¹ Eimapo nokuya ku munzi kwao, nipo asambili wake wemukonkha. ² Piyewela sabata, ewasambizya mu sunagoge. Wanthu anyinji emumvwa nakuti edabwa naye. Weciti, " Afumya kuni masambizyo oteti?" "Ko ninzelu zo tyani zepewa uyu munthu?" "Nga ni nivyodabwisha vanji ivi vakucita na manja wake?" ³ "Ko uyu niula lini mupala matabwa, mwana wa Maliya nipo mukwao wa Yakobe na Yosefe na Yudasi na Simoni? Ko alongosi wake alilini pano naseo?" Nipo ekalipa naye Yeso. Munthu oitiwa Yose kuno oitiwa Yosefe mu Mateyo 27:56, zina ya Yosefe yupanamila mwecilembela muci Hebeli, nakuti Yose yupiliula mwecilembela muci Giliki. ⁴ Nipo Yeso ewauzya kuti, "Muwilizi niopewa mucinzi, kufumyako kwao kwakufuma nipo kwa akwake wake wa mu nanda mwake. ⁵ "Aliye kwanisha kucita vinthu vilivonse vikulu, kufumyako kuikave manja wake pa anyandi olwala nowapolesha. ⁶ Kusacetekela kwao edabwa nako. Nipo eciyozungula soti mu minzi kusambizya. ⁷ Nipo eita wala asambili twelufu noyamba kuwatumizya, awili awili, nipo epewa mphamvu zyofumya mizimu iyipa, ⁸ nopewa malango kuti asatola kanthu pa ulwendo wao, kuimyako nya tchito: nthe kutola mukate, kano cikwama, nipo kano ndalama mu vikwama vao, ⁹ koma novwala nkhwawilo, nipo nthe kuvwala minjila iwili. ¹⁰ Ewauzya, " Paliponse mukalowa mu nanda, nthe kufuma paka pa kuya kwanu. ¹¹ Nipo kano minzi iliyonse silika mupokelelani kano kunumvwani, mukaya fumako, mukathange mwa kunthumula ku mendo kwanu nciti cikaoneshe cenjezyo kwa weve. ¹² Weciya nipo no ulusya kuti wanthu aleke miluvyo. ¹³ Wefumya mizimu inyinji iyipa, nipo ewazola uzilo nakuti olwala onse epozyewa. ¹⁴ Mambo Helode ecimvwa, pakuti mbila ya Yeso imvwika paweme. Wambi enzolawila, "Ni Yohane mubatizi wazyuka kwa akufwa ni cikomo, mphamvu zyo ziziswa zucitika mwa weve." ¹⁵ Wambi eciti, " ni elisha." nakuti wambi eciti, "ni muneneli nga ni aneneli a nsita zyakale." ¹⁶ Koma akatu kumvwa Helode zya izi eciti, "Yohane, wanepatula mutu, wauka." ¹⁷ Niye Helode ewatuma kuti amange Yohane nipo aponyewe mu kamboli-mboli pa muluvyo wa Helodeya (mkazi wa filipo ali mukwao), ncikomo enze mukazi wake. ¹⁸ Nipo Yohane euzya Helode, "Nthe mwatetulo kulowana na mukazi wa mukwanu." ¹⁹ Koma Helodeya enkhalilila nao ukali kwa eve nakuti epangwa kumupaya, koma aliyo kwanisha, ²⁰ cikomo Helode enzoyopa Yohane; nipo enzozizwa kuti niolungama nakuti nimutuwa, nakuti emusunga wino. Kumumvwila nikwimupa ukali, koma emumvwila paweme ngako. ²¹ Nipo siku lifwika lecivyalikilamo Helode nakuti epekunya vilyo va anyanchito wake, na vilolo vikulu na omvwikila a mu Galileya. ²² Naye mwana mwanakazi wa Helodeya ewela nowavinila, Helode na weciita onse etemweshewa naye. Mfumu iciti kwa mwana, "Niuzye vilivyonse vyaupangwa nipo nikupe.'' ²³ Emulapizya nolawila, "Vilivyonse vati upangwe kwangu, nikupe, mphaka chitwa ca umfumu wangu." ²⁴ Eciya panja nouzya anyina, " Ko nimusengenji?" Eciti, " Mutu wa Yohane mubatizi." ²⁵ Nipo apove eyendesha kuwelela kwa