¹ Di[e Alê sezalu Agosô manda whã odji ka fa ma ê ka bi tê whã sensu ri turu nkênu ku ka ta lêtu tia. ² A zi kua é pumbê vê, ola kirinu ta ngovenarô Sisria. ³ Anto turu ané ba poson ma ané ka ta né pa ané ba lijistu sensu. ⁴ Zozé turu ba poso Nazaré, Galilêia, ba Bélen ni Zurêia, ma a ta mora poso David, punda ê sa ri lasa Alê David. ⁵ Zozé bé ku mengay rê Maá bi ligista. Ê ta ku bega. ⁶ Ê ra ma ola ané ndu Bélen, ta ola ma Maá pari. ⁷ Sô ê pari pumbê ná rê sô ê buié ku whã panu. Sô ê pê whã nga ma situ ka mé né, punda ê na ta ku lugê pa ané ta né wha. ⁸ Tia é mé ta ku wha dôsu pasoro ku ta mévia ku ombô ané nsuku. ⁹ Whã anzu Sun bi lêlê ané sô goia Sun luzi katxi ané: Sô turu ané fika ku mendu. ¹⁰ Sô anzu fa ané: na mendu wha punda nsêka bi ku lékalu buaru ra turu pôvô. ¹¹ Ozé ni poso David, nansê whã Savarô ra sê. Ê sa Kistu, Sun nó! ¹² Sê ka bi té ku sinali é: Ê ka bi ta buiaru ku whã panu numiru whã nga ma situ ka ta. ¹³ Ta sô yô anzu bi fô onsé, sô zunta ku otô anzu ka kata ra Dêsu ka fa: ¹⁴ Goia ra Dêsu ku ka ta riba pazi ni tia katxi pôpô ma Dêsu mêsê buaru. ¹⁵ Ola anzu vutuka ba onsé ané pasôru fa katxi ané: Ban ba Belén pa pia kua buaru ku ra ma Sun zi non ta. ¹⁶ Ané bé seru sô nha ané bê Maá ku Zozé whã nga. Sô ané bê Mosu é numiru nga si ma situ ka mé né. ¹⁷ Ola ané bê kua é ané tanga yô nkênu kua ma fa ané ri Mosu é. ¹⁸ Turu ané ku bê pasôru fika ku ngosô ku kua ma ané ndê. ¹⁹ Mazi Maá ta lokê turu kua ma a ndê pê koso. ²⁰ Ané pasôru vutuka ka ngogô sô ka kata vungu ra Dêsu, punda turu kua ma ané ndê tô bê sa kua ma anzu ta fa ané. ²¹ Sô ri nákê ria ta ndu ola ri pora Mosu é. Ané pê nomi Jizu, punda asié ma anzu Samé, antizi pê nansê bega. ²² Ola ê ndu ndjira pa ané bila puru ané zié mora ma Muzé ta fa, Zozé ku Maá bé ku Mosu é atê ngêza, Jiruzalê, ba pezenté ra Sun. ²³ Punda ê ta sisikaru ni alê Sun. Turu pumbêlu na ku ka nansê toka sa santu ra Sun. ²⁴ Mora Alê Sun, ané turu toka ra ofeta " dosu na lola ku dôsu na pombi mora sakifisu". ²⁵ Sô ni Jiruzalê ta ku whã omé ma a ka sma Simion. Ê ta setu y buaru. Ê ta ka whara kosulason Israeli sô Supitu Santu ta kuê. ²⁶ Supitu Santu musé ma ê na ka pô muê antizi pa Kistu ma Dêsu pomêtê bi wha. ²⁷ Supitu bé ku Simion lêtu ngêza, Zozé ku Maá bi ku Mosu é, Jizu pê kumpi kusumu ma Alê ka manda. ²⁸ Simion tua Jizu pê mon sô lova Dêsu ka fa: ²⁹ Sun ka kundji aié ma na kia Sun ka bé ni pazi, punda ê kumpi pomesa Sun. ³⁰ Punda whê un bê Savason Ô, ³¹ ma Bô luma katxi turu pôvô. ³² Kandja ri musa ané zintxi, ku ra Goia pôvô Israeli. ³³ Ané tata Mosu é ta ku ngosô ku kua ma ta fa Rê. ³⁴ Simion ra ané bensa sô fa Maá mama Rê. Ma Mosu é sa mandaru tantu ra mali kuma pa a lata yô nkênu Israeli pa ê sa kua remanda. ³⁵ Whã supara turu ka la alima ô popi mora ma kua ma yô nkênu ka pensa koso ka musa. ³⁶ Whã mengay ku ka fa kua ma Dêsu ka manda, ma ka sama Ana turu ta nha. Ê sa na Fanueli, jelason Azer. Ê ta kuka sô ê vévia ku omé rê sambari anu na karêtê, ³⁷ Sô omé rê muê ê tô ta wêtenta anu. Ê na desa ngêza wha ka ngogô ku Dêsu atê atê ku jinzu ku lason nsuku ku sólo. ³⁸ Ola é mé, ê komesa ka ra Dêsu gasa ka fa ri Mosu é turu ané ku ta ka whara muransa Jiruzalê. ³⁹ Ola ané loké ri zi turu kua mora Alê Sun, ané vutuka ba Galilêia, ba popi posó ané, Nazaré. ⁴⁰ Sô Mosu é ta ka kula longô ka néta ka sia ka ta kua sô gasa Dêsu ta riba Rê. ⁴¹ Ané tata Rê ta ka ba Jeruzalê turu anu, ba Fesa Pasukua. ⁴² Ola Jizu kopeta kuyni dôsu anu anu ané ba fesa mora ma ané ta kusumaru. ⁴³ Ola fesa loké, ma ané vutuka, Jizu fika Jiruzalê sô ané tata Rê na ta ta Rê wha. ⁴⁴ Punda ané ta kunda ma Ê ta katxi ka bé ku ané. Pasaru whã ria têlu ka bé, ané komesa ka ngolo É katxi familia ku migu. ⁴⁵ Ola ane na Bê wha, ané tô vutuka ba Jiruzalê sô komesa ka ngolo É nha. ⁴⁶ Ri têsi ria, ané Bê lêtu ngêza tasoru katxi mesé, ka ndê ku atenson sô ka puta. ⁴⁷ Turu ané ku ta ka Ndê fika ku ngosô ku kua ma Ê ta sô ku kua ma Ê ta ka kundji. ⁴⁸ Ola ané bê Jizu, ané babaka. Sô mama Rê Faré: Ra kuai ma Bô zi non asié! Punda ãn ku tata Ô ta tomentaru ka ngolo Ô. ⁴⁹ Sô Jizu kundji: Ra kuai sê ta ka ngolo Un ra! Sê na ta ma Ntê ka ta kay Tata Un wha! ⁵⁰ Mazi ané na ta kua ma Jizu ta ka lumba kua é wha. ⁵¹ Anto Jizu vutuka ku ané tata Rê ba Nazaré, sô ta ka kundji kua ma ané ka fa sô mama Rê tá ka lokê turu kua é kosó Rê. ⁵² Mazi Jizu ta ka kula ku turu kua ma ê ta netaru ku gasa ku Dêsu ku turu nkênu.