¹ Makura mukafumu andjita muivango lyakupongoka lya ntembeli na kuyameta ngundi da mavero - metera ntayimwe munaufupi kukehe ruha. ² Munaufupi mpito ya livero metera murongo; kukehe ruha rwa likuma metera ntano munaure. Makura mukafumu amete metera da livango lya kupongoka - metera dimurongo ne munaure ntani dimurongo mbiri munaufupi. ³ Makura mukafumu ayendi mulivango lyakupongekerera na kukameta ngundi da mpito ya livero - metera mbiri, ano mpito ya livero ayikara ntayimwe munaufupi. Makuma kukehe ruha aghakara metera ntambiri munaufupi. ⁴ Amete nka nkanda munaure wayo - metera dimurongo mbiri. Munaufupi - metera dimurongo mbiri kumeho ya ntembeli muwaranda. Makura atantere shi, ''Elino livango lya kupongoka.'' ⁵ Makura mukafumu amete likuma lyandjugho - alikara metera ntayimwe muunene walyo. Ufupi wakehe nkonda ya ndjugho kwakalire metera ne. ⁶ Mumpatji mwakalire nkonda pantambo ntatu, nkonda yimwe pawiru yaunyayo, nkondwa dimurongo ntatu pakehe ntambo. Nkambo kwakundurukidire likuma lya ndjugho, divatere nkondwa nadintje da mumpatji, kondashi kapi vatulireko vivatilita kulikuma lya ndjugho. ⁷ Nkondwa da mumpatji adinenepa nakuvareka kukudinga diyende kuwiru, kondashi ndjugho yayendire yikudinge muwiruwiru; nkonda adinenepa kutwara momo yayendire ndjugho muwiru, vilyatero aviyendi muwiru pantambo ya kuyeruka, kupitira pa ntambo ya pakatji. ⁸ Makura animono ruha rwa kuyeruka rwa ndjugho nayintje, litateko lya nkondwa da mumpatji; metera dalyo shitondo shakumetita muure washo metera ntayimwe. ⁹ Ufupi walikuma lya ndjugho da mumpatji pandje yalyo kwakalire metera ntayimwe. Pakalire livango lyamuporongwa pandje ya nkonda dino muntembeli. ¹⁰ Kuruha rumwe lyolino livango lyamuporongwa kwakalire nkondwa da varuti da pakatji; ruha runo kwakalire metera dimurongo mbiri muufupi kukundurukida ntembeli nayintje. ¹¹ Mavero akalireko ghakungena mundjugho da mumpatji da kutunda kulivango lya muporongwa lyapeke - mpito ya livero limwe kwakalire ruha rwa mukuro, ano limwe kuruha rwa urundu. Ufupi walino livango lya muporongwa kwakalire metera ntano kukukundurukida ¹² Litungo olyo lyapirukiro kumavango gha viha vyautokero kwakalire metera dimurongo ntambiri muufupi. Likuma lyalyo kwametire metera ntano unene walyo kumaruha naghantje; ntani alikara dimurongo ntane ure walyo. ¹³ Makura mukafumu amete ntembeli - metera lifere munaure walyo. Litungo lyakukugaunuka, likuma lyalyo, na livango navyo kwametire metera lifere munaure walyo. ¹⁴ Ufupi wakumeho ya livango lya munda kumeho ya ntembeli nowo wakare metera lifere. ¹⁵ Makura mukafumu amete ure walitungo lya kuruku ya ntembeli, kuutokero walyo, na mafano gha kukehe maruha - metera lifere. Livango lya kupongoka na litaratara, ¹⁶ makuma gha munda na makende, kuturako na makende gha mare, na mafano kudingilika pa ntambo ntatu, kwavifikire muvitondo vya kukukuta. ¹⁷ Pawiru yandjira ya kungena muntembeli na ligauno kukwama makuma pakalire ndjira yakumeta. ¹⁸ Kwayifuulitire na vaengeli ntani na vitondo vya maundunga; na shitondo sha undunga mukatji ka kehe muengeli, ntani kehe muengeli kwakalire na vipara viviri: ¹⁹ shipara shauntu kwakengelilire kushitondo sha undunga kuruha rumwe, ntani shipara shaunyime ashikengere kushitondo shaundunga kuruha rwapeke. mwakalire vishongaura mundjugho nayintje. ²⁰ Kutundilira palivhu dogoro pawiru ya mpito ya livero, vaengeli na vitondo vya maundunga avavipara mukuvifaneka pandje yalikuma lya ndjugho. ²¹ Ngundi da kumavero gha livango kwakalire shikwa mbando. Limoneko lyavo kwakalire yira limoneko lya ²² shidjambero osho varuwanita kuvitondo kumeho ya livango lyakupongoka, olyo lyakaliro metera ntatu munaure kuwiru ntani metera mbiri munaure palivhu kukehe ruha. Ngundi da pamagwanekero ghayo, ntenta, na maruha ghayo kwagharuwanitire kuvitondo. Makura mukafumu aghamba kwande shi, ''Yino ndjo ntishe oyo yayimano kumeho ya Karunga.'' ²³ Pakalire mavero gha kukurambakana gha kulivango lya kupongoka ntani na livango lyakupongoka unene. ²⁴ Mavero ghano ghakalire navikuwo viviri mwakehe lino, vikugho viviri vya livero limwe ntani vikugho viviri vylivero lya peke. ²⁵ Vafanekapo - pamavero gha livango lyakupongoka - vaengeli na vitondo vya undunga yira momo vyawapikire makuma, ntani muwiru mwakalire litaratara lya kuruwanita kuvitondo pawiru ya litaratara lya kumeho. ²⁶ Pakalire makende gha mare na vitondo vyaundunga kukehe ruha rwa litaratara. Akukara ndjugho da mumpatji ya ndjugho, ntani dakalire nka na mataratara gha kunyongama.