¹ Zvidaitika kuti, kubuda padafa Mozisi, nyamubasa wa Yahweh, Yahweh adalanga kuna Djochuwa, mwana wa Numi, mubatsiri wa Mozizi, atchilanga: ² "Mozisi, nyamubasa wangu, afa. Longedzani tchintchino, muka, iyambuka Jordani, iwe naentse mumba, uende kunyika iyangu ndirikupasa mbumba iya Iziraeli. ³ Yentse mbuto iyako unatsika ntsoka iyamwendo iyanu, Ine ndinadzakupasani, ninga zvangu ndidathembesa kuna Mozisi. ⁴ Kubuda murusare ese Libhano kuswikira mukulo ukulu, Eufrate, yentse madziko iya heteu kuswikira bala Likulu, kwalo linadokera dzuwa, zvinadzagala zvanu. ⁵ Hapalibe anakwanisa kugala sososo na iye zentse ntsiku za upenyu wako. Ndinadzagala nawe ninga pangu ndikana Mozisi. ⁶ Gala wantsimba futi wakupirira. Thangwe iwe unadzita mbumba iyi nhaka kuti ndadathembesa kupasa watchinyale wako. ⁷ Gala wantsimba futi wakupirira. Ita mhole kuti utewerere mutemo udakupasa Mozisi nyamubasa wangu. Leka kuphambuka kuna iwo, ne kumarjo ne bvwere. Nadyali, unadzagala muche kwako unada kuti uende. ⁸ Iwe unadzalaga mutemo pamusana pa bhukui iri. Unadzalifunga usiku na masikati, kuitira kuti ukwanise kutewerera, kwa kukwana, zvida nembiwa mwenemo. Napenepo, iwe unadzagala muche futi utchibudirira. ⁹ Handina kukubvunza Ine? Gala wantsimba ese wapirira! Leka kurtcha. Ausaluzi kupirira. Yahweh, Mulungu wako, anaiwe kwentse kwako unafamba, " ¹⁰ Napenepo, Djochuwa adabvunza kuna wanyakwawa wa mbumba: ¹¹ "Enda mumisasa ese bvunza wanhu: 'Imwe wabodzibodzi longedzani zvinhu zvanhu. Pantsiku zitatu, ife titcheyambuka Djorodani ese titchagala dziko kuti Hahweh, Mulungu wathu, alikutipasa ife". ¹² Kuna warubenita, wagatita na hafu lamutupo wa Manase, Djochuwa adalanga: ¹³ "Tsalakanani masoko iya Mozisi, nyamubasa wa Yahweh, adakubvunzani patche adalanga: "Yahweh, Mulungu wanu, alikutipumisa padziko lino'. ¹⁴ Wakadzi wanu, wana na zvifuyo zvanu mutchadzagala padziko kuti Mozisi adakupasani kunza kwa Djorodani. Apo wanyankondo wanu munadzaenda nawo na wabale wanu ese watchadza kubatsirani ¹⁵ kuswikira Yahweh, Mulungu wanu apareka phumhuzo kuna wabale wanu, dyali ninga zvidapasiwa imwe. Iwowo basi watchadzagara dziko kuti Yahweh, Mulungu wanu, atchadzawapasa. Kumasure ndinadza hirira kudziko lanu tchairo futi munadzagara, kuti Mozisi, nyamubasa wa Yahweh, adakupasani, kunza kwa Djordani, kuna baliwa dzuwa". ¹⁶ Ese iwo wadadaira kuna Djochuwa, watchilanga: "Zventse zvanu matibvunza, ife tinadzaita futi titchadzaenda kweneko kwanu imwe mukuda kuti tiende. ¹⁷ Tinadza kutewezani dyali ninga tidateweza kuna Mozisi. Yega Yahweh, Mulungu wako, anaiwe, dyali ninga patche akana Mozisi. ¹⁸ Weneule kuti anaphwaza mutemo futi atchireka kutoweza masoko yanu, anadzaulaiwa. Zvinadikana gala wantsimba futi wakupirira".