mfumu, nomusenga, nakuti, " Nupangwa munipe lomba, pa cikayekaye, mutu wa Yohane mubatizi." ²⁶ Nipo mfumu iilishanya, koma cikomo ca malayo na wanthu wecita cekangokana. ²⁷ Nipo mfumu ituma cilolo cimo nociuzya kuyoleta mutu wa Yohane. Cilolo ciciya kuyomufunya mutu mu kamboli mboli mwenze. ²⁸ Emuletela mutu pa cikayekaye nomupa, nipo kabutu naye nokupa anyina. ²⁹ Nipo asambili wake, pecimvwa zyaizo, wecizatola muwili wake kuyoika mu manda. ³⁰ Nipo apositolo, eciza nonkhala pamo na Yeso, nomuuzya vecitika na vesambizya. ³¹ Nipo eciti kwao, " Imaponi mweka pa winji mukatusheko." Cikomo anyinji enzokuza nokuya, nipo aliyo kuwa na nsita yakulya. ³² Nipo eciya mu wato mu cipululu weka. ³³ Koma ewaona pokuya nipo ewaziwa, nakuti eutukilako pamo kufuma mu minzi yonse, nipo efwika weve akaliyo fwika. ³⁴ Pefwika pasilya, eona winji nakuti ecimvwa nao lusungu cikomo wenze nga ni mbelele iliye ciweta. Vipo eyamba kusambizya vinyinji vinthu. ³⁵ Nsita piyepita, asambili wake ewela kwa yeve nakuti, " Cino ni cipululu na nsita yaya kale. ³⁶ Atumeni awekuya kuti alute pa minzi yapafupi nakuti akazisitile vakulya weka.'' ³⁷ Koma eyasuka nowauzya ,"Wapeni vyoti walye," nao eciti, " Ko tingayo sitilapo mitanda ya njinjili ziwili nowapa kuti walye?" ³⁸ Ewauzya, "Ko muna inga mikate? Yani mukaone." Peciziwa, weciti, "Mikate isano na nsawi ziwili." ³⁹ Nipo ewauzya onse ku knhala pansi mu magulu pamauzu. ⁴⁰ Wenkhala pansi mu magulu; magulu miyanda miyanda na makumi asano asano. ⁴¹ Eula mikate isano na nsawi ziwili, molola kumulu edalisa notenda nowapa asambili wake kuti aike pafupi na penze wanthu. Nipo eyawa nsawi ziwili zila pakati pao. ⁴² Onse wecilya nipo wekuta. ⁴³ Nipo etola tumanyenyenswa twa mikate, na masawi, nozuzya vitundu twelufu. ⁴⁴ Nipo kwenze wanthu faifi sauzande ecilya mikate. ⁴⁵ Apove euzya asambili wake kuti akwele soti mu wato nopitilizya ulwendo kuya kusilya, ku Betisaida, peciuzya winji kuti lilute. ⁴⁶ Peciluta, eve eciya pa lupili kuya pemphela. ⁴⁷ Cingulo ciwela, nipo wato wenze pakati pa cimana, nipo enze eka pa mulundu. ⁴⁸ Nipo eona kuti atamanishiwa nao wato, ncikomo coti enzekuya kufuma mwela. Kwa nsita la folo usiku eciza kuliweve, coyenda pa manzi, enze epangwa kuwapitilila. ⁴⁹ Koma pecimuona oyenda pa manzi, etonthonganya kuti ni ciwanda nakuyambo lila, ⁵⁰ cikomo emuona nakuti wesuzyiwa. Apove enena nao nakuti, "Wani ocenjela! Nineo! Musamvwe mwezo!" ⁵¹ Enina nao mu wato, nao mwela wisila. Onse cewapapisha cendi. ⁵² Cikomo aliyo mvwishisha zya miyanda isano ya mikate. cikomo nzelu zyao zenze zosinkha. ⁵³ Pecitauka, efwikila ku Genesaleti nipo nikwecisiya wato. ⁵⁴ Pecifuma mu wato, wanthu emuziwa yeve apove. ⁵⁵ Nipo eutukila ku malo yonse noleta alwele pa mphasa zao, kuli konse wecimvwa kuti akuza. ⁵⁶ Paliponse pecilowa mu minzi, kano mu mizinda, kano muvyalo, enzoika alwele mu malo ya makweo, nipo eyamba kumupapatila kuti akateko mu mbali mwa covwala cake. Nakuti onse ekatako kano kukumyako epozyewa.