¹ Apo manje, chakuyamba nikukudandaulilani mwense kuti mumbapeleka mapemphelo yaku pemphelela kuna Mulungu,mumbapeleka mapemphelo, mumbapemphelelana, mumbapeleka mapemphelo yakulewa kuti mwaphatabasa Mulungu,m'malo mwa wanthu wense, peno akhale khaindi iponi. ² Muite vimweivi m'malo mwa mafumu, m'malo mwa wanthu na wense wakulemekezeka, kuti tikhale na umoyo wa zii, wa m'tendele, manje kuti tikhale wakuzipeleka kwa Mulungu mwakufunikila koma tikhale wakukumbuka bwino. ³ Zimweizi ni zamuche ndipo ni zakubvumiziwa kwa mpulumusi wathu Mulungu. ⁴ Omwe kufuna kwake kwakuti wanthu, peno akhale wa khaindi iponi, apulumuke na kukhala wakudziwa chadidi mwakuteweza. ⁵ Pakuti pali Mulungu m'mphodzi, na m'khala pakati m'mphodzi pakati pa Mulungu na wanthu. Umweuyo ndiye munthu uyo Kristu Yesu. ⁶ Iye anazipeleka kuti akhale malipilo wakukwana ndendende m'malo mwa wense, zimweizi ni zimwe azazichitile ukamboni pa nthawe yake. ⁷ Ndawa chaukamboni umweuyu, inepo ninasankhuliwa kuti nikhale nkuwilili na m'nthumiki, nikulewadi chadidi, nikunamalini ayayi, ninasankhuliwa kuti nikhale m'funzisi wakum'funzisa wanhtu wa khaindi inango za chisimikizo na chadidi. ⁸ Manjeso, nikufuna kuti kulikwense azimuna apitilize kupemphela, kuimisa manja yawo yakuchena m'dzulu mwakuleka kukalipilana na kukangana. ⁹ Mwakulingana na vimweivi, nikufunapomwe kuti azikazi ambazikomezesa na vakuvala vakufunikila, pakuvala mwakuzilemekeza mwanzelu, osati kungozikomezesa namasitayelo, akumangila tsitsi, golide,ngale, kabanga vakuvala vakudula kwenekwene. ¹⁰ Manje mumbazikomezesa mwakufunikila ninga azikazi omwe ambati ambalemekeza Mulungu afunika kuzikomezesa, ambazikomezesa na mabasa yabwino. ¹¹ Pakum'funzila, m'kazi ambakhala zii ndipo ambakhala wakuvumila na m'tima wense. ¹² Nikuvumizalini kuti m'kazi ambam'funzisa kabanga kukhala nautongi wamwamuna, koma ambakhala zii. ¹³ Pakuti Adamu ndiye ananthoma kulengewa, n'kubwela Eva. ¹⁴ Koma Adamu alibe namiziwe, koma m'kaziuyo ndiye ana namiziwa manje anataza. ¹⁵ Apo manje m'kazi azakhochelelewe ndawa yakubeleka wana,ngati akupiliza kukhala na chisimikizo, chikondi, na kukhala wakuchena ndipo wakukumbuka bwino.