¹ Siku la sabata ekapite, Maliya Magadalena na Maliya anyina wa Yakobe, nipo Salomi eciya kugula mafuta onunkhila woti akathile muwili wa Yeso. ² Mumamawa siku yoyamba ya sabata iyo, eciya kumanda zuwa ikafume. ³ Wenzokonshana umo na muyake, ''Niwani akatifumyile cimwala pa mulyango pa manda?'' ⁴ Pecilolesha kululu, eona kuti cimwala cikulu cila cakankhiwapo, pakuti cenze cikulu ngako. ⁵ Pecilowa mu manda nipo eona mulumbwani enzeovwala mukhano utuwa, enzenkhezi kumbali yendi,nipo ezizimuka. ⁶ Eciti kwa weve, ''Musadabwe. Musakila Yeso, wa ku Nazaleti, wimwepanyika. Wauka! Alilini pano. Onani pamalo pecimuika. ⁷ Koma nkhoyani, mukawauzye asambili wake na Petulo kuti yeve watangula kuya ku Galileya. Kula mukamuone, mwecimuuzyilani.'' ⁸ Efuma noutuka kufuma kumanda; nipo eyopa nodabwa. Paliye cecinena kwa aliyense cikomo enze na mwezo. ⁹ Mabuku oyambila yenzeve Maliko citwa 16:9-20. (Kumayambilo kwa siku loyamba ya sondo, peuka, eyamba kuonekela kwa Maliya Magadalena, mwecifunya viwanda visano na viwili. ¹⁰ Eciya nouzya wenze naye, pamene enzolila. ¹¹ Ecimvwa kuti Yeso ali moyo nakuti emuona, koma aliyocetekele. ¹² Pavuli paivi eonekela maonekedwe osiyana kwa awili wa weve, penzofuma nakulowa mu calo. ¹³ Eciya nakuyouzya asambili ayakine, koma aliyowacetekele. ¹⁴ Pavuli pake Yeso eoneka ku kumi na umo penzekuya pa tebulo, nipo ewakalipila cikomo cosacetekeleka noyuma mitima kwao, cikomo aliyocetekela kwa wala emuona peciukishiwa kwa akufwa. ¹⁵ Eciti kwao, '' Nkhoyani mu calo conse, nipo mukawilizye ma lizu aweme ku olengewa onse. ¹⁶ Uyo ati akawe na cicetekelo nobatiziwa aze apulumushiwe, nipo wati akawe aliye cicetekelo akakaniwe. ¹⁷ Ivi iziwisho vikayenawo ocetekela: Mu zina langu aze afumye viwanda . Akolawila vilawilo va lomba. ¹⁸ Aze akate njoka na manja yao, na kano akamvwe ciliconse copaya, sicikawapaya. Akaike manja pa olwala, nipo akopola.'' ¹⁹ Pecilawila nao Asukulu wao, emutola nakuya naye kumulu nonkhala ku kwanja kwendi kwa Mulungu. ²⁰ Asambizyi efuma nowilizya kulikonse, pamene Asukulu esewenza nao pamo nipo nosimikizyila lizu na vizindikilo veciya navo.