¹ Ita mhole mhole pako unaenda kunyumba iya Mulungu. Enda kweneko kabva. Kubva nkwamuche kupinda kupereka zvakubonerera ninga maphwephwa, thangwe hawadziwi zvawo walikuita, ndimaphwephwa mukulalama kwawo. ² Ausatchimbizi kulanga, kana mumoyo mwako ngamuleke kutchimbiza kuwisa tchinhu tchinango pamberi pa Mulungu. Mulungu alikudzaulu, apo iwe ulipansi; napenepo, masoko iyako ngayagale madoko. ³ Ungati unazvinhu zvakuwanda kuti uite, penango unadzagala ndoto zakunyangala. Ungalanga masoko iyakuwanda, penango, unadzaita zvinhu zvizinji zvauphwephwa. ⁴ Pako unaita tchipikiso kuna Mulungu, hausanongwi kutchiteweza, thangwe Mulungu halibe tchido na maphwephwa. Teweza zvako wathembesa. ⁵ Zvamuche nkuleka kuita tchipikiso kupinda kuita ese nkabe kutchiteweza. ⁶ Hausatenderi kuti mulomo wako ukuitise kunyangaza. Hausalangi kuna nyamasoko waMulungu: "Tchipikiso itchi tchaponyeka". Thangweranyi kuitisa Mulungu kugumbuka mutchidumbira zvakuphwata, Mutchimusosora atchifudza basa lamanja iyatche? ⁷ Thangwe mundoto zakuwanda, ninga mumasoko iyakuwanda, kuna kutoloka nkabe tsalukano. Napenepo irtcha Mulungu. ⁸ Pangauya mulombo mudunhu lako atchibzvinyirirha ese atchibatiwa uyanga nazvakuponyeka, ausapatiki ninga munhu hadziwi izvi, thangwe kuna wanhu kuti walikulindira wenewale kuti wali pansi pawo, ese kuna wenango kuti wali padzaulu pawo. ⁹ Kunza kwaizvi, zvilimwa zvapansi nswa wense, ese tchaiye mukulu mukulu anabudisa zvilimwa zvamumunda. ¹⁰ Weneule anada siriva hagutsiikani nalo, ese weneule munhu kuti anada upfumi anagala atchihuda. Izvi basi nkutuloka. ¹¹ Panguwa kuti upfumi hulikuwanda,wanyakuhurja wanawandawo. Ndiphinduranyi liripo paupfumi kuna mwenekatchiro, kunza kwa kuhuwona namatso iyatche? ¹² Nsiye zamwamuna wabasa zinadeka, kana urje padoko, kana urje maningi; apo upfumi wamunhu mupfumi haumutendezi kuti halali muche. ¹³ Pana kunyangala kudanyanya kuti ine ndawona pansi padzuwa: upfumi udalongedziwa namwenekatchiro, hudawoneka naulombo watche tchaye. ¹⁴ Patche mwamuna mupfumi aluza upfumi nakuda kwa soloti iyakunyangala, mwana watche tchaye, watche adabala, anagala nkabe zvinhu mumanja. ¹⁵ Ninga munhu anabaliwa alipezi mumimba iyamai watche, nadyali basi iye anadzasiya upenyu uhu pezi. Iye haiti mumanja mwatche kutola tchinhu pabasa latche. ¹⁶ Tchinango tchakunyangala tchikulu nditcho, tchaitcho ninga munhu adauya, nadyali iye anadzahirirazve. Ndiphinduranyi unango angaite atchisenzera mhepo? ¹⁷ Pakulalama kwatche nsiku zense, iye anarja mumudima, nakusuwa kukulu, kukonziwa na chungu. ¹⁸ Wonai zvangu ndinakawona: zvamuche ese zvidakwira ndiko kurja nakumwa, futi nakukolovera mubaibai walense basa lathu, tchidasenza nansimba pansi padzuwa pakati pansiku zakulalama kuti Mulungu adatipasa. Nazvinezvi iri ndiro basa wamunhu. ¹⁹ Anawonekayo mubodzi kuti Mulungu adamupasa upfumi namidziyo, ese kukwanira kutambira mbai iyatche futi nakufansa mubasa latche izvi ndizvo kupasa kwa Mulungu. ²⁰ Thangwe autsalakani nsiku zakuwanda zakulalama kwako, thangwe Mulungu anamuita alambirire atchiita zvinhu kuti iye anada kuita.