¹ Jo aso Pantekosta, arinaan simalo jo sera kosonnan, ² injupi aluun dadalinga kole'a ari-naan aling suangin suruit mamanoi suang langko kosoon duduka ari-naan. ³ Jo kosoon nande dakitalah ruba lila-lila api yang tambor-amboran laloong alo i-boa ulua ari-naan. ⁴ Samua-a ari-naan dapanoi kole'a Roh Kudussan mamiin naan suangkadangpoang kale'a na kada yang silen-lennan katebo kada Roh yang manyuro bakada-kadaan. ⁵ Mamin kate'naan injen urang Yahudi yang tio'on jo Yerusalemman, ara Toa-toa dari satiap bansa iunga suannan. ⁶ Saat mandalinga aling sipadaanna ari-naan, tu ambat yang mondokkanpun aya-aya kole'a suangkadangpoangkalea na kadaa tarakadiri. ⁷ Ari-naan tangkarado'an na taranyan; ari-naan lalong bada, " Totong aka, boan akade ara yang sipadannan niin ara dari Galilea? ⁸ Aika itantalingangan jo ari-naan, sipadaanpoangai nanakadaka sasuai dari koson ipalapasangka tara kadiri? ⁹ Tu dari Partia na Media na Elam, nanna ari-naan yang lalakoon jo Mesopotamia, jo Yudea na Kapadokia, jo Pontus na Asia, ¹⁰ jo Frigia na Pamfilia, jo Mesir nana sabala banua Libia yang minso Kirene, nana ambatta para tamoe dari Roma, ¹¹ Urang-urang Yahudi nana bansa boanan yang parasaya'an jo Agama Yahudiin, urang Kreta nana urang Arab, idalinga ingki ari-naan sipadaan ilalamma kadaka mangana'i karaja mulia Alat Allah." ¹² Samuaa ari'naan taranyan na aya-aya, sambil bada sera jo yang boanan, " Aika rati dari samuaaniin?" ¹³ injen tu boan sapadua yang more-oreen kalangoan anggur yang baru dapiangan mo'tae ariniin." ¹⁴ Petrus na kasabelas Rasulanpun kadeng sambil bada jo ari'naan, "oii ingkin dari banua Yahudi nana samua tu yang la'lakoon jo banua Yerusalemman, mato ikataonga ingkin tantalingana jo kadakuun ingkin, ¹⁵ sabab, ari'niin inju kalangoan, soalan sason niin ambattapi jam talu. ¹⁶ Ininnade yang dapadangan kole'a malaloi Nabi Yoel: ¹⁷ Katebo kadaa Alatala jo aso imundin kumeang samuaninmo Roh Kudus, anak bibinge na anak babanu mameang parajannanbomo, katenan busi anak-anak barunmo mita-ita yang tamatoa-tamatoan mamui-muimo. ¹⁸ Katenaanbusi iboa hamba-hamba baba nana bibingen jo aso i-naanmo kubolongangbomo sumangat-Kuun, nana sumangatkuunnamo ari-naan mataoang panyunyua. ¹⁹ Iak-kan mo injenbak mamitang panyunyuaku bua'anamo ikita kolenin kate jo suanan injenbomobusi tanda-tanda'a iungan tanaan, ruba dara, api na rimbu yang atabanan. ²⁰ Sabalum mondok aso yang datantutukannan kole'a Alatala, mataasonmo baruba manjadi dondom bulanan barubah manjadi dara, ²¹ aso inannamo intika yang masonnan jo Alatalaan dasalamatang. ²² Oii, urang Israel, tantalingana ingkin kadakuun niin, Yesus-san urang Nazareht, i-nanna yang dajanai kole'a Alatala na parabuat-parabuat malaloi tanda-tanda yang dapitangan Jo'-An, katebo yang ikataoangan ingkin. ²³ Muntuari i-ninnamo yang mateen jo kayu salibpan, malaloi tangan-tangan tu baraat, ²⁴ mamin dabarikan Alatala matiobalik Jo'an, dalapasang dari tio yang mamanseen, dari kamatean, laanpun