¹ Mbapira dho diko dya Jesusi Christus, mwana Davita, mwana Abrahama. ² Abrahama gha karire wiha Isaka, na Isaka gho wiha Jakubushi, na Jakubushi wiha Juda na wa minendi. ³ Juda ne gha karire wiha Pereghusi na Zeraghusi kwa Tamari, Pereghusi wiha Hezironi na Hezironi wiha Rama. ⁴ Rama gha karire wiha Aminadabu, na Aminadabu wiha Nashoni, na Nashoni wiha Salomoni. ⁵ Salomoni gha karire wiha Boazi kwa Rahabu, Boazi wiha Obeti kwa Ruta,Obeti wiha Jesi. ⁶ Jesi gha karire wiha fumu Davita, Davida gho wiha Solomoni kwa mbuyama wendi Uriya. ⁷ Solomoni gha karire wiha ,Rehoboama gho wiha Abiya, Abiya gho wiha Asa. ⁸ Asa gha karire wiha Jehoshaphati, Jehoshaphati gho wiha Jorama, na Jorama gho kerekandongo wa Uzziye. ⁹ Uzziye gha karire wiha Jothama, Jothama gho wiha Ahazi, Ahazi gho wiha Hezekiya. ¹⁰ Hezekiyah gha karire wiha Manasse, Manasse gho wiha Amoni, na Amoni gho wiha Josia . ¹¹ Josia gha karire kerekandongo wa Jechoniya na haminendi mu revedhe ro mukwato ku Babilona. ¹² Munyima dho mukwato gho ku Babilona, Jechoniya gha karire wiha Shealetiela, Shelatiela gha karire kerekandongo wa Zerubabele. ¹³ Zerubabele gha karire wiha Abiudu, Abiudu gho wiha Eliakime, na Eliakime gho wiha Azori. ¹⁴ Azori gha karire wiha Zadoko, Zadoko gho wiha Achime, na Achime gho wiha Eliudu. ¹⁵ Eliudu gha karire wiha Eliaza , Eliaza gho wiha Mathanu, na Mathanu gho wiha Jakubushi. ¹⁶ Jakubushi gha karire wiha Josefa gho muna Mariya, gho yu ghereka Jesusi gho yu gha kwitha Chrisitusi. ¹⁷ Hana hokwa ku tunda kwa Abrahama kate kwa Davita, hakarire hanahoka dikumi no ghune, ku shwaya mwa Davita ku twara ku mukwato gho Babilona hanahokwa dikumi no ghune, karo ku shwaya ku mukwato gho Babilona kate kwa Christusi hanahokwa dikumi no ghune. ¹⁸ Mushamurukero wa Jesusi wa karire no ndhira dhino. Nyina Mariya ha mwandekerire Josefa, paghutho gho eshi hakare pofotji, ha mumonine muremu no mupepo gho ku pongoka. ¹⁹ Karo Josefa gho mundu wendi gha karire katughuru gho ghushemwa no mbandu, gha shanine ku mu thigha mu thipore. ²⁰ Pa ku ghayara no yinu yi, na moengeli wa Nyambi gheyire ku kwendi mu ghirota, ku ku mu ninga eshi, ´´Josefa mwana Davita, Wa yapa ku shimba Mariya shika mundu ghoye, yoyishi ghoyu nga remi ne no mupepo gho ku pongoka nga remi. ²¹ Nganyi gha kwerike mwana gho katughuru gha ku mwithe dina eshi Jesusi, ghoyu gha kuna ghamwena hanu hendi mu maharwero ghawo.´´ ²² Yoyihe yi karekire mu ku kumithamo ghoyi gha ghambire Fumu Nyambi mwa waporofita hendi,´´ ²³ ku ninga mu mone mushengeteya mbo ghana remi mwana gho katughuru , mbo ghana mwitha dina eshi Immanuera´´- ku ninga murumweya eshi Nyambi netu ghadi''. ²⁴ Josefa gha pindukire mu turo gha tendire shika ghedi moengeli wa Nyambi gha mu raghurire, gha mu shimbire keho shika mbuyama wendi. ²⁵ Karo kadi gha ku pakererire pofotji kate gha ka wanine mwana gho katughuru. Gho gha mwithire gheshi Jesusi.