¹ Opo lyapitire liyuva lya Sabbatha, Maria Magdalena, Maria vawina va Jakobus, naSalome kwaghulire shidumba ashi vavure kuya nakuyawaveka shimpu shaJesus. ² Ngura-ngura yayinene muliyuva lyakuhovera mushivike, avayendi kuntoko(mbira) opo lyapumine liyuva. ³ Vavo kwaghambire nakukupura ashi, ''Are akatughandumwino ko liwe likatunde kulivero lya mbira?'' ⁴ Opo vakankukire, ava mono ashi liwe vanalighandumunako lina tunduko kulivero lyambira, linene ngudu lyakaliro. ⁵ Ava ngene mumbira nakumona mukafumu wamwanuke ana dwato mulirwakani lyalikenu, ana shungiri kuruha rwa rulyo, ashivakwata shitukutjima vavo avatjira. ⁶ Ava tantere ashi ''Mwashatjira, anwe kuna kushana Jesus, wamu Nazareti, ogho vapampalire. Anavumbuka! Ghuye munderemo muno. Kengenu palivango opo vamu rangekire. ⁷ Ano yendenu, mukatantere varongwa vendi naPeturus ashi, ghuye kunakuyenda kumeho yenu ku Galileya. Okunya nko ngamukamumona, yira momo tupu amutantelire.'' ⁸ Ava rupuka mo nakuduka vatunde kumbira, vavo kwa kankamine nakutetuka. Kundereko ovyo vaghambire kwakeheghuno mukondashi vakalire naghoma waunene. ⁹ Ngura-ngura yayinene muliyuva lyakuhova kushivike, muruku opo avumbukire, pamuntango amonekire kwa Maria Magdalena, ogho atjidiremo mwendi mpepo dadidona nta-mbiri. ¹⁰ Ayendi nakukatantera ovo kavakarango kumwe na Jesus, havahokwera mukuguva nakulira. ¹¹ Vayuvire ashi muyumi ntani ashi kamumona ghuye, ene ngoli kapivavipulire. ¹² Muruku rwakushoroka vininke vino amoneke murupe rwakukushuva-shuva kwavo vaviri vavo kunakuyenda varupuke muruhashirongo. ¹³ Ava yendi nakukatantera varongwa navantje vakuhupako, ano ngoli vavo kapi vavipulire ovyo vavatantilire. ¹⁴ Muruku Jesus amonekere kovanya murongo naghumwe vavo kunakulya kushitafura, ava garapere konda ya ghuhapuli wavo naghukukutu wadimutjima, morwa kapi vapulire vyavo vamumonino muruku rwapo avhumbukire kughufe. ¹⁵ Ava tantere ashi, ''Yendenu mughudjuni naghuntje, nakukayuvita mbudi yaruhafo mughudjuni naghuntje. ¹⁶ Kehe ghuno anakupuro nakumuyogha ngaparuka, ntani kehe ghuno wakupira kupura ngavamupangura. ¹⁷ Ovino viyivitito ngaviyenda novo vakupura: Mulidina lyande ngava tjida mpepo dadidona. Ngava ghamba mumaraka ghamape. ¹⁸ Ngavadamuna mayoka namaghoko ghavo, ntani nange ngavanwe vya ushungu, kapi ngaviva djonaghura. Ngava kambeka maghoko ghavo pavaveli, ngavaveruka.'' ¹⁹ Muruku rwapo amanine kughamba navo Jesus, yira kuna mudamuna vamutware muliwiru ntani akashungira ku rulyo rwa Karunga. ²⁰ Varongwa avatundupo nakuyuvita kehe kuno, shirugho ntjosho Mpepo kunakuyenda navo nakunkondopeka nkango naviyivito ovyo vyayendiro kumwe navo.