¹ Josefa a ba laeli chikombwa chakwe cha munzubo yakwe, nati, ''wizuze masaka abo bakwame zilyo zi ba wola kuhinda zonse, mi u bike mali a mukwame ni mukwame mukati hewulu lye saka lyakwe. ² U bike inkomoki yangu, ya silivela, mukati ke saka lya muhwile, imi hape ni mali a zilyo zakwe. ''Chikombwa ni cha tenda mwa ba wambili Josefa. ³ Halizwa, kakusasani, bakwame ba ba fundulwa abo ni mbongolo zabo. ⁴ Lyahanu ha bazwa mumunzi wa chisi linu ni baseni kuya ahulu kule, Josefa na wamba ku chikombwa chakwe, nati, ''Nyamuke wi chilile bana bakwame, imi chiwaka ba wonda, wambe ku bali, uti, 'Chinzi ha mwaboza bubi cha bulotu? ⁵ Iyi ka nji inkomoki mwa nywinanga nfumwangu, ni nkomoki ya sebelisa hanuha zikeza? Mwa tenda bubi, ichi chintu chi mwatenda.'' ⁶ Chikombwa ni cha ka bahitila ni ku wamba izi ziambo ku bali. ⁷ Nibati kwali, ''Chinzi nfumwangu ha wamba ziambo zi swana nezi? Iyo indaba ina kule kuti bahikana bako ba tende chintu chinabulyo. ⁸ Lole, mali a tu bawani mukati ka masaka etu, tuba a bozi hape kwenu kuzwa mwibu lya Kanana. Tuwola ku yiba buti i silivela ni gauda mwinzubo ya nfumwako? ⁹ Heiba zumwi wa bahikana bako na wanika nayo, mu musiye afwe, mi naswe mutube tu bahikana ba nfumwetu.'' ¹⁰ Chikombwa chi bati, lyaho ku be bulyo ku ya cha ziwambo zako. Iye ye ta wanike ni nkomoki mwa be muhikana wangu, mi inwe mubamwi kete mube ni mulandu. ¹¹ Kuzwaho mukwame ni mukwamena hwela ku kalongola isaka lyakwe kuli bika hansi, imi mukwame ni mukwame ne yalula isaka lyakwe. ¹² Chikombwa chiba tatubi. Chiba tangili ku mukulwana ku ka manisiza cha muhwile, imi inkomoki i ba waniki mwi saka lya Benjamini. kuzwaho ni ba halola zizabalo zabo. ¹³ Mukwame ni mukwame na longa he mbongolo yakwe ni ku bola mumunzi wa chisi. ¹⁴ Juda ni bazalwa nabo ni beza kunzubo ya Josefa. A bali kusina mo, imi ni bafukama habusu bwakwe. ¹⁵ Josefa nati ku bali, ''Chinzi chi mwa tenda?'' ¹⁶ Juda nati, ''Tuwola ku wamba nzimkwa nfumwetu? Kapa tuwola kuli joloza buti? Ireeza wa wana bubilala mu bahikana bako. Lole, tu bahikana ba nfumwetu iswe twense wa awanika ni nkomoki. ¹⁷ Josefa chati, ''Iyo indaba ina kule name kuti ni tende bulyo. Mukwame wa wanika ni nkomoki, uzo muntu mwa be muhikana wangu, kono kwenu mubamwi muyende che nkozo kweshenu.'' ¹⁸ Linu Juda na chunina hafuhi naye imi chati, ''Nfumwangu, zuminine muhikana wako a wambe chiambo mu matwi a nfumwangu, imi ku benga kwako kanji ku tiizi bahikana bakwe, cho kuti iwe uswana feela ni Faro. ¹⁹ Nfumwangu a babuzi bahikana bakwe, cho ku wamba kuti, 'Kana mwina ishenu ni mwanchenu wo muswisu?' ²⁰ Tu bawambi kwa nfumwetu, 'Twina ishetu, mukulukwame, ni mwana ya ba pepi mu bukulukwame bwakwe, wa munini. Kono mukulwe a bafwi, mi iye bulyo njo shele ku banyina, mi besi bamusuni ahulu. ²¹ Linu u bati ku bahikana bako, 'Mu ka mulete kunu kwangu kuti zani mubone.' ²² Kuzwaho, tu bawambi kwa nfumwangu, 'Muswisu ka woli kusiya besi. Mukuti heiba nasiya besi, besi mu bafwe.' ²³ Linu chi wati ku bahikana bako, ²⁴ 'Konji mwanchenu cheza nanwe, ke se ni mubone bulubi bwangu hape.' ²⁵ Linu ku batendahali kuti, ha tu yaku muhikana wako, Ishetu, tu ba ka muwambili ziambo za nfumwetu. Ishetu nati, 'Muyende hape mu ka tuwulile zilyo zimwi.' ²⁶ Linu chitwa wamba kuti, Kete tubole, heisi mwanchetu cha ba naswe, aho ka tuyende, mukuti ke te tuwole ku ka bona bulubi bwa mukwame, konji mwanchetu ne na naswe.' ²⁷ Muhikana wako ishetu a bati kwetu, ''Mwizi kuti mwihyetu a bani pepeli banaswisu bo bele. ²⁸ Umwina ku bali a ba yendi kuni siya imi ni nati, ''Che niti luli a ba halolwa mu tufwafwali, imi kana ni bamuboni kuzwaho.'' ²⁹ Lyahanu heiba nanwe ka muhinde uzu kwangu, imi inkozi yiza kwali, ka mushukumwine ibwi zangu hansi cha maswabi kwa Shiro.' ³⁰ Lyahanu, chobulyo, haneza ku muhikana ko tayo, imi muswisu na sena naswe, mukuti buhalo bwakwe bu linzingite habuhalo bo muswisu, ³¹ ka kube kuti, chabona kuti muswisu ke na naswe mwafwe. Bahikana bako ka ba shukumwine ibwi hansi za muhikana wako ishetu cha maswabi kwa Shiro. ³² Mukuti muhikana wako ka nibe ni lisumine muhala, ku muswisu uba tayo ni kuti, 'Heiba ka ni muleti kwako ka nibe ni mulandu usa mani ku batayo.' ³³ Lyahanu, chobulyo, ni kumbila u zuminine muhikana wako e kale muchisa cha muswisu ku ba muhikana kwa nfumwangu, imi u zuminine muswisu a yende ni ba mukulwe. ³⁴ Mukuti mu ni yende buti kwa tayo muswisu na sena name? Nitiya ku bona bubi bwete ku batayo.''