¹ Ngura ngura yayinene, vaPristeri kurona ava gwanekere kumwe na matimbi, navakurongi matjangwa ntani nandango nayintje ya vaJuda. Makura ava mumanga Jesusa va mutware. Avakamutapa kwa Piratusi. ² Piratusi amupura, ''Ove hompa wava Juda ndi?'' Ghuye amulimburura ashi, ''Ghumoye unakuvighambo ngoli.'' ³ VaPristeli vava kurona ava murundire vininke vya vingi. ⁴ Piratusi shimpe a mupura nka, ''Kapi una kutapa lilimbururo? Kenga ashi vininke vingashi vana kuku rundira !'' ⁵ Ngoli Jesus kapi alimburulire nka kumapuro gha Piratusi, makura uye avi mutetura unene. ⁶ Makura pashirugho nyosho kwakalire shirugho sha shilika, Piratus kehepano kava mangwiliranga ghumwe wava na dorongo, muna dorongo ogho vana shungida, ⁷ pakalire mukafumu kava twenyanga ashi Barabbas mudorongo navarwaniti ovo varuwanino lidipagho paruved rwa ndjorongani. ⁸ Mbunga kwayire kwa Piratusi ntani ava vareke kumupura a varughanene yira momo kava rughanenanga pakare. ⁹ Piratus alimburura kwavo nakughamba ashi, ''Muna shana nimu mangwilire hompa wava Juda ndi?'' ¹⁰ Mukondashi uye aviyivire ashi mukonda ya mfudu oyo vakalire nayo vaPristeli vavakurona mbyo vamu tapilire Jesus kukwendi. ¹¹ Ngoli vaPristeli ava shongaura mbunga vakuyilire ashi vamangurure Barabbas mulivango lyendi. ¹² Piratusi ava limburura nka waro nakughamba ashi, ''Vinke ngoli nivura kumu ruwana Hompa wava Juda?'' ¹³ Vavo ava yiyiri nka waro ashi, ''Mupamparenu!'' ¹⁴ Piratusi a ghamba kwavo, ''Vinke vya vidona a ruwana?'' Ngoli vavo ava yiyiri unene-nene ashi, ''Mupamparenu!' ¹⁵ Piratusi kwashanine kuhafita mbunga, makura a mangurura Barabbas kwavo. vakavita vendi ava mushepura Jesusa ntani vamutapire mumaghoko ghavakakupampara pampare. ¹⁶ Vakavita avamupititire vamutware munda yalirapa (olyo vyakundurukido mberegho kurona ya lipangero), ntani ava yita vakavita vakumaruha navantjeya. ¹⁷ Ava mudwateke lirwakani lya Ligeha Jesus , ,ntani avatungu nkata yamiya nakuyimudwateka kumutwe. ¹⁸ Ava tameke kumu morora nakughamba ashi, ''Afumane, Hompa wava Juda!'' ¹⁹ Ava mushepura kumutwe nambu ntani naku mutipira. Avatu ngoro davo kwendi ntani ava nyongeke dimutwe davo kwendi. ²⁰ Opo vamanine kumu kumagheda naku mushwaghura, ava mushutura lirwakani lya ligeha nakumu dwateka lirwakani lyamwene, nakumutwara pandje vakamu pampare. ²¹ Mukafumu ghumwe walidina Simon, waku Cirene, Kwayiremo atunde kuviha shirongo (Ghuye kwa kalire vashe va Alexander na Rufusi), makura ava mutininiki adamune ngundi oyo vamushimbitire Jesus vakamupampareko. ²² Vakavita avayita Jesus kulivango olyo, vatwenyanga ashi Golgotha (Kutanta ashi, ''Livango lya vifupa'') ²³ Ava mupa vinyu yakuvonga kumwe namungongwera wa ururu, ngoli uye kapi avi nwine. ²⁴ Ava mupampara na kupapaura vyuma vyendi nakuku shakanena kehe mukavita