¹ Mafala amweyawa ni wachadidi ngati munthu aliwense akuyesayesa kuti akhale wakuonelela, akufuna basa yamuche. ² Apa so wakuonelela akhale wakusaya mulandu, wakumulewela, mwamuna wa m'kanzi m'bhodzi, osaita vinthu mwakupitiliza m'gawano, wakukumbuka muche, walongosolo, wakutambila alendo, apo wakukwanisa kufhunzisa. ³ Asakhale munthu wakumwa bwaduwa, kabanga wandewo, koma wakuzichepesa, asakhale waukali, kabanga wakufuna kwenekwene macheleni. ⁴ Akhale mwamuna wakutonga bwino muyi wake, ndipo akhale wakuti wana wake ambamutetekela na m'tima wense. ⁵ Chadididi, akakhala kuti munthu adziwalini kutonga muyi yake, ko nyumba ya Mulungu angaichengete tani? ⁶ Osati akhale wakutembenuka manjemanje, kugopesela kuti angazikuze, ndawa chakusamwa, n'kutambila chiweluzo chakulingana na chimwe sathana anatambila. ⁷ Koma akhale wakuti, angakhale wanthu anango wakumbali akumuitila ukamboni wabwino, kuti asanyozewe apo m'kugwela muchidindi cha sathana. ⁸ Nazombo n'thumiki, zakuthandila zikhale zilibe masenzeka, osalewa mafala awili, osafuna kumbamwa bwaduwa kwenekwene, manje so osafuna kupeza phindu mwachiutsotsi. ⁹ Akhale wakuphata chisimikizo na m'mphanvu, chimwe nichinsinsi chakusankhuliwa cha Mulungu, ali nachi nkhumbu m'tima chakuchena. ¹⁰ Manje, amweyawa ayesewe chakuthoma ngati alidi wakufunikila, manje apo phate basa ninga n'thumiki, pakuona kuti alibe mulandu wakumulewelela. ¹¹ Naombo azikazi akhale wakusaya masenzeka, osati wamaphulei, akhale wakuita vinthu mwakusaya kupitilila n'gawano, wakudalilika mu vinthu vense. ¹² N'thumiki wakuthandizila akhale azimuna a m'kanzi m'bhodzi, waku tonga bwino wana wawo, na miyi yawo. ¹³ Azimuna wakuphatabasa bwino ambakhala na mbiri ya bwino na ufulu ukulu wakulewalewa za chisimikizo, mwa Krisitu Yesu. ¹⁴ Nikukulembelani vimweivi, ningakhale kuti nikudikhilila kuti nibwele kwa iwepo mwakusaya kunonoka. ¹⁵ Manje ngati ninganonoke, nalemba izi kuti udziwe momwe ukufunikila kuitila pa m'nyumba ya Mulungu, imweiyo ni nyumba ya Mulungu wamoyo, nyumbaiyo ndiyo imbalimbikisa na kukhochelela chadidi. ¹⁶ Chadididi, chinsinsi chakusankhulikaichi, chimbalewa kukhala wakuzipeleka kwa Mulungu n'chachikulu chuwa:Iye anaonekela ninga munthu, anaonewa kuti ni wakulungama, pomwe akhali mzimu, anaonekela kwa angelo, analalikiliwa kwa khaindi ya wanthu, wanthu apadziko lapansi anamu simikiza, manje apo anatambiliwa kudzulu muwukuluwake.