¹ Yesu wavwanzile nupya kuyalondezi, ''Kwali umunthu wumwi umukankhala wino wali nu muwomvi mukalamba, nukuti chuvwike kuli weliwe kuno umuwomvi mukalamba wii wononanga ichuma chakwe. ² Apano umukankhala wamwamile nukumunena ati, 'Ichani chii chino nkhuvwa ukuyana na wewe? umbelenjele ivya wukalamba wako, pakuti utanga uye nupya we mukalamba.' ³ ''Umukalamba wayivwanzizye, 'mbombe chani, pano mwene wane akumfumya pa ntchito ya wukalamba wane? Insinamaka yakulimila; nupya ndi ni nsonyi pakulenga. ⁴ Manyile chino nimawomba, ukuti pano nkhufuma pa mulimo wa wu kalamba wane, ayanthu yalimphochelela mu ng'anda zyawo.' ⁵ Alino umuwomvi wamwamiile mwene ayakhongole yakwe pali wenga wenga, nu kumukolowozya uwakutalika, 'uli ni nkhongole zinga kuli mwene wane?' ⁶ ''Watili, 'Imbeze zyamufuta yakwe olive umwanda wonga(100).' ''Watili kuli weliwe, 'Senda ivilipwa vyako, yikala pansi zuwa, nukuti uwalike amakumi yasanu(50).' ⁷ ''Apano umuwomvi mukalamba wavwanzile kumuze, 'Uli ni nkhongole zinga?' ''Watili, 'Imise ya ngano umwanda wonga(100).' Watili kuli weliwe, 'Senda ivilipwa vyako, nukuti walika amakumi yasano nayatatu(80).' ⁸ Apano mwene wamutayizizye umuwomvi mukalamba umunthasuwilwa pamulandu wakuti wawomvile ningo. Pano ayana yansi yino pakuwomba na yanthu ukuchila ayana yaluswepo. ⁹ Nkhuvwanga kuli wewe uye na kundwe kuli wewe wenga munzila ya chuma ichawufi ukuti ndichapita, yangakupochelela mukwikala kwakwe penape. ¹⁰ Wino angasuwalikwa pa tunono angasuwalikwa na pavivule, na wino asi umulungamane pa tunono asi umulungamane pa vivile. ¹¹ Ndichakuti utasuwalikwe pakuwombela ichuma ichisita kulungamana, aweni wino alikusuwila ni chuma ichilungame? ¹² Ndichakuti utasuwalile pakuwombela iviya vyayawuzo, aweni wino alikupa imphiya izya kwako? ¹³ Pasi umuwomvi wino angawombela ayakalamba yayili, pakuti limwi akapata wenga nu kukunda muze, pamwi angayipa kuli wumwi nukupepusya kuli muze. Utanga uwombele Leza ni chuma.'' ¹⁴ Nomba aya Faliseyi, yano yakunzile imphiya, yuvwile vyonsi, yamusesile. ¹⁵ Wawanenyile ati, ''Uyilungamike wenga pa minso ya wanthu, lelo Leza amanyile imyenzo yinu. Kuno chino chikulumbwa kuyanthu ichikandamane pa minso yakwe Leza. ¹⁶ Isunde nayakasowela vyaliko ukufika pano Yohani wizile. Ukufuma insintha yilya kwene ilandwe lya umwene wa mwiyulu likutandwa, nu munthu wensi akwezya ukuchichilizya ukwinjila mwenemo. ¹⁷ Kweni ichipepuke iyulu ni ninsi ukupita ukuchila akalilembo kakwe kalata wisunde ukuti kasile. ¹⁸ Wensi wino akuzinga uwakwe akachita uwuchende, nukuti wino akutwala wino wazingwa akuchita uwuchende. ¹⁹ ''Nomba kwali umunthu wumwi umukankhala wino wazwalanga umwenda uwuyenzuluchile nuwuswepe nukuti wasechelesyanga chila wanda ni chuma chakwe ichivule. ²⁰ Kalenga wumwi izina lyakwe Lazalo walambalikwe pa mupongolo wakwe, wazuzile ni vilonda, ²¹ walondanga ukulya tuno twaponaga ukufuma pitewulo lya mukankhala. Naya simbwa yizanga ukumumyantha ivilondo vyakwe. ²² Chali ukuti kalenga wafwile wasenzilwe nayangeli ukuya nawe kuli Abulahamu. Umukankhala nawe wafwile wazisilwe, ²³ nukuti mugehena, mukuchula, winwile amanso yakwe nukulola Abulahamu apatali na Lazalo pambali pakwe. ²⁴ Apano walizile ati, 'Tata Abulahamu, nguvwila uluse utume Lazalo, ukuti atumphike ainsongo yakasalala kakwe mu manzi ukti azusye ululimi lwane, pano nkhuchula mu moto wakulilima.' ²⁵ ''Kweni Abulahamu watili, 'Mwana, izuka kuno mu wumi wako wapochelile ivinthu ivisuma, na munzila yiyo kwene Lazalo wapochelile iviyipe. Kweni nomba afwasile kuno, nawe uli munthazi. ²⁶ Pambali pali vii, umukonkho wati wuyikwa pakasi, ukuti yano yakulonda ukulamba ukufuma kuu ukwiza kuli mwemwe yatanga, nukuti nawumwi wino angalamba ukufuma kuko ukwiza kuli sweswe,' ²⁷ ''Umunthu umukankhala ati, 'nkhukulenga Tata Abulahamu, umutume ku ng'anda kuli tata--- ²⁸ pano nkweti ayakundwe yasano--- ukuti akawachenjezye, ukuti chitize chiye ukuti yize ku masyo ya machuzi.' ²⁹ ''Kweni Abulahamu watili, 'Yakweti Abulahamu na yakasowela; yaleke yawuvwile.' ³⁰ ''Umukankhala waswike. 'Awe, Tata Abulahamu, kweni ndichakuti wumwi angaya ukufuma kuyafwe, yandi yalape.' ³¹ ''Kweni Abulahamu watili kuliweliwe, 'Ndichakuti yatakuvwa kuli Mozesi na yakasowela yatanga yakopwe napano wumwi angafuma ku yafwe.'''