ashi ruha munke aghupako. ²⁵ Kwa kalire muviri yaUtatu, opo vamupampalire. ²⁶ Pashi yivito kwatjangirepo udjoni wendi, ''Hompa wava Juda.'' ²⁷ Kumwe naye kwa pampalire vanawidi vaviri, ghumwe kurulyo rwendi ntani ghumwe kuru montjo rwendi. ²⁸ Matjangwa gha tikiliramo ogho gha ghambo ashi, ''Kwamu varwira kumwe nava kandjo.' ²⁹ Ovo vamupitiro ava mushwaura, ava pungu dimutwe davo nakughamba ashi, 'A'haa! Ove ngaghu djonaghuro ntembeli ntani nakuyi tunga mumayuva matatu, ³⁰ kupopere naghumoye ntani ghutunde paShikuruse!' ³¹ Mundjira yakukufana yira moomo vamu shwaulire mukatji kavo vaPristeri vavanene, kumwe nava rongi va matjangwa, ntani nakughamba ashi, ''Apopilire vaunyendi, ngoli kapi ana kukupopera ghumwendi. ³² Renka ngoli Kristus, Hompa wa Israel, utundepo weno pa Shikurushe, mposhi tuvi mone nakuvipura,'' Ovo vamu pampalire naye navo ava mushwaura. ³³ Paviri yaUtano nayimwe, mundema aghuya palivango nalintje dogoro vili ya ntane. ³⁴ Paviri ya Untane Jesus a liri naliywi lyalinene ashi, ''Eli, Eli,'' lama Sabachthani?'' Olyo vatoroka vina kutanto ashi, ''Karunga wande, Karunga wande, vinke Una nkomberere?'' ³⁵ Vamwe ovo vayimaninepo opo vayuvire nkango dendi avaghamba ashi, ''Kengenu, kuna kuyita Eliah.'' ³⁶ Umwe aduka, atura vinyu yaUruru kushikeshe, kutura kushimbu, naku shitapa kukwendi anwe. Mukafumu aghamba, ''Kutuvimona nangeshi Eliah kwaya aya muturureko.'' ³⁷ Makura Jesus aliri na liywi lyalinene makura afu. ³⁸ Likeshe lya muntembeli ali taghuka paviri kutunda kuwiru dogoro palivu. ³⁹ Opo amonine mukorona wa vakavita owo ayimanino anapirukiri Jesus amukunge ashi anafu mundjira yino, uye aghamba ashi, ''Vya ushiri mukafumu uno kwakalire mona Karunga.'' ⁴⁰ Pakalire waro vakamali vamwe ovo vayimanino kughure vakengere. Mukatji kavo kwakaliremo Maria Magdalena, Maria(vawina vaJakobus muunya Joses), na Salome. ⁴¹ Opo akalire mu Galileya vamukwamine ntani nakumuruwanena. Vakamali vavangi navo vayire navo naye kuJerusalema. ⁴² Apa yatikire ngurova, mukonda shi kwakalire liyuva lyakukuwapayikira, olyo ndyo, liyuva kumeho ya Sabbatha, ⁴³ Josef wa Arimathea ayapo. Ghuye kwakalire umwe washilyo shandango ogho va fumadekwa mukashi kandango ogho atatililiro untungi waKarunga. Ghuye ayendi ahana utjirwe kwaPiratusi nakumupura rutu rwa Jesus. ⁴⁴ Piratusi atetukire morwa Jesus ana fu kare, mpo ayitire mukurona wavakavita ogho akengeliro Jesus, nakumupura nangeshi Jesus anafu. ⁴⁵ Opo ayuvire Piratusi kwamukurona wa vakavita ashi Jesus anafu, atapa rutu kwa Josef. ⁴⁶ Josef kwaulire likeshe. Ghuye amu ghupuko kushi Kuruse, amudingilire likeshe, nakumutura muntoko oyo vatjokolire muliwe. Makura atindikiri liwe lideke kulivero vyambira. ⁴⁷ Maria Magdalena na Maria vawina Joses vamonine livango oko vavumbikire Jesus.