakunakelela lapho, ngoba kuseneminyaka lesihlanu yendlala, khona ungatewubulawa yindlala, wena, nendluyakho, kanye nako konkhe lonako.'' ¹² Buka, emehlo enu ayabona, kanye nemehlo emnaketfu Bhenjamini, kutsi ngumlomo wami lokhuluma nawe. ¹³ Nitawutjela babe wami ngako konkhe kuhlonipheka kwami eGibhithe nako konkhe lenikubonile. Nitawuphangisa niletsa babe wami lana.'' ¹⁴ Wagaca umnakabo Bhenjamini entsanyeni wakhala, futsi naBhenjamini wakhala entsanyeni yakhe. ¹⁵ Wanga bonkhe bomnakabo wakhala kubo. Emvakwaloko bomnakabo bakhuluma naye. ¹⁶ Letindzaba takhulunywa endlini yaFaro: ''BomnakaJosefa befikile.'' Kwamtfokotisa Faro kanye netisebenti takhe kakhulu. ¹⁷ Faro watsi kuJosefa, '' Tsani kubomnakenu, ' Yentani naku: Gcwalisani tilwane tenu niye eveni laseKhana. ¹⁸ Landzani uyise nendluyakhe nite kumi. Ngitaninika lokuhle kwalelive, futsi nitawukudla lokunonile kwalelive.' ¹⁹ Nyalo niphocelelekile, ' Yentani naku, tsatselani bantfwabenu nebafati benu tincola eveni laseGibhithe. Tfolani uyise nite. ²⁰ Ningakhatsateki ngetintfo tenu, ngoba konkhe lokuhle lokuseGibhithe ngekwenu.'' ²¹ Emadvodzana aIsrayeli enta njalo. Josefa wabanila tincola, njengekuphocelela kwaFaro, wabanika kwekubanakekela eluhambeni lwabo. ²² Kubo bonkhe wanika ngayinye indvodza timphahla tekushintja, kodvwa kuBhenjamini wamnika tincetu tesiliva letingemakhulu lamatsatfu netimphahla tekushintja letisihlanu. ²³ Watfumelela uyise: emahashi lalishumi lagcwaliswe ngetintfo letinhle taseGibhithe; nemahashi lamasikati lalishumi lagcwaliswe ngetinhlavu, sinkhwa naletinye tintfo teyise teluhambo. ²⁴ Ngako watfuma bomnakabo bahamba. Watsi kubo, '' Caphelani kutsi ningalwi endleleni.'' ²⁵ Benyuka baphuma eGibhithe befika eveni laseKhana, kuJakobe uyise wabo. ²⁶ Bamtjela batsi '' Josefa usaphila, futsi ungumbusi lalolonkhe live laseGibhithe.'' Inhlitiyo yakhe yamangala kakhulu, ngoba bekangakholwa loko labebamtjela kona. ²⁷ Bamtjela onkhe emagama Josefa labekabatjele wona. Jakobe nakabona letincola lebetitfunyelwe nguJosefa kutsi timetfwale, umoya waJakobe uyise wabo wavuseteleka. ²⁸ Israyeli watsi, '' Sekwanele. Josefa indvodzana yami isaphila. Ngitakuya kuyombona ngingakafi.''