¹ Lyahanu Rahele chinga bona kuti ka puluhili Jakobo bana, Rahele nafwila mukulwe muna. Nati kwa Jakobo, ''Ni he bana, kamba ni fwa.'' ² Kubenga kwa Jakobo ni chi kwa hisikiza Rahele. Ime ni na muchisa cha Ireeza, ya ba kunyimi kupuluha bahwile? ³ Nati, bone, uzo muhikana wangu Biliha. Kuya kwali, ko kuma a ku puluhile bana ha mazwi angu, imi mu ni be nibahwile chakwe. ⁴ Linu na muha muhikana wakwe Biliha cha kuti mwihyabwe, imi Jakobo na yenda mukati kwali. ⁵ Biliha na ba musumba ni kupuluhela Jakobo mwanaswisu. Lyahanu Rahele nati, ''Ireeza a ba ni chenisi, imi a ba zuwi inzwi lyangu imi cha niha mwanaswisu.'' ⁶ Chelyo ibaka na wulika izina lya Dani ⁷ Biliha, muhikana wa Rahele, na sumbala hape ni ku puluhela Jakobo mwanaswisu wa bubeli. ⁸ Rahele na cho, che inkodo imbilala ni balwi ni mukulwangu imi ni ba muzundi.'' Na mu wulika Nafetali. ⁹ Linu Lea ha bona kuti cha zimika ku ba ni bahwile, ni cha hinda Zilipa, muhikana wakwe, imi na muha kwa Jakobo ku ba sina mwihyabwe. ¹⁰ Zilipa, muhikana wa Lea, na puluhela Jakobo mwanaswisu. ¹¹ ''Lea nati, ''Ichi imbuyoti! Lyahanu na mu wulika Gadi. ¹² Lyahanu Zilipa, muhikana wa Lea, na puluhila Jakobo mwanaswisu wa bubeli. ¹³ Lea nati, ni sangite! Cha banakazana mu ba ni sumpe ku sanga.'' Linu na mubika Asere. ¹⁴ Reuben na yenda mu mazuba kusinza buloto ni kuwana matila mwiwa. Na aleta kwa nyina Lea. Lyahanu Rahele nati kwa Lea, ''Nihe amwi ku matila a mwanaswisu wako. ¹⁵ Lea nati kwali, kana indaba inini kwa ko, chako ku ni lyanga mwihyetu? Iwe hanu usuna ku hinda matila a mwangu, hape?'' Rahele nati, Lyahanu mwa kalale nawe sunu masiku, ku chincha ni matila a mwanako.'' ¹⁶ Jakobo na zwa mwiwa chitengu. Lea nayenda ku kumuchinga imi nati, ''Wize munu kwangu, chokuti na kuwula cha matila a mwanangu.'' Chobulyo Jakobo na lala ni Lea awo masiku. ¹⁷ Ireeza na teka kwa Lea, imi na sumbahala na puluhela Jakobo mwanaswisu wa bwiyanza. ¹⁸ Lea nati, Ireeza a ba nihi intifo, kakuti na ha muhikana wa mukazana kwa mwihyetu. Na muwulika lya Isakare. ¹⁹ Lea na lihinda hape ni kupuluhela Jakobo mwanaswisu we yanza ni yenke. ²⁰ Lea nati, Ireeza a ba nihi impo indotu. Lyahanu mwihyetu mwani tompe, chokuti ni ba puluhi mwanaswisuwe yaza ni yenke.'' Na mu wulika izina lya Zebulani. ²¹ Hamasule zana na puluha mwanakazana imi na mu wulika izina lya Dina. ²² Ireeza na sumpa Rahele ku mu zezisa ni kuteka kwali. Na mu letela kusumbahala. ²³ Na lihinda imi napuluha mwanaswisu. Nati, ''Ireeza chazwisa insoni yangu.'' ²⁴ Na mu wulika izina lya Josefa, kuti, ''Simwine aba ni weli zumwi mwanaswisu.'' ²⁵ Hamana Rahele kupuluha Josefa, Jakobo nati kwa Labani, Ni tumine kule, chokuti niyende kwetu, ku kanda