¹ Mukafumu andupwita kuliharango pandje paviha vya umboyera, ntani andjita kundjugho kumeho ya liharango lya pandje na kulikuma lya pandje kwara kuumboyera. ² Odo ndjugho kwahulire pa kubita lifere limwe kumwamita meho yado ntani dimurongo ntano munaupatji. ³ Ghumwe wado ndjugho kwatika kuliharango lya munda ntani kubita dimurongo mbiri kukunapa na nkongoro ndjugho. Kwakalire ndjugho da pantambo ntatu, ano yimwe kuwiru ya kukengera pa livhu kuvaunyayo wa muntji makura avadiruwana, muku wana ndjira ya kupitira. Ndjugho dimwe adikengere pandje kuliharango lya pandje. ⁴ Mukanko wakubita murongo munaupati munaure kuyenda kumeho ya nkonda. Makende gha ndjugho kwatamba kuumboyera. ⁵ Ngoli liharango lya pawiru kwakalire lididi, ano ndjira yakupitira kwayi pititire ku kwalyo na livango lya lineneko kupita olyo varuwanene kuntji na pakatji kalitungo. ⁶ Ano kumbinga ya marughorongwa gha likovhu tatu, kapi kwakalire ngundi, apakara likushuvo na mahoramo pungwiro, ogho ghakaliro na ngundi. Ndjugho da pantambo ya kuwiruwiru da kalire dididi kudishetakanita kundjugho da munda na mukatji. ⁷ Likuma lya pandje kwadukire likwamite ndjugho kutamba kuliharango lya pandje, olyo lyakaliro kumeho ya ndjugho. Likuma olto kwahulire pa kubita dimurongo ntano munaure. ⁸ Naure wa ndjugho da liharango lya pandje kwahulirepa kubita dimurongo ntano, ano ndjugho odo datiko kunkongoro ndjugho kwahulire pa kubita lifere limwe. ⁹ Kwakalire mangeneno kutamba kundjugho da palivhu livhu kutundilira kuviha vya upumeyuva, kuya kutundilira kuliharango pangwiro lya pandje. ^{10 11} Kuntere ya likuma lya liharango lya pandje paviha vya upumeyuva vya liharango, kumeho ya liharango lya munda ya nkongoro ndjugho, nokokwakalire ndjugho. Oko kwakalire ndjira ya mpitiro kumeho yayo. Dado ndo dakaliro umonikito wa ndjugho da kuviha vya umboyera. Dado kwahulire pa ure wa kushetekana na unaupati ntani limoneko lyado kwakufanine na mafanayiko na mavero. ¹² Kuviha vya mbindakano kwa kalire mavero mundjugho odo dakaliroshi dina linakufana yira dakuumboyera. Mukanko wa munda kwakalire na livero kumutwe wagho, ano mukango kwayashaminine mundjugho da kukushuva-shuva. Paviha vya upumeyuva kwakalire mpito ya livero kutamba mu munkanko wa kundjumungu limwe. ¹³ Makura mukafumu aghamba kukwande, ''Ndjugho daviha vya ucuma dina karo kumeho ya liharango lya pandje kuna kara ndjugho da kupongoka oko vakundamanga kwa Karunga kwakulyera shingi sha ndya da kupongoka. Vanahepa kutura shingi sha vininke vya kupongoka nkokunya - ndjambo ya ndya, ndjambo ya ndjo, na ndjambo ya matongweneno - olino livango lyakupongoka. ¹⁴ Nangeshi muruti kuna kungena ko kunya, vasha karupukira kulivango lya kupongoka lya kuliharango rupukiro, vavo vahana kushutura vikoverero ovyo vana ruwanitako ko, mukondashi vyapongoka. Vavo vanakona kudwata muvikoverero peke kumeho ya kuyenda na mbunga.'' ¹⁵ Muntu amanitire kumeta ndjugho ya munda makura andupwita antware kulivero olyo lya gwanekero upumeyuva na kushetakera livango nalintje lya kundurukido ko. ¹⁶ Ghuye ashetekere ruha rwa upumeyuva na katondo kakushetekita - kubita lifere limwe na katondo kakushetekilita. ¹⁷ Ghuye ashetekere ruha rwa umboyera - kubita mafere matano na katondo kakushetekita. ¹⁸ Ghuye ashetekere waro ruha rwa ucuma - kubita mafere matano na katondo kakushetekilita. ¹⁹ Ghuye makura apiruka na kushetekera ruha rwa utokero - kubita mafere matano na katondo ka kushetekelita. ²⁰ Ghuye kwavishetekelitire vino pa maruha mane, kwakundurukidire likuma lya hulitro pa kubiku mafere matano munaure, ntani kubiku mafere matano mu naupati, mukuhangura upongoki utunde kunya kwakaroshi kwamakupakerero.