¹ Nhas fidjinhus, n-sta skrebi nhos kes kuzas li pa nhos ka peka. Mas, si algen peka, nu ten um Adivogadu juntu di Pai, Jizus Kristu, u Justu. ² El e sakrifisiu pa nos pekadu, i ka so di nos, mas tanbe di tudu algen. ³ Nu sabi ma Nu konxel, si nu guarda Se mandamentus. ⁴ Kel ki ta fla: " N-konxi Deus", ma ka ta guarda Se mandamentus, e um mintrosu, i verdadi ka sta nel. ⁵ Mas kel ki ta guarda Se Palavra, verdaderamenti amor di Deus tem stadu ta aperfesoa nes pesoa. Pa meiu disu, nu ta sabi ki nu sta Nel. ⁶ Kel ki ta fla mel ta permaneci na Deus, el devi tanbe anda sima Jizus Kristu anda. ⁷ Amadus, n.ka sta skrebi nhos un novu mandamentu, mas un mandamentu antigu qui dja nhos tinha desdi iniciu. Kel mandamentu antigu e kel palavra ki dja nhos tinha obidu. ⁸ Na entantu, n-sta skrebi nhos novu mandamentu, ki e verdaderu na Kristu e na nhos, pamodi skuridon sta pasa, i kel verdaderu luz dja sta ta brilha. ⁹ Kel ki ta fla mel sta na luz i ta odia se irmon, ainda el sta na skuridon. ¹⁰ Kel ki ta ama se irmon ta permaneci na luz, i nel ka ten okasion di tropesu. ¹¹ Mas kel ki yta odeia se irmon el sta na skuridon i nel el sta anda; el ka sabi pa undi ke sta bai, pamodi skuridon dja sega se odju. ¹² Nhas fidjus, n-sta skrebi nhos pamodi nos pekadu e perduadu pamodi Se nomi. ¹³ Pais, n-sta skrebi nhos pamodi dja nhos ten konxidu Kel ki e desdi prinsipiu. Jovens, n-sta skrevi nhos pamodi dja nhos ten vensidu maliginu. Fidjinhus, n-sta skrebi nhos pamodi dja nhos konxi Pai. ¹⁴ Pais, n-skrebi nhos pamodi dja nhos konxi Kel ki e desdi prinsipiu. Jovens, n-ta skrebi nhos pamodi nhos e forti, i palavra di Deus ta permanesi na nhos, i nhos vensi maliginu. ¹⁵ Ka nhos ama mundu, i nem kuzas ki sta nel. Si algen ta ama mundu, amor di Pai ka sta nel. ¹⁶ Pamodi tudu ki sta na mundu, diseju di carni, diseju di odju, i soberba di vida, ka e di Pai mas e di mundu. ¹⁷ Mundu i ses diseju ta pasa. Mas kel ki ta fazi vantadi di Deus ta permanesi pa sempri. ¹⁸ Nhas fidjus, keli e ultimu ora. Sima nhos obi ki antikristo ta bem, mesmu gosi munti antikristus ten surgidu, pamodi dja nu sabi ma nu sta na ultimu ora. ¹⁹ Es sai di nos meiu, mas es ka era di nos. Pamodi ses eradi nos, es ta kontinuaba ku nos, mas es sai, u ki ta mostra ki es ka era di nos. ²⁰ Mas nhos ten unson ki ta ben du Santu, i nhos tudu nhos sabi verdadi. ²¹ N-skrebi nhos ka pamodi nhos iginora verdadi, mas pamodi nhos conxe verdadi i pamodi ninhum mintira ta naci di verdadi. ²² Kenha ke mintrosu si ka kel ki ta nega ma Jizus e Kristu? Keli ke antikristu, kel ki ta nega Pai i Fidju. ²³ Tudu kel ki ta nega Fidju, el ka ten u Pai. Kel ki ta rekonhesi u Fidju ten tanbe u Pai. ²⁴ Kuantu a nhos, nhos kuida pa ki pirmanesi na nhos kel ki nhos obi desdi u prinsipiu. Si pirmanesi na nhos kel ki nhos obi desdi u prinsipiu, tanbe nhos ta pirmanesi na Fidju i na Pai. ²⁵ I keli e promesa ki El fazenu: vida iternu. ²⁶ Kes kuzas li n-skrebi nhos a rispetu di kes ki kre disvia-nhos di verdadi. ²⁷ I, kantu a nhos, unson ki Del nhos resebi ta permanesi na nhos, i nhos ka ten nesesidadi di ki algen inxina nhos. Mas, sima Se unson ta inxina nhos a rispetu di tudu kuza, i e verdadi i non mintira, sima El nxina nhos, nhos permanesi Nel. ²⁸ I gosi, fidjinhus, nhos fika nel pa ki oras ke El manifesta, nu ta teni total konfiansa i nu ka fika na burgonha frenti del oras kel ben. ²⁹ Si nhos sabi ma El e justu, nton nhos sabi ma tudu kel ki ta pratika justisa e nasidu del.