yangu. ²⁶ Ni he ba mwihyetu ni bana bangu bani ba ku belekeli, imi unisiye ni yende, kakuti wizi mutendo uni bakuhi.'' ²⁷ Labani ni chati kwali, ''Heba hanu nji ni wana ku kulolwa che insoni mumenso ako, lindize, cho kuti ni ba shuguli kuti Simwine abani hwili cha ko. ²⁸ ''Lyahanu nati, ''Te chosaka, imi mu ni kulihe.'' ²⁹ Jakobo nati kwali, ''Wizi mu ni ba kutendeli, imi ni zimunantu zako muzibe njihili chobungi. ³⁰ Ubena zinini ni niseni kusika, imi chize njiha cha ku bozekeza bungi. Simwine aba kuhwili chini bakutendeli. Lyahanu ka nihe zina chibaka changu?'' ³¹ Labani nati, ''Muni kulihe nzi? ''Jakobo nati, ''Ketu nihe chimwi. Heba no ni tendela ichi, muni ku lelele mulaka wako hape, imi ni kuubika. ³² Mu ni tatube mulaka wako sunu, kuzwisa zonse mbelele zina mubala mukando ni mibala ya budonkodonko, ni yonse imbelele isiha, ni budonkodonko ni ya mubala mu kando mukati ke mpene. Izo muzibe nji ntifo yangu. ³³ Busakusima bwangu mweti bu bonekele lyahanu, chiweza ku bonisisa intifo zangu. Zonse zi sena mibala mikando ni mibala ya budonkodoko, mukati ke mpene, ni mbelele zi siha, heba mu ziwanike kwangu, mu zi baliwe ku ba zi baibwa. ³⁴ Labani nati, ''Kushiyeme. Lekeze ku be sina cha manzwi ako.'' ³⁵ Ilyo izuba Labani na zwisa impene inkwame zi bakwina mifunda iza hansi ni budonkodoko, ni impene za chanakazi zi bena mubala mukando ni mibala ya budonkodonko, ni zonse zibena ni kutuba mwateni, ni zonse zi siha mukati kembelele, ni kuziha mu manza a banaswisu bakwe. ³⁶ Labani naye na bika muyendo wa mazuba otatwe mukati kakwe ni Jakobo. Jakobo ni cha lisa milaka yonse ya Labani iba shali. ³⁷ Lyahanu Jakobo na chahinda imbazi za mupulanga, ni za alumondi ni ze samu lye bola, ni kuzuba kuwana zituba kwateni, ni kuhinda zi wanika mukati ka tusamu. ³⁸ Lyahanu choku bakalya twa bazubi kubika mubusu bwa milaka, mu busu bwa chinywino, mu ziba kwiza kunywina. Zibe miti haziza kunywa. ³⁹ Milaka iba zali mubusu bwa tusamu; imi milaka iba zali za mifunda, za mibala mikando, ni mibala ya budonkodonko i nini. ⁴⁰ Jakobo nazi kauhanya imbelelezana, lyahanu na loleza bungi bwazo ku zinyolozi ze mibalabala ni mbelele zonse zisiha mu mulaka wa Labani. Lyahanu na kauhanya ku mulaka wakwe iye yenke ni kusazibika hamwina ni mulaka wa Labani. ⁴¹ Chakuti imbelele zi kolete mu mulaka ha zi zalwa, lyahanu Jakobo ulazika tusamu mu chinywino pili mumenso mulaka, cho kuti zizalile mukati katusamu. ⁴² Kono lyahanu zinyolozi zi fokola za mulaka haziza, Chakuti zifokola zinyolozi zi bali za Labani, imi zi bakukolete zibali za Jakobo. ⁴³ Mukwame na ba muhumi tota. Na bani mulaka mukando, bahikana ba banakazana ni bahikana banaswisu, ni nkamele ni mbongolo.