¹ Katchiwiri, ndidafunga pamusana pawense ubzvinyiririkuti urikuitika panyansi padzuwa. Onani masozi iyawanhu wakubzvinyirirha, ese iwo hawakalibe nyakuwa watamiza! Upfumi ukali mumanja iya wabzvinyiriri wawo, hakukaribe unango awawisire muwatamizi! ² Napenepo, ndirikukodza maningi wanhu kuti wadzafa kupinda wenewale kuti watchirikulalama. ³ Napenepo, wadakombolerha maningi kupinda wense ndiye weneule kuti hasati alalama, weneule kuti asati awonalirirense basa iyakunyangara iyalikuita panyansi padzuwa. ⁴ Napenepo, ndawona kuti rense basa lansimba na lense basa lakudjairira lagara thangwe labibvu kuna nyauyako. Izvi basi ndizvo ninga kutoloka, futi ninga kuesera kuuwsa mhepo. ⁵ Phwephwa rinavara manja iyatche futi harisenzi; nyama iyatche inagala tchakurja tchatche. ⁶ Apo ndamuche boko iro ridadzala naphindu, nabasa rathonhozo kupinda manja mairi iyadadzara, na basa lakuesera kuuswa mhepo. ⁷ Napenepo, ndafunga paswa pamusana paunyangazi uzinji ese kuzinji nkotoloka kuti kurikuitika pansi padzuwa. ⁸ Kuna muchobo wamunhu kuti ariega. Iye haribe unango kana mwana kana mubale. Haparibe malire kuna basa latche lense, futi matso iyatche hayaribe kudzekerha na upfumi watche adakwanisa. Napenepo, iye anabvunzisa: ndirikusenzera wani nansimba ese nditchizvi fofoflosa patchido? Izvi ndizvo ninga kutoloka, ndibasa lakunyangara. ⁹ Wanhu wairi wangasenza pabodzi nswamuche kupinda mubodzi; pabodzi, iwo wanakwanisa kuwona mubadaro nabas lawo. ¹⁰ Thangwe, angati mubodzi agwa, unango anakwanisa kumumusa. Napenepo, kutsurukwara kunatewera weneule kuti ariega; patche iye anagwa, haparibe unango anamumusa. ¹¹ Wangati wairi wadagona pabodzi, iwo wanakwanisa kupitsisana, apo anaitatani mubodzi kuti azvipitsise ega? ¹² Munhu mubodzi anakwanisa kukundiwa, apo wairi wanakwanisa kupirira pankodo. Nzoi iyakupetiwa katatu ainakudonha kugwandika. ¹³ Zvamuche kugara djaha mulombo, apo wakupangwa, kupinda sekuru mukuru phwephwa kuti hadziwi kubva mipango. ¹⁴ Izvi ndizvo zvatchadi, kana kuti djaha rigare mukulu patche adabuda muperezo, kana kuti iye tchaiye adabaliwa mulombo padziko latche. ¹⁵ Pazvense, ine ndidawona wense kuti walikulalama, watchifambafamba pansi padzuwa, watchibatana na djaha ribodzi kuti adamusiwa ninga mukulu. ¹⁶ Hazviribe mhera kuna wense wanhu kuti walikuda kutewera kuna mukulu muwsa, apo, kumasure, wazinji wawo awamusekererizve. Ndizvodi, zvinhu izvi ndizvo ninga kutoloka, futi ninga kuesera kuuswa mhepo.