¹ N'ton si Deus lantanda bos di mortu ku cristo bo buska kusas di riba, nunde ku cristo sta sintadu na mon ireita di Deus. ² Bo pensa na kusas ku sedu di riba, i ka na kilis ki di tera, ³ Pabia bo muri dja i bo vida sta sukundidu ku cristo na Deus. ⁴ Ora ku cristo, ku sedu bo vida, i mostradu, n'toon abos tambi bo na mostradu ku el na gloria[Nota: Alguns versons tisi:"Ora ku cristo, ku sedu no vida, i tchiga, n'ton abos tambi bo tchiga ku el na gloria".] ⁵ Pabia di kila, bo mata disidjus di pekadu di natureza di tera suma: pekadu seksual, vida susu disidju di karni ka bali, ku n'ganu, ku adora idulus. ⁶ I pabia de kusas ku raiba di Deus bim riba di fidjus ku ka ta obidisi [Nota:Alguns versons tisi:"I pabia de kusas ku maldison di Deus bin".] ⁷ I sedu na es kusas ku un bias bo ianda nelis na tempu ku pasa, odja bo na vivi ba inda nelis. ⁸ Ma gos bo dibi di dispi di tudu e kusas: vingansa, raiba, maus pensamentus, koba mal ku palabras di tentason di bo boka. ⁹ Ka bo konta mintida pa n'utru, pabia bo dispi dja di ki omi bedju ku kusas ki ta fasi, ¹⁰ i bo bisti di nobu omi, kil ku na el bo fasidu nobu pa si propi kunsimentu, sugundu parsensa di kil ku kumpul. ¹¹ Suma ki sedu sin, nim barbaru nim cita, nim katibu nim libri, ma cristo i sedu tudu i sta na tudu. ¹² Pa kila bo bisti suma kilis ku Deus kudji, ku sedu santus i amadus, kilis ku di fundu di korson e ta sinti pena, ku ta mostra bondadi, ku ta baxa se kabesa, ku sedu mansus i pasenserus. ¹³ Bo djuda n'utru, bo sedu bom un pa utru. Si alguin tene un kusa kontra utru, pa i purdal di mesmu manera ku sinhor purda bos. ¹⁴ Riba di tudu e kusas, ista amor, ku djunta tudu kusas ku ta mostra kuma alguin i pirfitu. ¹⁵ Pa paz di cristo toma konta di bo korson. I sedu ne paz ku bo tchumadu na un kurpu son; i pa bo mostra gratidon. ¹⁶ Pa palabra di cristo mora na bos na tudu manera. Ku tudu djiresa, bo n'sina i bo lembranta n'utru ku salmus, ku inus, ku kantiga spiritual. Bo kanta ku gardisimentu pa Deus na bo korson. ¹⁷ Kalker kusa ku bo na fasi na palabra o na tarbadju, bo fasil tudu na nomi di sinhor Jesus, bo da grasa pa Deus pape pa meiu del. ¹⁸ Mindjeris bo fika bas di bo omis suma ki sedu na sinhor. ¹⁹ Omis, bo ama bo mindjeris i ka bo trata elis mal. ²⁰ Fidjus, bo obidisi bo papes na tudu kusas, pabia es ki bon i ta kontenta sinhor. ²¹ Papes, ka bo fasi pa bo fidjus fika ku raiba di bos, pa ka e bin pirdi korajen. ²² Katibus, bo obidisi bo dunus na tudu kusas, i ka son ora ku e sta na odja bo tarbadju, ma ku korson di bardadi, bo ten rispitu pa sinhor. ²³ Kusa ki misti pa bo fasi, bo fasil ku tudu bo korson suma ki sedu pa sinhor i ka pa omis. ²⁴ Pa bo sibi kuma bo na risibi di sinhor Jesus ku bo na tarbadja. ²⁵ Dipus kualker un di bos ku fasi ke ki ka sta diritu i na risibi kstigu pa ki kusa ki fasi ka sta diritu, i ka ten inm kudji un o utru mas importanti.