bebas dari kuasa kamatean-nan. ²⁵ Kole'a i-Daudtan mamin bada manganangi Jo'an, ' Alatala salalu pitang kale'a jo dapan lindokuun, ²⁶ kole'a inanna iakkan injuak munda tapangaruh. Kole'a inanna susu atekuun, lillakuun mamudi-mudi ulu-ulu, jo inanpi suangmuntuarikuun tio ilalamma parasaya'kuun. ²⁷ Ingkoon injuko marantang sumangatku jo Hades, injuko mamalat Sumangatnu yang bailang-ilangan mambele jalu yang arusakkan. ²⁸ Ingkoon mamitang dalan tio' lindonuun manyuro susu' ulu'-ulu' jo nyawakuun. ²⁹ Arasaurunku, kadajajiku poang joninnan manganangi I-Daud de'nan tamatoa joloka: Ian mamin mate nana maminna i-kubur, kuburraan injenpi sampai sasoonniin. ³⁰ Kole'a i-nan-na ian iason sabagai Nabi, nanpunlagi maminna dakataoang janji Alatalan na mamangnga joan, kanturunnunmo injen yang dari Rajaan. ³¹ Jaluun-niin dakataoangnga ijolo sabalummaan, mamin-na busi dakenangi kate tio' balik-ka Kristus, inanpuun ian inju busi darantang jo Hades-san, muntuarianpun inju alala'. ³² Yesus nin-na yang dakatiobalik-kan kole'a Alatala, ingki'in-na-ni'in saksian. ³³ Katebo yang i-kita na i-dalingaan ingkin, maniik jo suan-nan duduk jo katoa Alatala, manarima sumangat yang bailang-ilangan katebo janjia Ama'a. ³⁴ I-Daud-tan inju manik jo suanselloon, tapi ian bada, 'Alatala bada jo Tuanku'un,, "Dudukngao i-sabala tangan katoku'un, ³⁵ Bua'anamo lawan-lawan-nuun dari palat-lattan-nu." ³⁶ Kole' i-nan-na ipalat poang samua bansa Israel-lan mataoang jaji, Alatalaanpun masoon jo'an Tuhan na Kristus, Yesus yang i-salipangngan ingkiin. ³⁷ Jo mandalingaa arinaan, apais atean, mamin-naan batanya jo i-Petrus-san na-na Rasul yang boan-nan, " Arasaurunku, aika yang i-tiangngan ingkam niin?" ³⁸ I-Petrus-sanpun manjawab aika yang datanya'angngan kole'a arinaan, " Batobatnain! paramandi'angnga kale-nin, i-lalam-ma ason-na Yesus Kristus untuk pampun-nan dosa-dosa-nu, ingkoonpinmo manarima barakat sumangat yang bailang-ilangngan. ³⁹ Mole' jonun-lah janjiin-naan katenanbusi jo anak-anakngun, na samua muntuari yang anjo'on, i-tambaipi sambat tu yang dakalongan kole'a Alatala-ka. ⁴⁰ Kate nin-na kada yang dapadampeangan; " Salamatangnga kalenin dari kanturun yang baraatan niin." ⁴¹ Mamin manantalinga arinaan laloang iparamandi'i, aso inanbo katamban sambat kira-kira taluribu muntuari. ⁴² Ari'naan tatapbo jo parajanna Rasul-lan, bakapulung sambayang, manyombaangngan mamin naan mana-na roti. ⁴³ Satiap muntuari marasa ataut kausana, kole'a ambat yang tanda-tanda tarajadi malaloi jo ara Rasul-lan. ⁴⁴ Samua tu yang parasayaan simalo,sikapulung, aika samua kamunaan dari sera-sera arinaan sama-sama ta'ana. ⁴⁵ Samua kamusana arinaan dapet kausana mamin-naan ⁴⁶ Tiap aso arinaan sikapulung, simalo-malo ilalamma langkoa Alatala, mamin mana'-na' roti, jalu i-kaan na rasa susunyawa'a mansen-nana. Arinaan mamudi-mudi Alatala, samua tuun sanangkausana jo arinaan. ⁴⁷ Mamindaripada inaan ambatta tu yang dasalamatkannan kole'a Alatala katambaan ulu'-ulu'.