¹ Hompa Karunga aghamba atantere Moses ashi, ² "Ghamba na mbunga yava Israeli vatantere ashi, 'Ntantani ngamuyende mushirongo sha Kanana, ³ ngashikare shenu, dimurudi da shirongo shenu dino dina kukwamoko, ku utokero wa shirongo ngashiyenda shipitakane mburundu ya Zinu dogoro kumurudi wa shirongo sha Edomu. ku upumeyuva wa shirongo ngashi yenda dogoro kughuhura wa lifuta lya mungwa ku utokero wa lifuta. ⁴ Kuruha rwa urundu ngashitunda kundundu ya Shikopiyoni shivindakane mumburundu ya Zinu. Kutunda po, shimpe ngashiyenda ku urundu wa shirongo sha Kadeshi ngashi katwikire kuyenda ku Hazari Adari ngashi kapitakane ku Azomoni. ⁵ Kutunda ko, murudi ngaghu kunduruka ghuvyuke ku shirongo sha Azamoni shiyende dogoro kumukuro wa ku Egipite ngashi kakwame lifuta lya Mediteranani. ⁶ Murudi wa ku ruha rwa urundu ngarukapita kulifuta lya linene. Lino lifuta nko ngaghu kakara murudi wa shirongo. ⁷ Murudi wa ku ruha rwa mukuro ngaghuyenda ghutunde kulifuta lya linene ghuyende kundundu ya Hore, ⁸ kupitakana ndundu kuyenda ku Lebo Hamati, ntani na ku Zedadi. ⁹ Murudi ngaghutwikira kuyenda ku Ziforoni dogoro ngaghu kashaye ku Hazari. Oghuno ngonga ghukara murudi wenu wa kuruha rwa mukuro. ¹⁰ Makura ngamu ture murudi wenu wa ku upumeyuva ghutunde ku Hazari Enani ghuyende ku urundu wa Shefamu. ¹¹ Murudi wa ku upumeyuva ngaghu ghurumuka ghupite mu shefamu ghuyende ku Ribila, ku upumeyuva wa Ayini. Murudi ngaghu twikira kuyenda ku upumeyuva wa lifuta lya Kinareti. ¹² Makura murudi ngaghu twikira kuyenda ku urundu wa mukuro wa Jorodani ghuyende ku lifuta lya mungwa ngaghu ghurumuke ku upumeyuva wa lifuta lya mungwa. Shino ntjo ngashi karo shirongo shenu, kukwama dimurudi nadintje."' ¹³ Makura Moses aghamba atantere mbunga ya Israeli ashi, "Shino shirongo kwashi tapa kukwenu ngamu shiwane pa fungu-fungu mposhi kehe muhoko padino dimuhoko muvyu naghu kahe nagva wane shirongo shavo, yira momu atanta Hompa Karunga mo muna hepa kutapera shino shirongo kudimuhoko nadintje. ¹⁴ Muhoko wa Rubeni, na Gadi natni na ukahe wa Manesa vawana kare upingwa wa shirongo shavo. ¹⁵ Dino dimuhoko mbiri na ukahe ngava kutapera shirongo shaku upumeyuva wa mukuro wa Jorodani, musheli muno ya Jeriko." ¹⁶ Hompa Karunga aghamba atantere Moses ashi, ¹⁷ "Oghano ngo madina ghavarume ovo ngava tapero upingwa wa livhu: wakuhova mupristeli Eliyaseri na Joshwa mona Nani. ¹⁸ Vavo ngava toghorora va mpititi ghumwe mwa kehe muhoko mposhi ngava katapere livhu kudi muhoko davo. ¹⁹ Toghorora varume vamadina ghano ghana kukwamoko: Muhoko wava Juda, Calebu mona Jefune. ²⁰ Muhoko wa Simiyone, Shemwel mona Amihudi. ²¹ Muhoko wa Benjamini, Elidadi mona Kishiloni. ²² Muhoko wa Dani toghorora Jogeli mona Buki. ²³ Muhoko wa Joseph, rudi rwa Manase toghorora Haneyeli mona Efodi. ²⁴ Muhoko wa Efuremu turamo, Kemwelu mona shifutani. ²⁵ Muhoko wa Sebuloni turamo, Elisafani mona Parunaki. ²⁶ Muhoko wa Isaka turamo, Palitiyeli mona Azanu. ²⁷ Muhoko wa Asheri turamo, Ahihudi mona Shelomi. ²⁸ Muhoko wa Nafutali turamo, Pedaheli mona Amihudi." ²⁹ Hompa Karunga kuna toghorora vano varume vatapere shirongo sha Kanana kudimuhoko dava Israeli nadintje ngava wane livhu lyavo.