¹ Linu Josefa kana ba kuwola kuli wongoza hafusu bwa bahikana bakwe ba bazimene kwali. Cha wamba cha kuhuwa., ''Mubonse muni siye.'' Imi ka kwina muhikana ya ba muzimanine kwali aho hali zibahaza ku ba mukulwe. ² Chalila kuhuwa, ma Egepita chiba chizuwa, imi ni benzubo ya Faro chiba chizuwa. ³ Josefa chati ku ba mukulwe, ''Njime Josefa. Bandanda ba sihala?'' Ba mukulwe kana ba ba mwitabi, kakuti ba batilimuki habusu bwakwe. ⁴ Linu Josefa chati ku bamukulwe, ''Mwize hafuhi kwangu, nikumbila.'' Chibeza hafuhi. Chati, ''Njime Josefa mwanchenu, imu bawuzi mwa Egepita. ⁵ Kanji mulitoyi kapa kulibengela inwe mubene chakuti mubani wuzi kunu, kakuti Ileeza aba ni tumi habusu bwenu kuhaza buhalo. ⁶ Mweyi myaka yo bele inzala ibena mwinkanda, imi kusina myaka i kwana iyanza umo kete ni kube ni kulima kapa kusinza. ⁷ Ileeza aba ni tumini habusu bwenu ku mihaza ubu muzimanini mwinkanda, ku mibika cha kuhala cha ku lukululwa ku kando. ⁸ Lyahanu ka njinwe mubani tumi kunu kono Ileeza, imi aba ni tendi isi kwa Faro, mukulwana we nzubo yakwe yonse, ni buyendisi bwe nkanda yonse ya Egepita. ⁹ Muhwele imi muyende ku bandanda imi mukati ku bali, ''Ichi chati mwanaswisu wenu Josefa chiti, '' Ileeza abani tendi buyendisi mwa Egepita yonse. Mwize kwangu, kanji mulyehi. ¹⁰ Kamwize mwi kale mwinkanda ya Gosheni, imi kamube hafuhi name, inwe ni bana benumi imi ni behwa babehwa benu, mitapi ni mpene zenu, ni zonse zi mukwete. ¹¹ Kani bali kumiha kwateni, kakuti ku sina myaka i kwana iyanza ye nzala, ili kuti kanji musukuluki, inwe, benzubo yenu, ni zonse zi mukwete.'' ¹² Mulole, menso enu abona, ni menso a mwanchungu Benjamini, aka kaholo kangu kawamba kwenu. Mu muka wambile bandanda kuamana ni tompo yangu mwa Egepita ni zonse zi mwabona. ¹³ Ka muhwele imi mukalete bandanda kunu.'' ¹⁴ Chalambela mwanchakwe Benjamin munsingo ni kulila, imi Benjamin chalilila hensingo yakwe. ¹⁵ Cha chuchuna ba mukulwe bonse imi chalilila haba. Hakumana izo ba mukulwe chi bawamba naye. ¹⁶ Makande eyi ndaba chi aka wambilwa munzubo ya Faro: ''Bamukulwe Josefa chi basika.'' Chi yasangisa ahulu Faro ni bahikana bakwe. ¹⁷ Faro chati kwa Josefa, uwambile ba mukulwako, 'Mutende ichi: Balonge ha zinyolozi imi bayende mwinkanda ya Kanana. ¹⁸ Mukahinde ishenu ni benzubo yenu imi mwize kwangu. Kanimihe bulotu bwe nkanda ya Egepita, imi ka mulye kununa kwe inkanda.' ¹⁹ Lyahanu chi mulaelwa, 'Mutende ichi, muhinde inkochikala kuzwa mwinkanda ya Egepita za bahwile benu ni ba mwihyenwanwe. ²⁰ Kanji mubilezwa kuamana ni zimukwete, kakuti zilotu zonse ze nkanda ya Egepita nji zenu.'' ²¹ Banaswisu ba Isilaele chi batenda bulyo. Josefa cha baha inkochikala, kuya mwa balaeli Faro, ni chabaha zakulya munzila. ²³ Kubonse chabaha zizwato zihya, kono kwa Benjamin chamuha zipeka za myanda yo tatwe ni zizwato zihya zikwana iyanza. ²² Ku besi chatumina izi: Imbongolo zine ikumi zilongete zintu zilotu za Egepita; ni mbongolo zine ikumi za chikazana ni buheke, chinkwa, ni zimwi zi besi za mulwendo. ²⁴ Linu cha tumina bamukulwe imi chi bayenda. Chati kubali. ''Mubone kuti kanji mukanani mulwendo.'' ²⁵ Ni chibazwa mwa Egepita ni kwiza mwinkanda ya Kanana, kwa Jakobo ishabo. ²⁶ Chi ba muwambila kuti ''Josefa usi hala, imi njiye yo yendisa inkanda yonse ya Egepita.'' Inkulo ya kwe iba komokwa ahulu, kakuti kana bazumini zi ba bamu wambili. ²⁷ Chiba muwambila onse manzwi a Josefa aba wambi ku bali. Linu Jakobo habona imbongolo izo Josefa za baka tumini kwiza ku mulonga, luhuho lwa ishabo chi lwazitumuka. ²⁸ Isilaele chati, ''Njimona. Josefa mwanaswisu wangu uhala. Kani yende ni ka mubone ni niseni kufwa.