¹ Pada asoo inaan Petrus nana i Yohanes, lamba' jo langko a Alatalah, pas jam tuu badoaan jo jam sambilanan. ² Dabarikan injen sera babaa yang injuun pande lamba' dari mola ipalapasangaan, karna inaan nanna ian i tanggung satiap asoon dabarikan da pagoleng jo katombangan Alatalah yang asonan Gerbang ba'ilang-ilang, manto' pande a mamita-mita jo tuu yang mintama jo lalamma langko a Alatalah. ³ waktu ian mita jo i Petrus nana i Yohanesan to mintama jo lalamma langko a Alatalah, ian mamita pangamanse'an jo ara inaan. ⁴ i Petrus sirarak nana i Yohanes mambele jo tuun nan, laloang bada jo an, "belenam". ⁵ Dabarikan tuun nan mambele, nana marap-arap pangamanse'an dari ara inaan. ⁶ Tapi, bada i Petrussan, "iakkan nin injuak muna' pirak nan amassan, tapi aika yang injenan jo ku'un kupandeang jo nuun. Ilalama asona Yesus Kristus Urang Nasaretan nan, Lamba' nao." ⁷ Petrus mangkam tangan kato a tu un nan: Pakadeng jo an, pada saat inaan bata tolang-tolang kai-aan menjadi mam. ⁸ Tuun nan laloang angkatang kalea, dabarikan matawang kadeng nana molai malamba'ang kai a; dabarikan iaan sirarak nana ara i Petrus nana i Yohanes busi mintama jo lalamma longko a Alatalah, nana lamba'an, mingkajuk-kajuk mamudi jo Alatalah. ⁹ Samua tuun mambele joaan pande lamba' nana, mamudi-mudi jo Alatalah an. ¹⁰ Ara Inaan mamarati bahwa babaa inanna yang deangan mamita-mita jo Gerbang ba'ilang-ilang langko a Alatalah; ara inaan tangkarado'an nana taranyaan jo aika yang tarjadi-in joaan. ¹¹ Sementara inaan iaan tetap bo malola'n jo i petrus nana i yohanes, samua tuun tangkarado'an laloang parinrien sikapulung malamba'i jo ara inaan jo koson yang asonnan Serambi Salomo. ¹² Waktu inaan, I petrussan mambele laloang bada jo ara inaan, "ingkinan nin tuu dari israellan kin , aisi manun joninan nyadi kin tangkarado'annan? aisi manun mambeleen kin jo naman, kate ingkam a nin yang muna kapandean maniang jo tuun pande lamba'? ¹³ Alatalah a Abraham, Alatalah a Isak, nana i Yakubpan, Alatalah a ara tamatoa ka' ijoon, ijolona mamuliakannan jo Yesus san. Ia na ni yang i awaan nana di tulak ingkin jo ijoloa i Pilatus, waktu inaan ian maminna maniang putusan malapasang jo an. ¹⁴ Tapi ingkinan manulak kin jo tuu yang kudus nana ma'matapan nan, dabarikan mamitakin tiang pangganti jo an, tuu yang mamin muno' i lapasang bagi jonin. ¹⁵ Ingkinan sama bain muno kin jo tuu yang mameang tio'on jo ninan, ian na nan yang maminnanna da katio' balik kole'a Alatalah dari intara yang mateen dan ingkam ninna saksi-saksi a. ¹⁶ Kateninan, i dasarrang jo imannan lalama ason-Nan, mameang panguatan jo babaa yang i kita nana yang i kilaan ingkin. Iman yang mondokkan malaloi Yesus, maminna pamamii jo babaa an nin sabagaii bukti jo samua ninan. ¹⁷ Kateninan bata saurunku', ku katawang bawa ingkinan bakaraja lalama ka injuun matawang ngin, kate bo yang maminnan na dakaraja kolea bata toa-toa nin. ¹⁸ Tapi bata kada a Alatalah malaloi baaba'a ara nabiin, bahwa Kristus yang i dutussan harus sansara, dabarikan kada iniin maminna da panoi kole'a. ¹⁹ Sebab inaan, batobat nain nana babalik ngai manto' i apusa kasala'an ninan, tiang pamondokkang kalapangan nyawa dari Tuhan nan; ²⁰ dan manto' Ian mutus jo Kristus yaitu Yesus yang maminnan na idile'ang jo ninan. ²¹ Kristus san nan harus la'lako' ijolo jo lalam surgaan, sampai mondok waktu yang maman, kate yang maminnan na dapadaang kole' a Alatalah ijoloon malaloi baba'a ara Nabi yang kudussan. ²² I musaan bada, 'Alatalah akan mangatio' balik sera Nabi kate kuun nin dari intara bata saurun nin. Ingkinan harus kin manantalingga samua yang dapadangan. ²³ Yang dariin moangan jo tu yang amoon manantalinga joan, da anyaappang dari intara tu. ²⁴ Dan Samua Nabi da molai dari i Samuel nana ara nabiin yang mondok ijolo an, ara inaan maminna bernubuat mangana'i zaman niin. ²⁵ Ingkinan nan kanturunan ara Nabi, kate pakat yang maminna da tiang kole'a Alatalah nana tamatoa nin joloon, kate kada a bo jo Abraham man, 'malaloi benihnu, samua kanturunnan nu jo bumiin akan dabarkati. Mamin poang mo' Alatalah mangatio' balik jo hambaAn, ²⁶ Mola-molaan Ian da utus jo ninan kolea Alatalah, mamberkati jo ninan, manto' babalik kin dari samua yang barataan."